វិនិយោគគិនជប៉ុន និងកម្ពុជា សហការគ្នា​វិនិយោគលើខុនដូរទំនើប និងសណ្ឋាគារលំដាប់ផ្កាយតម្លៃជាង ១០០ លានដុល្លារ នៅសង្កាត់បឹងកេងកងទី១

វិនិយោគគិនជប៉ុន សហការជាមួយវិនិយោគគិនកម្ពុជា បានបោះទុនវិនិយោគទឹកប្រាក់ប្រមាណជាង ១០០លានដុល្លារអាម៉េរិក ដើម្បីសាងសង់ខុនដូរស្នាក់នៅ និងសណ្ឋាគារលំដាប់ផ្កាយ មានកម្ពស់ ៦៥ជាន់ “G.A.T.O TOWER” (ជី.អេ.ធី.អូ ថាវវ័រ) ដែលមានទីតាំងស្ថិតក្នុងសង្កាត់បឹងកេងកងទី១ កណ្តាលរាជធានីភ្នំពេ។

នៅក្នុងកម្មវិធីពិធីសន្និសីទសារព័ត៌មានស្តីពី គម្រោងអភិវឌ្ឍន៍អគារស្នាក់នៅកម្ពស់ ៦៥ជាន់ G.A.T.O TOWER លោក Nagato Daiko (ណាហ្គាតុ ដៃកុ) ដែលជាវិនិយោគិនជប៉ុន និងជាប្រធានក្រុមប្រឹក្សានៃក្រុមហ៊ុនអភិវឌ្ឍន៍ MIRAKU CAPITAL & DEVELOPMENT CO., LTD (មីរ៉ាគុ ឃែភីថល អេន ឌីវែលឡុបមិន) មានប្រសាសន៍ថា ដោយមើលឃើញអំពីសក្តានុពលរបស់ប្រទេសកម្ពុជា ទើបក្រុមហ៊ុន MIRAKU បានសម្រេចអភិវឌ្ឍន៍គម្រោង “G.A.T.O TOWER” ដែលមានកម្ពស់រហូតដល់ទៅ ៦៥ជាន់ សម្រាប់ជាអគារខុនដូរស្នាក់នៅដោយរួមបញ្ចូលទាំងសណ្ឋាគារលំដាប់ផ្កាយផងដែរ។

លោក ញឹម រាសី និងលោកស្រី នៅ សុគន្ឋារី ជាដៃគូរវិនិយោគគិនក្នុងស្រុក និងជាក្រុមប្រឹក្សាភិបាលនៃក្រុមហ៊ុនអភិវឌ្ឍន៍ MIRAKU បានឱ្យដឹងថា គម្រោង “G.A.T.O TOWER” នឹងសាងសង់នៅលើផ្លូវ ៣៣៤ កៀកនឹងមហាវិថីព្រះនរោត្តម ក្នុងសង្កាត់បឹងកេងកងទី១ ដោយមានផែនការចាប់ផ្តើមសាងសង់នៅចុងត្រីមាសទី១ នៃឆ្នាំ២០២៦។ ខណៈពេលនេះក្រុមហ៊ុនស្ថាបត្យករជប៉ុនដែលល្បីឈ្មោះជាងគេនៅប្រទេសជប៉ុន គឺក្រុមហ៊ុន SHIN TAKAMATSU ARCHITECT & ASSOCIATE (ហ្ស៊ីន តាកាម៉ាត្សូ អាឈីតិច អែន អាសូស៊ីអែត) កំពុងធ្វើការសិក្សាលម្អិតដើម្បីនាំយកមកនូវការរចនាដែលល្អបំផុតសំរបទៅតាមរបថរស់នៅថ្មីក្នុងប្រទេសកម្ពុជា។ គម្រោង G.A.T.O TOWER គ្រោងនឹងបញ្ចប់ការសាងសង់ក្នុងឆ្នាំ២០៣០។

សូមជម្រាបថា G.A.T.O TOWER ត្រូវបានរចនាឡើងដោយរួមបញ្ចូលបរិក្ខារពិសេសៗដូចជា កន្លែងទទួលភ្ញៀវដ៏ស្អាតប្រណិតរួមដោយធម្មជាតិ សួនលើអាកាស កន្លែងក្មេងលេង កន្លែងហាត់ប្រាណ ស្ទីម និងសូណា Private Lounge (ប្រាយវ៉េត ឡោន) ហាងកាហ្វេ និងកន្លែងអង្គុយធ្វើការ។ ក្រៅពីសណ្ឋាគារលំដាប់ផ្តាយ នៅផ្នែកជាន់ខាងលើនៃអគារក៏មានខុនដូរសម្រាប់ស្នាក់នៅ ហើយនៅជាន់ទី៦០ដល់ ៦៤ គឺត្រូវបានរចនាសម្រាប់ជា Penthouse (ផែនហៅស៍) ដែលមានលក្ខណៈឯកជន និងប្រណិតភាពបំផុត។ ជាពិសេសជាងនេះទៀត G.A.TO TOWER នឹងមានស្កាយបារ៍ និងអាងហែលទឹកដែលស្ថិតនៅលើជាន់ខ្ពស់បំផុតផងដែរ ដែលអាចមើលឃើញទេសភាពយ៉ាងស្អាតនៃទីក្រុងភ្នំពេញ៕