គណៈកម្មាធិការអន្តរក្រសួងចុះពិនិត្យ និងវាយតម្លៃការស្ថាបនាផ្លូវក្រួសក្រហម១ខ្សែ ក្នុង​ស្រុកបាកាន ខេត្តពោធិ៍សាត់

ពោធិ៍សាត់៖ លោកជំទាវ ឯក សុគន្ធវារី អនុរដ្ឋលេខាធិការក្រសួងអភិវឌ្ឍន៍ជនបទ តំណាង​ឯកឧត្តម​ ឈឹម សៅគី រដ្ឋលេខាធិការប្រចាំការ និងជាអនុប្រធានគណៈកម្មាធិការលទ្ធកម្ម ​នា​ថ្ងៃ​ទី២៨ ខែសីហា ឆ្នាំ២០២៥ បានដឹកនាំគណៈកម្មាធិការអន្តរក្រសួង រួមមាន​ក្រសួង​អភិវឌ្ឍន៍​ជន​បទ និងក្រសួងក្រសួងសេដ្ឋកិច្ចនិងហិរញ្ញវត្ថុ ចុះត្រួតពិនិត្យ និងវាយតម្លៃ លើការងារ​ស្ថាបនា​ផ្លូវ​ក្រាល​ដី​ល្បាយក្រួសចំនួន១ខ្សែ ស្ថិតនៅភូមិអូរតាប៉ោង ទៅភូមិស្រះម្កាក់ ឃុំអូរតាប៉ោង ស្រុក​បាកាន ខេត្តពោធិ៍សាត់ ស្ថាបនាដោយអង្គភាពវិស្វកម្ម សម្តេចអគ្គមហាធម្មពោធិសាល ជា ស៊ីម នាយកដ្ឋានវិស្វកម្ម ក្រសួងការពាជាតិ (ឧត្តមសេនីយ៍ឯក ធន វិមានច័ន្ទ) ដោយ​ប្រើ​ប្រាស់​ថវិកា​របស់​រាជ​រដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ ។

លោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្តពោធិ៍សាត់ បានឲ្យដឹងថា ផ្លូវ១ខ្សែ​នេះ​ត្រូវ​បាន​បើក​ការដ្ឋានសាងសង់កាលពីថ្ងៃទី១៨ ខែកញ្ញា ឆ្នាំ២០២៤ ដោយផ្លូវនេះ​មាន​ប្រវែង​៧៣០០​ម៉ែត្រ ទទឹង៨ម៉ែត្រ សាងសង់លូប្រអប់មុខពីរចំនួន១កន្លែង លូប្រអប់មុខ​មួយ​ចំនួន​១​កន្លែង ​លូមូលមុខបីចំនួន១កន្លែង លូមូលមុខពីរចំនួន៤កន្លែង លូមូល មុខមួយចំនួន៦កន្លែង និ​ង​មាន​ដំឡើងស្លាកចរាចរណ៍ និងស្លាកឈ្មោះផ្លូវចំនួន២កន្លែងផងដែរ ។

ជាមួយគ្នានោះអាជ្ញាធរ និងប្រជាពលរដ្ឋឃុំអូរតាប៉ោង បានសម្ដែងនូវសេចក្ដីសាទរ ដោយ​ទទួល​បាន​ផ្លូវ​ថ្មីធំទូលាយ និងថ្លែងអំណរគុណជាពន់ពេកចំពោះរាជរដ្ឋាភិបាល ដែល​ជា​និច្ចការ​តែង​តែ​យក​ចិត្តទុកដាក់ពីសុខទុក្ខរបស់ប្រជាពលរដ្ឋ និងបាន​ដោះ​ស្រាយ​ការ​លំបាក​ឆ្លើយ​តប​ទៅ​នឹង​តម្រូវ​ការ​របស់ប្រជាពលរដ្ឋ បានគ្រប់កាលៈទេសៈ។ ដោយផ្លូវស្ថាបនាថ្មីនេះមានទទឹង៨ម៉ែត្រ បន្ថែម​លើផ្លូវលំចាស់ដែលមានទទឹងត្រឹមតែ៤ម៉ែត្រពិបាកធ្វើដំណើរ ចាប់​ពី​ចំនុច​ផ្លូវ​ជាតិ​លេខ​៥​ក្នុង​ ភូមិអូរតាប៉ោង ភ្ជាប់ទៅកាន់ភូមិជាច្រើនទៀតក្នុងឃុំអូរតាប៉ោង រហូតដល់ព្រំប្រទលឃុំមេទឹក ហើយផ្លូវនេះជាផ្លូវមានសារៈសំខាន់សម្រាប់ប្រជាពលរដ្ឋធ្វើដំណើរមកកាន់ទីរួមស្រុកបាកាន មក​មន្ទីរ​ពេទ្យ មកផ្សារ មកសាលារៀន ជាពិសេស​គឺ​ដឹក​ក​សិ​ផល​ដែល​ប្រជា​ពលរដ្ឋ​តាម​ភូមិ​ដាំ​ដុះ​ផលិត​បាន។

ឆ្លៀតក្នុងឱកាសនោះដែរ លោកជំទាវ ឯក សុគន្ធវារី រួមនិងគណៈកម្មាធិការអន្តរក្រសួង បានជួប​សំណេះ​សំ​ណាលជាមួយអាជ្ញាធរ និងប្រជាពលរដ្ឋឃុំអូរតាប៉ោង ដោយបានលើក​ឡើង​ថា​ក្នុង​នាម​ជា​សេនាធិការរបស់រាជរដ្ឋាភិបាលកម្ពុជា ក្រសួងអភិវឌ្ឍន៍ជនបទ បាននិងកំពុង​ជំរុញ​ការងារ​សា​ងសង់ ស្ដារឡើងវិញ កែលម្អ ពង្រីក ថែទាំ និងជួសជុលផ្លូវជនបទ ដើម្បី​បង្ក​ភាព​ងាយ​ស្រួល​ក្នុង​ការ​ធ្វើដំណើររបស់ប្រជាពលរដ្ឋ កាត់បន្ថយពេលវេលា និងកាត់បន្ថយ​ចំណាយ​លើ​ការ​ដឹក​ជញ្ជូន​កសិផល និងទំនិញផ្សេងៗនៅជនបទ។ដោយក្រសួង រួមនិងភាគីពាក់ព័ន្ធ កំពុងយកចិត្ត​ទុក​ដាក់ខ្ពស់លើការពង្រឹងសមត្ថភាពជំនាញក្នុងគោលដៅ បង្កើនគុណភាព និងធានាចីរភាព​ផ្លូវ​ជន​បទ ព្រោះនៅជនបទមានសារៈសំខាន់ ក្នុងការជំរុញផ្នែកសេដ្ឋកិច្ច និងសង្គមកិច្ច​នៅ​ជនប​ទ​ជា​ពិសេស​ការ​កាត់បន្ថយគម្លាតតំបន់ជនបទ និងទីក្រុងផងដែរ ។ លោកជំទាវ ឯក គន្ធវារី ក៏បានស្នើ​ដល់​អាជ្ញាធរមូលដ្ឋាននិងប្រជាពលរដ្ឋដែលជាអ្នកទទួលផល សូមចូលរួមក្នុងការថែទាំផ្លូវ និងលូ ឱ្យ​បានល្អ​ប្រសើរ ដើម្បីរក្សាគុណភាពផ្លូវអោយបានគង់វង្សយូរអង្វែង ហាមដឹក​ជញ្ជូន​ទំនិញ​ធន់​ធ្ងន់​លើសចំនួនកំណត់ដែលធ្វើឲ្យផ្លូវងាយរងការខូតខាត ហើយត្រូវចាត់ទុកថាផ្លូវនេះ ជារបស់​យើង​ទាំងអស់គ្នា៕