អ្នកនាំពាក្យអាជ្ញាធរអប្សរា៖ ភ្ញៀវទេសចរជាតិ និងអន្តរជាតិ​ទៅ​ទស្សនា​ខេត្តសៀមរាប​នៅ​រក្សា​បាន​កំណើន បើទោះបីកម្ពុជាជួបសភាពការណ៍ជម្លោះព្រំដែន

សៀមរាប៖ អ្នកនាំពាក្យអាជ្ញាធរជាតិអប្សរា លោក ឡុង កុសល បានថ្លែងប្រាប់ BTV នៅ​ព្រឹក​ថ្ងៃ​ទី​១៩ ខែសីហានេះថា ក្នុងពេលបច្ចុប្បន្ននេះ ភ្ញៀវទេសចរទាំងជាតិ និងអន្តរជាតិ​រក្សា​បាន​នូវ​កំណើន​ បើទោះបីសភាពការណ៍ជម្លោះព្រំដែនមានបញ្ហាលំបាក។

លោក ឡុង កុសល បានឱ្យដឹងថា ការរក្សាបាននូវកំណើនភ្ញៀវទេសចររបស់ទាំងភ្ញៀវជាតិ និង​អន្ត​រជាតិបែបនេះ គឺបញ្ជាក់អំពីភាពរឹងមាំនៃមូលដ្ឋានវិស័យទេសចរណ៍វប្បធម៌របស់កម្ពុជា និង​ភាព​វិជ្ជមានអំពីការផ្សព្វផ្សាយល្អៗអំពីកម្ពុជា ជាពិសេសការបង្កើនសេចក្តីទុកចិត្ត និង​សេវា​កម្ម​របស់​យើង​ជូន​ភ្ញៀវទេសចរនៅរមណីយដ្ឋានអង្គរ។

លោក ឡុង កុសល បានបញ្ជាក់ថា៖«តាមស្ថិតិដែលបង្ហាញកំណើនភ្ញៀវទេសចរចិនក៏មាន កំណើន​ភ្ញៀវ​ទេសចរខាងអឺរ៉ុបក៏មាន»។

បើតាម លោក ឡុង កុសល អ្វីដែលអាជ្ញាធរជាតិអប្សរានឹងត្រូវបន្តធ្វើ គឺខិតខំជួសជុល ថែរក្សា​សម្បត្តិ​បេតិកភណ្ឌ មរតកដូនតាឲ្យកាន់តែល្អប្រសើរ និងឲ្យក្លាយ​ជា​ចំណុច​ទាក់​ទាញ​កាន់​តែ​ខ្លាំង​។

លោកបានបន្តថា ជាក់ស្ដែងនៅព្រឹកថ្ងៃទី១៩ ខែសីហានេះ មាន​ភ្ញៀវ​ទេសចរ​អន្ដរជាតិ​យ៉ាង​ច្រើន​កុះ​ករ បានមកទិញសំបុត្រចូលទស្សនារមណីយដ្ឋានអង្គរ នៅគ្រឹះស្ថានអង្គរ ខេត្ដសៀមរាប ។

បើតាម ឯកឧត្តម Wang Wenbin ឯកអគ្គរដ្ឋទូតចិនប្រចាំកម្ពុជា បានបង្ហោះ​សារ​នៅ​លើ​បណ្ដាញ​សង្គម​ហ្វេសប៊ុកកាលពីថ្ងៃទី១៨ ខែសីហានេះដែរថា ក្នុងរយៈពេល៧​ខែ​ឆ្នាំ​២០២៥​នេះ​ទេសចរ​ចិន​ចំនួន ៥៣ ២៩១ នាក់ បានមកលេងកម្ពុជា ចំនួននេះបានកើនឡើង២១% បើធៀប​នឹង​ឆ្នាំ​មុន ខណៈ​ចិន​គឺ​ជា​ប្រភព​ភ្ញៀវ​ទេសចរ​បរទេស​ច្រើន​ជាង​គេ​ដែល​បាន​ទៅ​ទស្សនា​ប្រាសាទ​អង្គរ​វត្ត​។

ឯកឧត្តមឯកអគ្គរដ្ឋទូតបានបន្តថា នៅក្នុងខែកក្កដា ចិនគឺជា​ប្រភ​ព​ភ្ញៀវ​ទេសចរ​បរទេស​ច្រើន​ជាង​គេ​សម្រាប់​ប្រាសាទអង្គរវត្ត ដោយមានភ្ញៀវទេសចរចិនចំនួន ៥ ៧២០នាក់ បានទៅទស្សនា​ទីនោះ​។ ឆ្នាំ២០២៥ ត្រូវបានកំណត់ថាជាឆ្នាំទេសចរណ៍កម្ពុជា-ចិន ចំនួនភ្ញៀវ​ទេសចរ​ចិន​ដែល​មក​ទស្សនា​ប្រទេសកម្ពុជាត្រូវបានគេរំពឹងថានឹងបន្តកើនឡើងពេញមួយឆ្នាំ៕