សហភាពសហព័ន្ធយុវជនកម្ពុជាខេត្តត្បូងឃ្មុំ កាន់បិណ្ឌវេនទី១ នៅវត្តតេជបារមីសិរីសុខារាម

ត្បូងឃ្មុំ៖ លោក ម៉ៅ ឌុង អភិបាលរងខេត្ត និងជាប្រធានសហភាពសហព័ន្ធយុវជនកម្ពុជា ខេត្តត្បូងឃ្មុំ (ស.ស.យ.ក) បានដឹកនាំ សមាជិក-សមាជិកា អញ្ជើញចូលរួមកាន់បិណ្ឌ និងរាប់បាត្រ វេនទី១ នៅវត្តតេជបារមីសិរីសុខារាម (ហៅវត្តតេជសុវណ្ណភូមិ) ស្ថិតនៅភូមិនិគមលើ ឃុំស្រឡប់ ស្រុកត្បូងឃ្មុំ ដើម្បីឧទិសកុសលផលបុណ្យជូនដល់វិញ្ញាណក្ខន្ធបុព្វការីជន និងវីរយុទ្ធជន ដែលពលីក្នុងបុព្វហេតុជាតិមាតុភូមិ។

ក្នុងឱកាសពិធីបុណ្យកាន់បិណ្ឌវេនទី១ លោក ម៉ៅ ឌុង ប្រធានសហភាពសហព័ន្ធយុវជនកម្ពុជា ខេត្តត្បូងឃ្មុំ បានផ្តួចផ្តើមធ្វើឡើង ក្នុងគោលបំណងសំខាន់ គឺដើម្បីឧទ្ទិសមហាកុសលជូនដល់បុព្វការីជន ញាតិកាទាំង ៧ សន្ដាន និងយុទ្ធជនដែលបានពលីជីវិត ក្នុងបុព្វហេតុជាតិមាតុភូមិ ពិសេសវីរកងទ័ព ដែលបានពលីជីវិត ក្នុងការការពារទឹកដីពីការឈ្លានពានរបស់កងទ័ពថៃ មកលើកម្ពុជា ក៏ដើម្បីជាការតបស្នងសងគុណ ដល់ញាតិសណ្ដាន និងបុព្វបុរសទាំងនេះ ដែលបានទទួលមរណកាលទៅកាន់លោកខាងមុខ សូមបានទៅកាន់ទីបុរមសុខ។

បន្ថែមលើកនេះ ក៏ដើម្បីបញ្ជ្រាបការផ្សព្វផ្សាយ លើកកម្ពស់ពីគុណតម្លៃ វប្បធម៌ អរិយធម៌ ទំនៀមទម្លាប់ ប្រពៃណីដ៏ល្អផូរផង់របស់ខ្មែរយើង ឱ្យដល់គ្រប់ស្រទាប់មហាជន ពិសេសយុវជនជំនាន់ក្រោយ ចងចាំជានិច្ចទុកក្នុងក្រអៅបេះដូង និងចូលរួមថែរក្សាការពារ ឲ្យបានគង់វង្សយូរអង្វែងរៀងទៅ៕