កម្ពុជា-បារាំង បានឯកភាព​រៀបចំ​សម័យ​ប្រជុំលើកទី៣នៃ​កិច្ច​ពិគ្រោះ​យោបល់​​នយោបាយ​ទ្វេភាគី​នាចុងឆ្នាំ២០២៥នេះ នៅរាជធានីភ្នំពេញ

ភ្នំពេញ៖ នៅថ្ងៃទី១០ ខែកញ្ញា ឆ្នាំ ២០២៥ – ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រី ក្រសួង​ការបរទេស និងសហប្រតិបត្តិការអន្តរជាតិ បានទទួលជំនួបសម្តែងការគួរសមរបស់ ឯកឧត្តម Oliver RICHARD ឯកអគ្គរដ្ឋទូត​វិសាមញ្ញ និង​ពេញ​សមត្ថភាព​នៃ​សាធារណ​រដ្ឋ​បារាំង​ប្រចាំ​ព្រះរាជាណាចក្រកម្ពុជា។

ជាកិច្ចចាប់ផ្តើម ឯកឧត្តមឧបនាយករដ្ឋមន្ត្រី ប្រាក់ សុខុន បានសម្តែងនូវ​ការ​ស្វាគមន៍​យ៉ាង​កក់​ក្តៅ និងអបអរសាទរចំពោះឯកឧត្តម Oliver RICHARD ដែលត្រូវបានតែងតាំងជាឯកអគ្គរដ្ឋទូតថ្មី និង​បានបង្ហាញការពេញចិត្តយ៉ាងខ្លាំងចំពោះមិត្តភាពយូរអង្វែងរវាងកម្ពុជា និងបារាំង ដែល​ភាព​ជាដៃ​គូរ​នេះឈរលើមូលដ្ឋាន ប្រវត្តិសាស្ត្ររួម និងការជឿជាក់គ្នាទៅវិញទៅមក។ ឯកឧត្តម​ឧប​នាយក​រដ្ឋ​មន្ត្រី បានបញ្ជាក់អះអាងនូវការ ប្តេជ្ញាចិត្តមុតមាំរបស់ក្រសួងការបរទេស និងសហ​ប្រតិបត្តិការ​អន្តរជាតិ ក្នុងការសហការយ៉ាងជិតស្និទ្ធជាមួយ ឯកឧត្តមឯកអគ្គរដ្ឋទូត ដើម្បី​បន្ត​ពង្រឹង​ និងពង្រីកសហប្រតិបត្តិការទ្វេភាគីបន្ថែមទៀត ដើម្បីបន្តសមិទ្ធផល របស់​ឯកឧត្តម​ឯក​អគ្គ​រដ្ឋ​ទូត​ចប់​អាណត្តិមុនៗ។

ក្នុងឱកាសជំនួបសម្តែងការគួរសមនេះ ភាគីទាំងពីរបាន​លើក​ឡើង​អំពី​វឌ្ឍន​ភាព​គួរ​ឱ្យ​កត់​សម្គាល់​នៃ​កិច្ច​សន្ទនាកម្រិតខ្ពស់ជាពិសេសជំនួបពិភាក្សាប្រកបដោយផ្លែផ្ការវាងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម អេម៉ានុយអែល ម៉ាក្រុង ប្រធា​នាធិបតីនៃសាធារណរដ្ឋ បារាំង ក្នុងឱកាស​សន្និសីទ​អង្គការ​សហ​ប្រជាជាតិ​លើក​ទី៣​ស្តី​ពី​មហាសមុទ្រ នៅទីក្រុងនីស កាលពីខែមិថុនា កន្លងមក។

ជំនួបផ្លាស់ប្តូរយោបល់នេះបានបញ្ជាក់ពីការប្តេជ្ញាចិត្តយ៉ាងមុតមាំរបស់កម្ពុជាក្នុងការចុះហត្ថលេខា និង​ការផ្តល់សច្ចាប័នដល់កិច្ចព្រមព្រៀងស្តីពីការអភិរក្ស និងការប្រើ​ប្រាស់​ជីវៈ​ចម្រុះ​សមុទ្រ​ប្រកប​​ដោយ ចីរភាព នៅក្រៅដែន​យុត្ថាធិការ​ជាតិ​ក្រោម​អនុសញ្ញា​សហ​ប្រជាជាតិ​ស្តីពី​ច្បាប់​សមុទ្រ ​(BBNJ) និងការគាំទ្រ សន្ធិសញ្ញា – Nice Wake-Up Call for an Ambitious Plastics Treaty»។ ភាគីទាំងពីរក៏បានបង្ហាញពីការ ពេញចិត្ត​យ៉ាង​ខ្លាំង​ចំពោះ​វឌ្ឍនភាព​សម្រេច​បាន​ក្នុង​ការ​រៀបចំ​ផែនទីបង្ហាញផ្លូវ ដើម្បីលើកកម្ពស់ទំនាក់ទំនងទ្វេភាគីទៅជាដៃគូយុទ្ធសាស្ត្រ និង​បាន​ឯកភាព​រៀបចំសម័យប្រជុំលើកទី៣ នៃកិច្ចពិគ្រោះយោបល់នយោបាយទ្វេភាគីកម្ពុជា-បារាំង ចុង​ឆ្នាំ២០២៥ នៅរាជធានីភ្នំពេញ។

ចំពោះសហប្រតិបត្តិការសេដ្ឋកិច្ច ឯកឧត្តមឧបនាយករដ្ឋមន្ត្រី ប្រាក់ សុខុន បានថ្លែងអំណរគុណ ចំពោះ​ការបន្តគាំទ្ររបស់បារាំងដល់ការអភិវឌ្ឍសេដ្ឋកិច្ចសង្គមកម្ពុជា ជាពិសេស​តាម​រយៈ​ទីភ្នាក់​ងារ​អភិវឌ្ឍន៍ បារាំង(AFD)។

ឯកឧត្តម​ឧបនាយករដ្ឋមន្ត្រី បានសម្តែងការ​ស្វាគមន៍​ចំពោះ​ការ​អញ្ជើញ​មក​ទស្សន​កិច្ច​នៅ​កម្ពុជា​របស់​គណៈប្រតិភូធុរជនបារាំង MEDEF International និងបានកោតសរសើរចំពោះតួនាទីយ៉ាង សកម្មរបស់ MEDEF ក្នុងការចូលរួមជាមួយសហគ្រាសបារាំងនៅកម្ពុជា និងលើក​ទឹក​ចិត្ត​ឱ្យ​មាន​ការ​វិនិយោគ បន្ថែមនៅវិស័យអាទិភាពដូចជា ថាមពលកកើតឡើងវិញ ហេដ្ឋារចនា​សម្ព័ន្ធ​ប្រកប​ដោយចី​រភាព កសិកម្ម ទេសចរណ៍ អាកាសចរណ៍ និងសេដ្ឋកិច្ចឌីជីថល។

ភាគីទាំងពីរ ក៏បានពិភាក្សាអំពីសហប្រតិបត្តិការទ្វេភាគីលើគ្រប់វិស័យរួមមាន វប្បធម៌ និងបេតិក​ភណ្ឌ សុខាភិបាល ការពារជាតិ និងសហប្រតិបត្តិការបរិស្ថាន និងអាកាសធាតុ។ ឯកឧត្តម​ឧប​នាយករដ្ឋ​មន្ត្រី ប្រាក់ សុខុន ក៏បានជម្រាបជូនឯកឧត្តមឯកអគ្គរដ្ឋទូត នូវវឌ្ឍនភាព​ទាក់​ទង​នឹង​បញ្ហា​ព្រំដែន​រវាងកម្ពុជា និងថៃ៕