ឧបនាយករដ្ឋមន្ដ្រី នេត សាវឿន លើកទឹកចិត្តមូលនិធិ GXរបស់​ចិន​បន្ដ​សហការ​ជាមួយ​ក្រសួង​សុខាភិបាល​កម្ពុជា

ឯកឧត្តមសន្ដិបណ្ឌិត នេត សាវឿន ឧបនាយករដ្ឋមន្ដ្រី ក្នុងនាមសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានលើកទឹកចិត្តដល់មូលនិធិ GX Foundation របស់​សាធារណ​រដ្ឋ​ប្រជាមានិតចិន បន្ដសហការជាមួយក្រសួងសុខាភិបាលក ដើម្បីគាំទ្រដល់​បេសកកម្ម​វិស័យសុខាភិបាលនៅកម្ពុជា។

ក្នុងជំនួបសម្ដែងការគួរសម និងពិភាក្សាការងារជាមួយលោក LEUNG Chun Ying អគ្គ​នាយក​មូល​និធិ​GX Foundation និងជាអនុប្រធានគណៈកម្មាធិការជាតិ នៃសន្និសីទ​ពិគ្រោះ​យោបល់​នយោបាយប្រ​ជាជនចិន, ឧបនាយករដ្ឋមន្ដ្រី នេត សាវឿន បានគូសបញ្ជាក់ថា រាជរដ្ឋាភិបាល​កម្ពុជា នីតិកាលទី៧ បានកំណត់យកវិស័យសុខាភិបាល និងវិស័យអប់រំ ជាអាទិភាព ហើយ​ឯកឧត្តម​បាន​ថ្លែងអំណរគុណចំពោះសកម្មភាពជំនួយក្នុងវិស័យសុខាភិបាលតាំងពីឆ្នាំ២០១៨ (ជំនួយលើការព្យាបាលជំងឺភ្នែកឡើងបាយ និងជំងឺគ្រុនឈាម) ក្នុងនោះ បានជួយពិនិត្យ និង​ព្យាបាលជូនពលរដ្ឋកម្ពុជាជាង២ម៉ឺននាក់ នៅខេត្តកំពង់ចាម, កំពង់ស្ពឺ និងខេត្តព្រៃវែង ហើយ​មូល​និធិ​ក៏បានផ្ដល់ជំនួយជាមធ្យោបាយរថយន្ដសង្គ្រោះបន្ទាន់ សម្ភារៈពេទ្យ និងថ្នាំពេទ្យផងដែរ។

ឯកឧត្តមសន្ដិបណ្ឌិត នេត សាវឿន បានលើកឡើងទៀតថា ការផ្ដល់​អាទិភាព​លើ​វិស័យ​សុខាភិបាល​នៅក​ម្ពុជា ធ្វើឡើងតាមរយៈការពង្រឹងមណ្ឌលសុខភាពនៅតាមមូលដ្ឋាន, ពង្រឹង​ពេទ្យ​បង្អែកតាមស្រុក និងបង្កើនសមត្ថភាពសង្គ្រោះព្យាបាលនៅតាមមន្ទីរពេទ្យខេត្តជាដើម។

ថ្លែង​នៅ​ក្នុងជំនួបនោះដែរ លោក LEUNG Chun Ying បានថ្លែងអំណរគុណឧបនាយករដ្ឋមន្ដ្រី នេត សាវឿន ដែលបានផ្ដល់កិត្តិយស និងការអនុញ្ញាតឲ្យលោកបានចូលជួបសម្ដែងការគួរសម ព្រម​ទាំង​បាន​បង្ហាញ​នូវក្ដីរីករាយ​ចំពោះ​កិច្ច​សហប្រតិបត្តិការ​ជាមួយ​កម្ពុជា។ លោក​បាន​គូស​បញ្ជាក់​ថា ​GX ធ្វើការជាមួយប្រទេសចំនួន៩ ហើយសម្រាប់កម្ពុជានេះជាលើកទី១៥ហើយ ដែល​លោក​បាន​អញ្ជើញមកដល់។ អគ្គនាយកមូលនិធិរូបនេះ បានលើកឡើងថា ការបំពេញបេសក​កម្ម​ការងារ​នៅ​ប្រទេសកម្ពុជា គឺមូលនិធិបានជួយដល់ការព្យាបាលវះកាត់ផ្នែកជំងឺភ្នែកឡើងបាយ និង​គ្រុន​ឈាម​ជាដើម។

តាមរយៈការជួយរួមចំណែកនេះលោកសង្ឃឹមថា នាពេលខាងមុខ កម្ពុជា​នឹង​លែង​មាន​ជំងឺ​ភ្នែក​ឡើង​បាយ ដែលបណ្ដាលឲ្យមានពិការភាពភ្នែកបន្ដទៅមុខទៀត។ មួយវិញទៀត មូលនិធិ ក៏បាន​យក​ចិត្ត​ទុកដាក់ និងសង្កត់ធ្ងន់ទៅលើការចូលរួមប្រយុទ្ធប្រឆាំងជំងឺគ្រុនឈាមផងដែរ ដោយ​ក្នុង​នោះ​មូល​និធិបានជួយសម្ភារៈជាច្រើនដើម្បីការងារប្រយុទ្ធប្រឆាំងជំងឺគ្រុនឈាម។ ក្នុង​នោះ​បាន​សង្កេត​ឃើញ​ថា ជំងឺនេះបានគំរាមកំហែងដល់អាយុជីវិតប្រជាពលរដ្ឋជាច្រើនទាំងមនុស្សធំ និង​កុមារ ដែលមូល​និធិនឹង​បន្ដជួយក​ម្ពុជា​ធ្វើ​យ៉ាង​ណា​ពង្រឹង​សមត្ថភាព​ឲ្យ​បាន​គ្រប់​គ្រាន់​ក្នុង​ការ​ទប់​ស្កាត់​ជំងឺ​គ្រុនឈាមនេះ។ លោកបានបន្ថែមទៀតថា នៅក្នុងពេលឆាប់ៗនេះ មូលនិធិនឹង​អញ្ជើញ​រដ្ឋមន្ត្រី​ក្រសួង​សុខាភិបាលកម្ពុជា ដើម្បីទស្សនកិច្ចនៅទីក្រុងហុងកុងនាពេលខាងមុខ ដើម្បី​ដក​បទ​ពិសោធ​លើការងារគ្រប់គ្រងមន្ទីរពេទ្យផងដែរ៕ អត្ថបទ៖ បាន ចក់