ទិវាយុវជនអន្តរជាតិ៖ យុវជនប្ដេជ្ញាខិតខំរៀនសូត្រអភិវឌ្ឍខ្លួន​ដើម្បីចូលរួមកសាង​កម្ពុជាឱ្យកាន់​តែខ្លាំងក្លា

ស្របពេលនឹងទិវាយុវជនអន្តរជាតិនៅថ្ងៃនេះ ហើយក៏ស្របពេលដែលកម្ពុជា មានវិវាទព្រំដែនជាមួយថៃ យុវជនកម្ពុជាបានបង្ហាញឆន្ទៈមុតមាំយល់ច្បាស់ពីតួនាទីរបស់ខ្លួនដោយបានប្ដេជ្ញាប្រឹងប្រែងរៀនសូត្រ ឱ្យបានពូកែ ប្រែក្លាយជាមូលធនមនុស្ស ដើម្បីចូលរួមអភិវឌ្ឍសង្គមជាតិឱ្យកាន់តែប្រសើរកាន់តែរឹងមាំខ្លាំងក្លា។

ក្នុងឱកាសនេះក្រុមយុវជនក្រៅពីការគាំទ្រលើកទឹកចិត្តដល់កងទ័ព ពួកគេក៏ដឹងច្បាស់ពីកាតព្វកិច្ចត្រូវប្រឹងប្រែងរៀនសូត្រជាចាំបាច់ផងដែរ។ ពួកគេយល់ថា ការខិតខំប្រឹងប្រែងរៀនសូត្រ ដើម្បីក្លាយជាមូលធនមនុស្សសម្រាប់សង្គមជាតិ ចូលរួមអភិវឌ្ឍជាតិ កសាងជាតិឱ្យកាន់តែរឹងមាំខ្លាំងក្លា គឺពិតជាមានសារៈសំខាន់ណាស់ចំពោះពួកគេដែលជាយុវជនជំនាន់ក្រោយ។ ពួកគេដឹងច្បាស់ថា សង្គមជាតិមួយដែលមានភាពខ្លាំង គឺត្រូវការប្រជាពលរដ្ឋដែលមានចំណេះដឹងជាចាំបាច់ ហើយពេលដែលសង្គមជាតិមួយមានភាពខ្លាំងរឹងមាំ នោះប្រទេសដទៃមិនអាចមើលងាយបំពាន ឬឈ្លានពានបាននោះទេ។

បច្ចុប្បន្នបញ្ហាជម្លោះព្រំដែនកម្ពុជា-ថៃ បន្តរក្សាបានភាពស្ងប់ស្ងាត់ រក្សាបានការមិនផ្ទុះអាវុធនៅតាមបណ្ដោយព្រំដែន។ កងទ័ពកម្ពុជានៅបន្តឈរជើងយ៉ាងរឹងមាំ ក្នុងការបំពេញបេសកកម្មជាតិ ការពារបូរណភាពទឹកដី ស្របពេលដែលពលរដ្ឋជួរក្រោយ បន្តបំពេញតួនាទីចាំបាច់របស់ខ្លួន និងបន្តគាំទ្រលើកទឹកចិត្តដល់កងទ័ព៕ អត្ថបទ៖គឹមហុក