ថ្នាក់ដឹកនាំ និងមន្ត្រីជំនាញ ក្រសួងមុខងារសាធារណៈបង្ហាញស្មារតីទទួលខុសត្រូវខ្ពស់ និងត្រៀមលក្ខណៈរួចរាល់ធ្វើប្រតិបត្តិការជំរឿនមន្ត្រីជាក់ស្តែងសម្រេចលទ្ធផលជូនរាជរដ្ឋាភិបាល

ក្រោយទទួលបានសេចក្តីសម្រេចស្តីពីការតែងតាំងសមាសភាពក្រុមការងារ និងលេខាធិការដ្ឋាននៃគណៈកម្មការធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្តែង ក្រុមការងារ នៃគណៈកម្មការធ្វើជំរឿនមន្រ្តី ទាំងអស់បានជួបជុំគ្នា ដើម្បីពិនិត្យសមាសភាពក្រុមការងារ តួនាទី ភារកិច្ច ការទទួលខុសត្រូវទៅតាមផ្នែកនិងគោលដៅនីមួយៗ។

កិច្ចប្រជុំនាព្រឹកថ្ងៃទី៥ ខែកញ្ញា ឆ្នាំ២០២៥ ដែលដឹកនាំដោយ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ បានផ្សព្វផ្សាយ និងបញ្ជាក់ពីតួនាទី រួមជាមួយការពិភាក្សាផ្តល់ធាតុចូលបន្ថែម លើកិច្ចការងារបច្ចេកទេសត្រៀមអនុវត្តក្នុងដំណើរការយុទ្ធនាការធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្តែងទៅតាមគោលដៅទាំង៣។

តាមរយៈការចូលរួមមតិយោបល់ក្នុងកិច្ចប្រជុំ ថ្នាក់ដឹកនាំ និងមន្ត្រីនៃក្រសួងមុខងារសាធារណៈបានបង្ហាញឆន្ទៈ និងការតាំងចិត្ត រួមជាមួយក្នុងស្មារតីទទួលខុសត្រូវខ្ពស់ចំពោះការអនុវត្តការងារដ៏មានសារៈសំខាន់នាពេលខាងមុខ។ ទន្ទឹមនោះ ឯកឧត្តមរដ្ឋលេខាធិការប្រចាំការ ក៏បានសង្កត់ធ្ងន់ដែរថា ការងារនាពេលនេះ ជាការធ្វើបច្ចុប្បន្នភាពរចនាសម្ព័ន្ធក្រសួង ស្ថាប័នផង និងជាការជំរឿនមន្ត្រីជាក់ស្តែងតាមរចនាសម្ព័ន្ធនីមួយៗផង។ ឯកឧត្តមក៏បានរំលឹកប្រសាសន៍របស់ឯកឧត្តមឧបនាយករដ្ឋមន្ត្រី ហ៊ុន ម៉ានី ដែលធ្លាប់បានលើកឡើងថា “ការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងជាការរៀបចំទិន្នន័យដែលមានភាពច្បាស់លាស់ មានការឯកភាពគ្នា និងប្រើប្រាស់បានរួមគ្នា”។

គួរជម្រាបថា ការធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្តែងនៅតាមរចនាសម្ព័ន្ធនៃគ្រឹះស្ថានសិក្សាសាធារណៈ និង អង្គភាពសុខាភិបាលមូលដ្ឋាន នឹងចាប់ផ្តើមនៅរាជធានីភ្នំពេញ។ ដោយឡែក ការធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្តែងនៅតាមរចនាសម្ព័ន្ធក្រសួង ស្ថាប័ន នឹងចាប់ផ្តើមនៅក្រសួងមុខងារសាធារណៈ។