ព្រះសង្ឃ និងពុទ្ធបរិសទ្ធនៅសៀមរាប រួមគ្នាយកអំណោយចែកជូនវីរកងទ័ពនៅព្រំដែនកម្ពុជា-ថៃ

ព្រះសង្ឃ និងពុទ្ធបរិសទ្ធ នៅក្រុងសៀមរាប ខេត្ដសៀមរាប កាលពីរសៀលថ្ងៃទី១៦ ខែសីហា ម្សិលមិញនេះ ​បានរួមគ្នាយកអំណោយ មានគ្រឿងឧបភោគ បរិភោគ ចែកជូនវីរកងទ័ព​នៅព្រំដែនកម្ពុជា-ថៃ ដើម្បីលើកទឹកចិត្ដដល់ពួកគាត់ដែលបានលះបង់កាយកម្លាំង​ចិត្ដការពារ​ជាតិមាតុភូមិកម្ពុជា។

ព្រះអង្គ ស រ៉ា ព្រះគ្រូចៅអធិការវត្ដប្រាសាទត្រាំនាគ ក្រុងសៀមរាប ព្រះអង្គមានសង្ឃដីកាថា អំណោយ​ទាំងនោះមាន ថវិកា និងគ្រឿងឧបភោគ បរិភោគជាច្រើនដែលទទួលបានពីឧបត្ថម្ភរបស់​ពុទ្ធបរិសទ្ធនិងរបស់ព្រះអង្គផ្ទាល់សម្រាប់យកចែកជូនដល់កងទ័ពជួរមុខព្រំដែនខេត្ដឧត្ដរមានជ័យ។ព្រះអង្គ បានបន្ដថា អំណោយនេះ មិនច្រើនប៉ុន្មានទេ ប៉ុន្ដែអាចជួយសម្រួលដល់កងកម្លាំងវីរកងទ័ព ដែល​បំពេញកាតព្វកិច្ចយ៉ាងអង់អាចការពារព្រំដែន បូរណភាពទឹកដី និងមាតុភូមិ តាមឆន្ទៈមោះមុត​របស់សម្តេចតេជោ និងសម្តេចធិបតី ហ៊ុន ម៉ាណែត។

ព្រះអង្គបានសម្ដែងនូវសេចក្ដីគោរព ក្តីស្រឡាញ់ ការគាំទ្រ និងសេចក្តីសោមនស្សរីករាយជាអនេក ដែល​មានប្រជាពុទ្ធបរិសទ្ធ សប្បុរសជន រួមសាមគ្គីគ្នា ជួយឧបត្ថម្ភដល់វីរកងទ័ពជួរមុខ ដែលកំពុង​ឈរជើង​យ៉ាងរឹងមាំក្នុងស្មារតីមោះមុត និងអង់អាចក្លាហាន សម្រាប់បេសកកម្មការពារព្រំដែន ដែល​ជាខឿនឯករាជ្យជាតិ បូរណភាពទឹកដី និងមាតុភូមិនៅតាមបណ្ដោយព្រំដែន។

ព្រះអង្គបន្ដថា​ ការរកដំណោះស្រាយជម្លោះព្រំដែនកម្ពុជា ​ថៃ ឱ្យមានសន្ដិភាពឡើងវិញ ពី​ការឈ្លានពានទឹកដីកម្ពុជា ​គឺព្រះអង្គជឿលើរាជរដ្ឋាភិបាលកម្ពុជា និងប្រទេសមហាអំណាច​នៅលើពិភពលោក។

បើតាមព្រះគ្រូចៅអធិការវត្ដប្រាសាទត្រាំនាគ ព្រះអង្គ ស រ៉ា​ មានសង្ឃដីកាថា ការយក​អំណោយ​ជូនវីរកងទ័ពជួរមុខនេះ បានធ្វើឡើងជាបន្ដបន្ទាប់ ​ដែលអំណោយ រួមមាន ថវិកា អង្ករ ទឹកបរិសុទ្ធ និងគ្រឿងទេសជាច្រើនទៀត៕