កម្ពុជាជឿជាក់កិច្ចប្រជុំថ្នា RBCថ្ងៃនេះ នឹងទទួលបានលទ្ធផលល្អ រហូតដល់គោរពបាន នូវបទឈប់បាញ់ប្រកបដោយប្រសិទ្ធភាព

អ្នកនាំពាក្យក្រសួងការពារជាតិកម្ពុជា លោកជំទាវឧត្តមសេនីយ៍ឯក ម៉ាលី សុជាតា បានឲ្យដឹងថា នៅព្រឹកថ្ងៃទី២២ ខែសីហា ឆ្នាំ២០២៥នេះ ថ្នាក់ភូមិភាគីកម្ពុជា និងមានបើកកិច្ចប្រជុំវិសាមញ្ញ គណៈកម្មការព្រំដែនថ្នាក់យោធភូមិភាគកម្ពុជា-ថៃ(RBC) នៅខេត្តស្រះកែវប្រទេសថៃ ហើយលោកជំទាវរំពឹងថា កិច្ចប្រជុំនេះ នឹងទទួលបានផ្លែផ្កា​ល្អរហូតដល់អាចគោរពនូវ​កិច្ច​ព្រមព្រៀង បទឈប់បាញ់ប្រកបដោយប្រសិទ្ធភាព។

ក្នុងសន្និសីទសារព័ត៌មានប្រចាំថ្ងៃ ស្តីពីការអនុវត្តបទឈប់បាញ់ នាព្រឹកថ្ងៃទី២២ ខែសីហា ឆ្នាំ២០២៥នេះ លោកជំទាវ ម៉ាលី សុជាតា បានលើកឡើងថា ​កិច្ចប្រជុំជាលើកទី២ ថ្នាក់​បណ្តា​ភូមិភាគនេះ​គឺ ភាគីកម្ពុជាដឹកនាំដោយឧត្តមសេនីយ៍ឯក​ ឯក សំអូន មេបញ្ជាការយោធភូមិ​ភាគទី៥កម្ពុជា ​ខណៈភាគីថៃ​ដឹកនាំ​ដោយ​ឧត្តមសេនីយ៍ឯក អម្រឹតប៊ុន ស៊ីយ៉ា មេបញ្ជាការកងទ័ព​ភូមិភាគទី១ថៃ ​ហើយកិច្ចប្រជុំនេះនឹង​ពិភាក្សាគ្នាជាច្រើនលើកិច្ចព្រមព្រៀងទាំងឡាយ ដែលថ្នាក់​ដឹកនាំនៃប្រទេសទាំងពីរបានឯកភាពគ្នានៅប្រទេសម៉ាឡេស៊ី។

លោកជំទាវ ម៉ាលី សុជាតា «យើងសង្ឃឹមថា​ កិច្ចប្រជុំនេះ (RBC)នឹងទទួលបានលទ្ធផលជាវិជ្ជមាន បន្ថែមទៀត​ដែលអនុញ្ញាត​ឲ្យភាគីទាំងពីរជំរុញ​ការអនុវត្តបទឈប់បាញ់ ឲ្យមានប្រសិទ្ធភាព​ពេញលេញ ​និងនាំមកវិញនូវសន្តិភាព​ ស្ថេរភាព និងស្ថានភាពប្រក្រតីភាពវិលត្រឡប់មកវិញ»។

សូមបញ្ជាក់ថា កាលនៅថ្ងៃទី២១ ខែសីហា ឆ្នាំ២០២៥ កិច្ចប្រជុំលេខាធិការដ្ឋាន នៃ​គណៈកម្មាធិការ​ព្រំដែន​ថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥ របស់កម្ពុជា និងកងទ័ពភូមិ​ភាគទី១ របស់ថៃ បានដំណើរការកិច្ចប្រជុំរបស់ខ្លួន ដោយភាគីទាំងពីរបានឯកភាពដំណើរការ​កិច្ចប្រជុំមួយ​ផ្នែក​តាមប្រព័ន្ធបច្ចេកវិទ្យា​អនឡាញ រយៈពេលពេញ១ថ្ងៃ។

ជាលទ្ធផលកិច្ចប្រជុំក្រុមលេខាបានប្រព្រឹត្តទៅដោយ​មានការ​រីកចម្រើន​ជាវិជ្ជមានមួយចំនួន​គួរ​ឱ្យកត់សម្គាល់ ក្រោយពេលជួបប្រជុំពិភាក្សាគ្នា ​ដើម្បីត្រៀមសម្រាប់កិច្ចប្រជុំ វិសាមញ្ញរបស់​គណៈកម្មាធិការព្រំដែនថ្នាក់យោធភូមិភាគ កម្ពុជា-ថៃ (RBC) នៅថ្ងៃនេះ៕អត្ថបទបានចក់