ឯកឧត្តម ហ៊ុន ម៉ានី អញ្ជើញដាក់វេនកាន់បិណ្ឌទី៩ នៅវត្តទួលអណ្តែត ខេត្តព្រះវិហារ

ព្រះវិហារ៖ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងាសាធារណៈ និង​ជា​ប្រធាន​សហភាពសហព័ន្ធយុវជនកម្ពុជា (ស.ស.យ.ក)​ នៅថ្ងៃទី១៦ ខែកញ្ញា ឆ្នាំ២០២៥នេះ បាន​អញ្ជើញ​ដាក់វេនកាន់បិណ្ឌទី៩ នៅក្នុងវត្តទួលអណ្តែត ស្រុកជាំក្សាន្ត ខេត្តព្រះវិហារ រួម​ទាំង​ប្រគេ​ន​ទេយ្យវត្ថុ ចំពោះព្រះសង្ឃចំនួន ២៦វត្ត នៅក្នុងស្រុកជាំក្សាន្តទាំងមូល ដែល​ជា​តំបន់​ជិត​ព្រំដែន​កម្ពុជា​-ថៃ និងក្បែរតំបន់មានជម្លោះព្រំដែន ។

ការធ្វើពិធីដាក់វេនកាន់បិណ្ឌនេះ គឺបានបង្ហាញពីទឹកចិត្តដ៏ល្អផូរផង់ នៃប្រជាជាតិខ្មែរ ដែល​កាន់​ព្រះពុទ្ធ​សាសនា ហើយបានអនុវត្តយ៉ាងខ្ជាប់ខ្ជួន ក្នុងការប្រារព្ធពិធីបុណ្យរបស់សាសនា និង​បាន​ឧទ្ទិស​បុណ្យកុសលដល់វិញ្ញាណក្ខន្ធ របស់បុព្វការីជន សាច់ញាតិ និងបានជាបុណ្យកុសល និង​អំពើ​ល្អ​ទៅ​កាន់លោកខាងមុខ ។

ក្នុងពិធីកាន់បិណ្ឌវេនទី៩នេះ ឯកឧត្តមឧបនាយករដ្ឋមន្ត្រី ដែលមាន​ការ​ចូល​រួម​ពី​ប្រធាន​ក្រុម​ប្រឹក្សា​ខេត្ត​ព្រះវិហារ ឯកឧត្តម គីម រិទ្ធី អភិបាលខេត្តព្រះវិហារ និងមន្ត្រីរាជការ សមាជិក​សហភាព​សហព័ន្ធ​យុវជនកម្ពុជា ប្រជាពុទ្ធបរិស័ទ បាននិមន្តព្រះសង្ឃសមាទានសីល បន្ទាប់​មក​មាន​ពិធី​រាប់​បាត្រព្រះសង្ឃ ។ ក្រោយកម្មវិធីនេះ មានពិធីវេរចង្ហាន់ និងទេយ្យវត្ថុ​ប្រគេន​ដល់​ព្រះ​សង្ឃ​​ ហើយព្រះសង្ឃបានធ្វើចម្រើនព្រះបរិត្ត និងបង្សុកូល។

ជាកិច្ច​បញ្ចប់ ឯកឧត្តមឧបនាយករដ្ឋមន្ត្រី ហ៊ុន ម៉ានី បានឧទ្ទិសបុណ្យកុសល ជូនវិញ្ញាណ​ក្ខន្ធ​អ្នក​ឧកញ៉ា​មហាភក្តីសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក ជាជីតា និងជីដូន​បង្កើត​របស់​ឯកឧត្តម​ខាងឪពុក គឺបិតាមាតាបង្កើតសម្ដេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា​, វិញ្ញាណក្ខន្ធមហាឧបាសក លីន គ្រី និងអ្នកឧកញ៉ា​ព្រឹទ្ធ​មហា​ឧបាសិកា​ធម្ម​ញ្ញាណ​វិវឌ្ឍនា​ ប៊ុន ស៊ាងលី ជីតា ជីដូនបង្កើតរបស់ឯកឧត្តមខាងម្ដាយ គឺជាបិតាមាតា​បង្កើត​សម្ដេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងវិញ្ញាណក្ខន្ធកុមារា ហ៊ុន កំសត់ ត្រូវ​ជា​បងប្រុសបង្កើតរបស់ឯកឧត្តមឧបនាយករដ្ឋមន្ត្រី រួមទាំងញាតិការទាំង៧សណ្ដាន និង​វិញ្ញាណ​ក្ខន្ធ​វីរកងទ័ពដែលបានពលី នៅក្នុងបុព្វហេតុការពារបូរណភាពទឹកដី ។

ព្រះសង្ឃ​នៃ​វត្តអារាមនានា ក្នុងស្រុកជាំក្សាន្ត ដែលទទួលទេយ្យវត្ថុ ពីឯកឧត្តមឧបនាយករដ្ឋមន្ត្រី មាន​សង្ឃដីកាថា បរិក្ខាទាំងអស់នេះ គឺពិតជាបានឆ្លើយតប ទៅនឹង​តម្រូវ​ការ​ចាំបាច់​របស់​ព្រះ​សង្ឃ ​ក្នុងឱកាសបុណ្យភ្ជុំបិណ្ឌ ហើយព្រះសង្ឃមួយចំនួន ក្នុងស្រុកជាំក្សាន្តនេះ ក៏បានភៀសសឹក ក្នុង​ជម្លោះព្រំដែនរវាងកងទ័ពកម្ពុជា-ថៃ កាលពីខែកក្កដា ឆ្នាំ២០២៥កន្លងទៅផងដែរ ។

ជាមួយនេះ ព្រះសង្ឃមានសង្ឃដីកាបន្តថា សម្រាប់ទាននេះទៀតសោត ក៏នឹង​បាន​ដល់​ញាតិ​ការ​របស់​ឯកឧត្តម រួមទាំងថ្នាក់ដឹកនាំខេត្ត ក្រុមការងារ និងប្រជាពុទ្ធបរិស័ទ ។ ហើយមួយទៀត ក៏ជា​ចំណែក​បុណ្យ ដើម្បីឧទ្ទិសជូនវិញ្ញាណក្ខន្ធរបស់វីរជនពលីរបស់យើង ក្នុងការជម្លោះព្រំដែន និង​បុព្វ​ហេតុ​ការពារទឹកដី ។

ព្រះសង្ឃ និងពុទ្ធបរិស័ទ ក៏បានថ្លែងអំណរគុណ ដល់រាជរដ្ឋាភិបាលកម្ពុជា ដែលបាន​ខិត​ខំ​ប្រឹង​ប្រែង ​ក្នុងការបញ្ចប់ជម្លោះព្រំដែនកម្ពុជា-ថៃ ហើយសង្ឃឹមជឿជាក់ថា រាជរដ្ឋាភិបាលនឹងស្ដារ និង​ពង្រឹង​សន្តិភាពកម្ពុជាឡើងវិញ ហើយស្ថិតស្ថេរជានិរន្ត។

សម្រាប់វត្តចំនួន ២៦ ដែលនៅក្នុងតំបន់​ដែល​ប៉ះពាល់​ដោយ​ស្ថាន​ការ​ព្រំដែន​ក្នុង​ខេត្ត​ព្រះវិហារ​ក្នុង​នោះ​ក៏​មានវត្តកែវសិក្ខាគិរីស្វារៈផងដែរ ។ កម្មវិធីនេះជាការផ្តួចផ្តើមគំនិតរួមគ្នា របស់ក្រុម​បាល់​ទាត់ ​ស.ស.យ.ក អលស្ការ ក្រុមបាល់ទាត់សម្ព័ន្ធយុវជនស្រលាញ់សន្តិភាព ក្រុមបាល់ទាត់ Vlogger All Star ក្រុមបាល់ទាត់សហព័ន្ធយុវជនបូជាការពារយុត្តិធម៌ ក្រុមបាល់​ទាត់​ពិធី​ករ​កីឡា​កម្ពុជា​ក្រុមបា​ល់ទាត់ផ្ការីកគ្រប់រដូវ ក្រុមបាល់ទាត់តារាកម្ពុជា និងក្រុមបាល់ទាត់​នៃ​សមាគម​គ្រូ​ពេទ្យ​ស្ម័គ្រ​ចិត្ត​សម្តេចតេជោ (TYDA) ៕ អត្ថបទ៖ ​បាន សុខរិទ្ធិ