កម្ពុជាបន្តអំពាវនាវឲ្យថៃប្រគល់ទាហានខ្មែរ១៨នាក់មកកម្ពុជាវិញឲ្យបានឆាប់ខណៈក្រុមគ្រួសារជនរងគ្រោះកំពុងចាំទាំងយប់ទាំងថ្ងៃ

ភ្នំពេញ ៖ រាជរដ្ឋាភិបាលកម្ពុជា តាមរយៈអ្នកនាំពាក្យក្រសួងការពារជាតិកម្ពុជា បានបន្តអំពាវនាវយ៉ាងទទួចឲ្យភាគី ថៃប្រគល់ទាហានកម្ពុជា១៨នាក់ ដែលថៃចាប់ទៅដោយខុសច្បាប់នោះមកកម្ពុជាវិញជាបន្ទាន់ ស្របទៅ តាមច្បាប់មនុស្សធម៌អន្តរជាតិ និងតាមការទាមទាររបស់សហគមន៍អន្តរជាតិ ខណៈរយៈពេល១៥ថ្ងៃក្រោយទាហានថៃចាប់ពួកគេទៅបានធ្វើឲ្យក្រុមគ្រួសារជនរងគ្រោះទទឹងរងចាំដោយអន្ទះសារទាំងយប់ ទាំងថ្ងៃនោះ។

ក្នុងសន្និសីទសារព័ត៌មានប្រចាំថ្ងៃ ស្តីពីការអនុវត្តបទឈប់បាញ់ នារសៀលថ្ងៃទី១៣ ខែសីហា ឆ្នាំ២០២៥នេះ លោកជំទាវម៉ាលី សុជាតា បានថ្លែងថា គិតមកដល់ថ្ងៃទី១៣ ខែសីហា ឆ្នាំ២០២៥នេះ គឺមាន រយៈពេល១៥ថ្ងៃហើយ ដែលទាហានថៃបានចូលមកចាប់ទាហានកម្ពុជាដោយខុសច្បាប់ អំឡុងពេលកំពុងអនុវត្តកិច្ចព្រមព្រៀងបទឈប់បាញ់ ដូច្នេះកម្ពុជាសូមអំពាវនាវយ៉ាងទទួចឲ្យភាគីថៃគោរពនូវកិច្ចព្រមព្រៀង និងធ្វើការដោះលែងទាហានកម្ពុជាដែលខ្លួនចាប់ទៅនោះមកកម្ពុជាវិញឲ្យបានឆាប់ដោយគ្មាន លក្ខខណ្ឌអ្វីនោះឡើយ។

​អ្នកនាំពាក្យក្រសួងការពារជាតិកម្ពុជាបានថ្លែងថាក្រសួងការពារជាតិនិងកងយោធពលខេមរភូមិន្ទ មិនបានព្រងើយកន្តើយ ឬទុកសមាជិករបស់ខ្លួនណាមួយចោលនោះទេទោះក្នុងកាលៈទេសៈណាក៏ដោយ ហើយ រាជរដ្ឋាភិបាលកម្ពុជាក៏បានស្នើឲ្យម៉ាឡេស៊ីដែលជាប្រធានអាស៊ានប្តូរវេន ក៏ដូចជាសហគមន៍អន្តរជាតិឲ្យជួយអន្តរាគមន៍ ដើម្បីជំរុញឲ្យភាគីថៃឆាប់បញ្ជូនពួកគាត់ឲ្យមកកម្ពុជាវិញឲ្យបានឆាប់ៗផងដែរ។

ឆ្លៀតក្នុងឱកាសនោះដែរ អ្នកនាំពាក្យក្រសួងការពារជាតិកម្ពុជា ក៏បានថ្លែងអំណរគុណយ៉ាងខ្លាំងចំពោះសហគមន៍អន្តរជាតិដែលបានជួយធ្វើការទាមទារឲ្យភាគីថៃ ដោះលែងទាហានកម្ពុជាទាំង១៨នាក់ ដែលថៃបានចាប់ទៅដោយខុសច្បាប់ប្រគល់មកឲ្យកម្ពុជាវិញផងដែរ៕