សាលាTVET រៀបចំស្តង់ពិព័រណ៍ប្រចាំការរង់ចាំទទួលអតីតពលករមកពីថៃ​ចុះឈ្មោះ​រកការងារ និង​រៀនជំនាញ

នៅតាមបណ្តាសាលាបណ្តុះបណ្តាលបច្ចេកទេស និងវិជ្ជាជីវៈ TVET របស់ក្រសួងការងារ និង​បណ្តុះបណ្តាលវិជ្ជាជីវៈ នៅថ្ងៃទី២០ ខែសីហា នេះ ចាប់ផ្តើមពង្រីកសេវាកម្មខ្លួន ដោយ​បាន​តំឡើង​ស្តង់​ប្រចាំការ​រៀងរាល់ថ្ងៃ រង់ចាំទទួលអតីតពលករខ្មែរមកពីថៃ ចុះឈ្មោះស្វែង​រក​ការងារ​ធ្វើ​ផង​ និងចុះឈ្មោះចូលរៀនជំនាញវិជ្ជាជីវៈផ្សេងៗផងដោយមិនមានគិតថ្លៃ​។

លោកគ្រូ តំណាងវិទ្យាស្ថានជាតិពហុបច្ចេកទេសតេជោ សែន ខេត្តកណ្តាល បានថ្លែងប្រាប់BTV នៅ​ថ្ងៃ​ទី២០ ខែសីហានេះថា អនុវត្តគោលការណែនាំថ្នាក់ដឹកនាំក្រសួងការងារ និងបណ្តុះ​បណ្តាល​វិជ្ជា​ជីវៈ នៅវិទ្យាស្ថានជាតិពហុបច្ចេកទេស តេជោ សែន ខេត្តកណ្តាល គឺបានរៀប​ចំ​ស្តង់​បើក​ការ​ប្រចាំការរៀងរាល់ថ្ងៃ រង់ចាំយុវជន ជាពិសេសរង់ចាំអតីតពលករខ្មែរមកពីប្រទេសថៃ មក​ពី​ធ្វើ​ការ​ឈ្មោះ ស្វែងរកឱកាសការងារ និងស្វែងរកឱកាសការសិក្សាជំនាញវិជ្ជាជីវៈផ្សេងៗ ដោយ​មិន​គិត​ថ្លៃ ខណៈមកដល់ពេលនេះសាលាក៏ទទួលបានអតីតពលករខ្មែរមកពីថៃខ្លះៗដែរ ចូល​រៀន​ជំនាញ​វិជ្ជាជីវៈវគ្គខ្លី នៅក្នុងកម្មវិធី​ផ្តល់​អាហា​រូបករណ៍​សម្រាប់​បណ្តុះ​បណ្តាល​ជំនាញ​វិជ្ជាជីវៈ​បច្ចេកទេសជូនយុវជន ១លាន៥សែននាក់។

បើតាមអតីតពលករខ្មែរ មកពីប្រទេស បានថ្លែងថា ជាក់ស្តែងស្ទើរគ្រប់ពលករខ្មែរមកពីប្រទេសថៃ ភាគ​ច្រើនគឺធ្វើការងារដោយកម្លាំង មានភាពលំបាកនឿយហត់ ដោយសារ​មិន​មាន​ចំណេះ​ជំនាញ​វិជ្ជា​ជីវៈ​ ហើយបណ្តាអតីតពលករទាំងនោះ បានថ្លែងអំណរគុណរាជរដ្ឋាភិបាល ដែលបានបង្កើត​កម្ម​វិធី​ផ្តល់អាហារូបករណ៍សម្រាប់បណ្តុះបណ្តាលជំនាញវិជ្ជាជីវៈបច្ចេកទេស ជូនយុវជន ១លាន៥​សែន​នាក់ ផ្តល់ការបណ្តុះបណ្តាលជំនាញវិជ្ជាជីវៈ ព្រមទាំងផ្តល់​កន្លែង​ស្នាក់​នៅ​ដោយ​មិន​មាន​គិតថ្លៃ ដើម្បីឲ្យគេងាយផ្លាស់នប្តូរឱកាសការងារថ្មីធ្វើនៅក្នុងស្រុកយើងវិញ។

សូមបញ្ជាក់ថា ក្រសួងការងារ និងបណ្តុះបណ្តាលវិជ្ជាជីវៈ មានសាលាបណ្តុះបណ្តាលបច្ចេកទេស និង​វិជ្ជាជីវៈ TVETនៅទូទាំងប្រទេស ប្រមាណ៣៨កន្លែង បានអនុវត្ត​កម្ម​វិធី​ផ្តល់​អាហា​រូបករណ៍​សម្រាប់​បណ្តុះ​បណ្តាលបច្ចេកទេស និងវិជ្ជាជីវៈ ដល់យុវជន មកពីគ្រួសារក្រីក្រ និងគ្រួសារ​ងាយ​រង​ហានិភ័យ ឬហៅ ថាកម្មវិធី TVET 1.5M មានប្រមាណ៩ជំនាញធំៗ ហើយ​បើ​តាម​អ្នក​នាំពាក្យ​ក្រសួងការងារ និងបណ្តុះបណ្តាលវិជ្ជាជីវៈ ក៏បានឲ្យដឹងដែរថា មកដល់ពេលនេះ មាន​អតីត​ពលករ​ខ្មែរមកពីប្រទេសថៃជាច្រើនបានចុះឈ្មោះរៀនជំនាញវិជ្ជាជីវៈ ហើយក៏មាន​មួយ​ចំនួន​ធំ​ទៀត​ដែរ គឺបានចុះឈ្មោះតាមប្រព័ន្ធអនឡាញរបស់ក្រសួង ដើម្បីស្វែងរក​ឱកាស​ការងារ​ថ្មី​ធ្វើ​ផ​ងដែរ។

គិតត្រឹមដំណាច់កក្កដាឆ្នាំ២០២៥ កម្មវិធី TVET 1.5M មានអ្នកស្នើចុះឈ្មោះចូលរៀនចំនួនជិត​១៤​ម៉ឺន​នាក់​ ហើយមានសិស្សកំពុងសិក្សានិងបានបញ្ចប់ សរុបជិត៩ម៉ឺននាក់៕ អត្ថបទ ស៊ុម សុខជា