ក្រុមអ្នកផលិតផលិតផលខ្មែរ បន្តអំពាវនាវពលរដ្ឋគាំទ្រ​ផលិតផល​ក្នុង​ស្រុក​ដើម្បី​កំណើន​សេដ្ឋកិច្ច​ជាតិ

ក្រុម​អាជីវករដែលជាអ្នកផលិតផលិតផលខ្មែរ បានបន្តអំពាវនាវប្រជាពលរដ្ឋខ្មែរទាំងអស់ ចូល​រួម​គាំទ្រ​ផលិត​ផលក្នុងស្រុកឱ្យកាន់តែច្រើនឡើងបន្ថែមទៀត ដើម្បីជួយលើក​កម្ពស់​ផលិត​ផល​ក្នុងស្រុ​ក​ផង និងបើកឱកាសទីផ្សារថ្មីៗសម្រាប់ផលិតផលក្នុងស្រុក ទាំងនៅក្នុងតំបន់ និង​នៅ​ក្រៅ​តំ​បន់ផងដែរ។

លោកស្រី ចេន សុភាព ស្ថាបនិកនៃសហគ្រាសកីតម្បាញខ្មែរ នៅក្នុង​បទ​សម្ភាសន៍​ជា​មួយ​ព័ត៌មាន ប៊ីធីវី នៅព្រឹកថ្ងៃទី១១ ខែកញ្ញានេះ បានឱ្យដឹងថា ពិតជាសប្បាយរីករាយណាស់ នៅ​ពេល​ដែល​រាជរដ្ឋាភិបាលកម្ពុជាតែងតែគិតគូរ និងយកចិត្តទុកដាក់ជាប់ជានិច្ច ក្នុងការជំរុញ​ និង​ផ្សព្វ​ផ្សាយ​អំពីផលិតផលក្នុងស្រុក ដែលរហូតមកដល់ពេលនេះ បានកត់សម្គាល់ឃើញថា សន្ទុះ​នៃ​ការ​គាំទ្រ​ពីសំណាក់អតិថិជន ក៏មានការកើនឡើងដូចគ្នា។

លោកស្រី បានបន្ថែមថា ពិតជារំភើប និងសប្បាយចិត្តណាស់ នៅពេលដែល​ផលិត​ផល​ជាតិ​ជា​ច្រើន មានការគាំទ្រជាហូហែរបែបនេះ និងបានសំណូមពរបន្ថែមថា សូមឲ្យប្រជា​ពលរដ្ឋ​ខ្មែរទាំ​ង​អស់​ បន្តជួយគាំទ្រផលិតផលក្នុងស្រុកឱ្យកាន់តែច្រើនថែមទៀត ដើម្បីជាកម្លាំងចិត្តដល់ផលិតករ និង​ជួយលើកស្ទួយកុំឲ្យប្រជាជនចំណាកស្រុកជាដើម។

ក្រុម​អាជីវករជាច្រើននាក់ផ្សេងទៀត បានលើកឡើងស្រដៀងគ្នា ដើម្បីជាការឆ្លើយតប និង​អរគុណ​ជូន​ចំពោះអ្នកគាំទ្រទាំងឡាយ ក៏ដូចជាការគិតគូរ​យ៉ាង​ខ្ពស់​ពី​សំណាក់​រាជ​រដ្ឋាភិបាល​កម្ពុជា​ នឹងខិតខំព្យាយាមយ៉ាងណា ដើម្បីផលិតផលិតផលដែលមានគុណភាព ស្តង់ដារត្រឹមត្រូវ និង​មានអនាម័យខ្ពស់ជូនអ្នកប្រើប្រាស់។ ពួកគាត់បានអំពាវនាវបន្ថែមទៀត ដល់​សាធារណ​ជន​ទាំង​អស់​ទូទាំងប្រទេស ងាកមកគាំទ្រ និងប្រើប្រាស់​ផលិត​ផល​ខ្មែរ​ឲ្យ​កាន់​តែ​ច្រើន​ឡើង​បន្ថែម​ទៀត ដើម្បីលើកស្ទួយសេដ្ឋកិច្ចជាតិ ក៏ដូចជាផ្តល់ឱកាសការងារដល់ប្រជាពលរដ្ឋក្នុងស្រុក។

សូម​ជម្រាបថា ផលិតផលខ្មែរជាច្រើនបានកំពុងដាក់តាំងបង្ហាញលក់ក្នុងពិធី “ការ​តាំងពិរណ៍​ផលិត​ផល​ខ្មែរ ឆ្នាំ២០២៥ ក្រោមប្រធានបទ៖ ពង្រឹង និងពង្រីកសមត្ថភាពផលិតក្នុងស្រុក” ដែល​រៀបចំឡើងរយៈពេល ៣ថ្ងៃ គិតចាប់ពីថ្ងៃទី១១ ដល់១៣ ខែកញ្ញា ឆ្នាំ២០២៥ នៅ​អគារ​មជ្ឈ​មណ្ឌល​ពិព័រណ៍កោះពេជ្រ ដោយមានការចូលរួមយ៉ាងច្រើនកុះករពីសំណាក់សហគ្រាស ក្នុង​ស្រុក សរុបចំនួនប្រមាណ៣០០ និងការតាំងបង្ហាញផលិតផលក្នុងស្រុកសរុបជាង ១០០ប្រភេទ មក​ពី​តាម​រាជធានី-ខេត្ត ទាំង ២៥ នៅទូទាំងប្រទេស៕ អត្ថបទ៖ ឈិត បូរ៉ាវី