កម្មករកម្មការិនី អរគុណរាជរដ្ឋាភិបាលចំពោះការបន្តផ្តល់រថយន្តទៅស្រុកកំណើត ដោយមិនគិតថ្លៃនាឱកាសបុណ្យភ្ជុំបិណ្ឌ

កម្មករ កម្មការិនី និងប្រជាពលរដ្ឋទូទៅ ជាបណ្តើរៗហើយនៅព្រឹកថ្ងៃទី២០ ខែកញ្ញានេះ បាននាំគ្នាចាកចេញពីរាជធានីភ្នំពេញ ដោយប្រើមធ្យោបាយផ្សេងៗ កម្មករខ្លះធ្វើដំណើរដោយរថយន្តក្រុងដោយឥតគិតថ្លៃ ខ្លះជិះរថយន្តឈ្នួល និងខ្លះទៀតធ្វើដំណើរដោយម៉ូតូ ដើម្បីទៅជួបជុំគ្រួសារនៅស្រុកកំណើតរៀងៗខ្លួន ក្នុងឱកាសពិធីបុណ្យភ្ជុំបិណ្ឌ។

អ្នកស្រី យឹម សាមីត មានស្រុកកំណើតនៅខេត្តកំពត ជាកម្មការិនីកាត់ដេរនៅរាជធានីភ្នំពេញ បានឱ្យព័ត៍មាន ប៊ីធីវី ដឹងថា នេះជាលើកទី២ ដែលបានប្រើប្រាស់សេវារថយន្តក្រុងដោយមិនគិតថ្លៃ និងមានអារម្មណ៍ថា រំភើបសប្បាយរីករាយដែលរដ្ឋាភិបាលបន្តផ្តល់ជូនដោយមិនតម្រូវឱ្យបង់ថ្លៃអ្វីទាំងអស់ ថែមទាំងមានការផ្តល់ជូនបន្ថែមនូវភេសជ្ជះផងដែរ។ អ្នកស្រី និយាយទៀតថា ការជិះរថយន្តក្រុង គឺមានភាពងាយស្រួល ត្រជាក់ និងមានសុវត្ថិភាពថែមទៀត។

មិនខុសគ្នាខាងលើនេះ កម្មការនី ក៏ដូចជាប្រជាពលរដ្ឋដទៃផ្សេងទៀត ដែលជិះរថយន្តក្រុងទៅកាន់គោលដៅផ្សេងៗគ្នាក្នុងថ្ងៃនេះ បានលើកឡើងថា ពិតជាអរគុណដល់រាជរដ្ឋាភិបាល ដែលបានគិតគូរសុខទុករបស់ប្រជាពលរដ្ឋដោយផ្តល់ជារថយន្តក្រុងដឹកជញ្ជូនពលរដ្ឋទៅលេងស្រុកកំណើតជួបជុំគ្រួសារ ដែលអាចសន្សំសំចៃថវិកាបានមួយចំនួនផងដែរ។ ជាពិសេស អាចកាត់បន្ថយការចំណាយបានច្រើន ខណៈកាលមិនទាន់បានប្រើប្រាស់រថយន្តសាធារណៈនេះ គឺត្រូវចំណាយថវិកាច្រើន ដើម្បីធ្វើដំណើរទៅស្រុកកំណើតនេះ។

លោក ផុន ឡង់ឌី អនុប្រធានការិយាល័យគណនេយ្យ ដែលប្រចាំគោលដៅនៅស្ថានីយរថយន្តក្រុងផ្លូវ២០០៤ ជាប់របងបញ្ជាការដ្ឋានកងទ័ពអាកាស បានមានប្រសាសន៍ថា សម្រាប់សេវាដឹកជញ្ជូនប្រជាពលរដ្ឋឥតគិតថ្លៃក្នុងគោលដៅរបស់លោក រួមមានទៅកាន់ខេត្តកំពង់ស្ពឺ ព្រះសីហនុ កោះកុង កំពត និងខេត្តកែប។ លោកបានឲ្យដឹងថា គិតចាប់ពីព្រលឹម រហូតមកដល់ពេលនេះ ឃើញមានប្រជាពលរដ្ឋយ៉ាងច្រើនកុះករ និងទឹកមុខសប្បាយរីករាយ ក្នុងការជិះរថយន្តក្រុងដោយមិនអស់ប្រាក់នេះ។

លោកបានបញ្ជាក់ថា រថយន្តក្រុងដឹកអ្នកដំណើរទាំងអស់ ពេលទៅដល់គោលដៅនឹងនៅរង់ចាំដល់ថ្ងៃចេញដំណើរត្រឡប់មករាជធានីភ្នំពេញវិញផងដែរ។ ចំពោះម៉ោងចេញដំណើរទាំងចេញពីរាជធានីភ្នំពេញទៅខេត្ត និងចេញពីខេត្តមករាជធានីភ្នំពេញ គឺដូចគ្នា ចាប់ពីម៉ោង ៦និង៣០នាទីព្រឹកតទៅ។

ជាការកត់សម្គាល់ ក្រៅពីកម្មករ កម្មការនី ក៏ឃើញមានប្រជាពលរដ្ឋជាច្រើននាក់ផ្សេងទៀត បានចាកចេញពីក្រុងភ្នំពេញ ធ្វើដំណើទៅខេត្តច្រើនខុសពីថ្ងៃធម្មតាដែរ ដោយឃើញមានការអន្តរាគមន៍របស់កងកម្លាំង សមត្ថកិច្ច ជាពិសេសប៉ូលិសចរាចរណ៍បានសម្រួលចរាចរណ៍នៅតាមតំបន់គោលដៅមួយចំនួន ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ និងចៀសវាងការកក់ស្ទះចរាចរណ៍ផងដែរ។

សូមបញ្ជាក់បន្ថែមថា ទាក់ទិនការដាក់ឱ្យប្រើសេវាដឹកជញ្ជូនសាធារណៈដោយមិនគិតថ្លៃនេះ រាជរដ្ឋាភិបាលកម្ពុជា តាមរយៈរដ្ឋបាលរាជធានីភ្នំពេញ បានរៀបចំរថយន្តក្រុងសរុបចំនួន ៥៩៧គ្រឿង រយៈពេល ៦ថ្ងៃ គិតចាប់ពីថ្ងៃទី២០ ដល់២៦ ខែកញ្ញា ឆ្នាំ២០២៥នេះ ដើម្បីសម្រួលដល់ការចំណាយរបស់ប្រជាពលរដ្ឋទាំងអស់ក្នុងការធ្វើដំណើរទៅលេងស្រុកកំណើតជួបជុំបងប្អូនក្រុមគ្រួសារនៅទូទាំងប្រទេសក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរ៕អត្ថបទ ឈិត បូរ៉ាវី