សមាគមទេសចរណ៍វៀតណាមប្តេជ្ញាបង្កើនកិច្ចសហការបង្កើនភ្ញៀវទេសចររវាងប្រទេសទាំងពីរ

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោក Nguyen Hong Hai ប្រធានសមាគមទេសចរណ៍វៀតណាម និងសហការី ចូលជួបសំដែងការគួរសម និងពិភាក្សាការងារអំពីគម្រោងកិច្ចសហប្រតិបត្តិថ្មីៗក្នុងវិស័យទេសចរណ៍ នៃប្រទេសទាំងពីរ នៅសណ្ឋាគារ Rex Hotel ទីក្រុងហូជីមិញ។

ក្នុងឱកាសនៃជំនួបដ៏មានអត្ថន័យ និងប្រកបដោយផ្លែផ្កានេះ ឯកឧត្តមរដ្ឋមន្ត្រី បានថ្លែងអំណរគុណដល់សមាគមទេសចរណ៍វៀតណាម និងសមាជិករបស់ខ្លួនដែលបានចូលរួមចំណែក យ៉ាងសកម្មក្នុងការនាំយកភ្ញៀវទេសចរវៀតណាម និងអន្តរជាតិមកទស្សនាកម្ពុជាជាមួយនឹងតួលេខដ៏ល្អជិត ១លាននាក់ ក្នុងរយៈពេល ៨ខែ ដើមឆ្នាំ២០២៥ នេះ។

ទន្ទឹមនឹងនេះ ឯកឧត្តមរដ្ឋមន្រ្តី បានទទួលស្តាប់នូវសំណូមពរនានារបស់សមាគម ព្រមទាំងបានស្វាគមន៍ចំពោះសំណើបង្កើនសហប្រតិបត្តិការទេសចរណ៍ថ្មីៗ បន្ថែមទៀត ដូចជាការរៀបចំដំណើរទស្សនកិច្ចឈ្វេងយល់ពីសក្តានុពលទេសចរណ៍កម្ពុជា (Famtrip) ដើម្បីពិភាក្សាជាមួយវិស័យឯកជនកម្ពុជាបង្កើតកញ្ជប់ទស្សនកិច្ចថ្មីមានការទាក់ទាញ និងប្រកួតប្រជែង ព្រមទាំង ការជួយផ្សព្វផ្សាយឱ្យបានទូលំទូលាយនូវសក្តានុពលទេសចរណ៍ កត្តាសុខសុវត្ថិភាព និងបដិសណ្ឋារកិច្ចដ៏កក់ក្តៅរបស់កម្ពុជាដល់ប្រជាជនវៀតណាម និងភ្ញៀវទេសចរអន្តរជាតិ៕