ពិព័រណ៍ផលិតផលខ្មែរថ្ងៃទី១ បានចាប់ផ្ដើមហើយ ខណៈព្រឹត្តិការណ៍នេះមានធ្វើរយៈពេល៣ថ្ងៃ​

នៅព្រឹកថ្ងៃសុក្រ ទី២៦ ខែកញ្ញា ឆ្នាំ២០២៥នេះ ព្រឹត្តិការណ៍ពិព័រណ៍ផលិតផលខ្មែរបាន​ចាប់​ផ្ដើម​ហើយ​ ខណៈ​​ផលិតផលក្នុងស្រុករាប់រយមុខមកពីគ្រប់វិស័យ បានត្រៀមរួចជាស្រេច ដើម្បី​ទទួល​ស្វាគមន៍​បង​ប្អូន​សាធារណជនមកចូលរួមទស្សនានៅក្នុងកម្មវិធីពិព័រណ៍ថ្ងៃទី១នេះ។

ពិព័រណ៍ផលិតផលខ្មែរនេះត្រូវបានរៀបចំឡើងដោយ​សហភាពសហព័ន្ធយុវជនកម្ពុជា ក្រោម​ប្រធាន​បទ​ “ខ្មែរធ្វើបាន៖ ចូលរួម ជំរុញ គាំទ្រផលិតផលក្នុងស្រុក”។ ពិព័រណ៍ផលិតខ្មែរនេះ រៀប​ចំ​ឡើង​ស្របពេលដែល ប្រជាពលរដ្ឋកម្ពុជា កំពុងការគាំទ្រផលិតក្នុងស្រុកយ៉ាងខ្លាំងក្លា។ ពិព័រណ៍​នេះ ​ជាឱកាសប្រមូលផ្ដុំនៅផលិតផលខ្មែរជាច្រើនប្រភេទ មកពីតាមបណ្ដារាជធានី-ខេត្ត ដោយ​មាន​ស្តង់​ចំនួន ២៨៣ស្តង់ ក្នុងនោះស្តង់របស់អាជីវករខ្មែរមានចំនួន២២៩ និងស្តង់ដៃគូ​សហការ​រៀប​ចំ​ព្រឹត្តិការណ៍​ពិព័រណ៍មានចំនួន ៥៤ស្តង់។

ព្រឹត្តិការណ៍ពិព័រណ៍ផលិតខ្មែរ “ខ្មែរធ្វើបាន៖ ចូលរួមជំរុញ គាំទ្រផលិតផលក្នុងស្រុក” មាន​គោល​ដៅ​សំខាន់​ គឺជំរុញការគាំទ្រផលិតខ្មែរ បង្ហាញទៅកាន់ប្រជាពលរដ្ឋខ្មែរ ឱ្យបានដឹងពីអ្វីដែលកម្ពុជា បាន​នឹង​កំពុងផលិតបាន។ លើសពីនេះ វាក៏ជាព្រឹត្តិការណ៍ បង្ហាញពីការរួបរួមសាមគ្គី របស់​មហា​គ្រួសារ​ខ្មែរ​។ ជា​មួយ​គ្នានេះ វត្តមានវាគ្មិនជាច្រើនរូប ក៏បានត្រៀមខ្លួនរួចរាល់ សម្រាប់​វេទិកា​ជជែក​ពិភាក្សា​​​លើ​ប្រធាន​​ប​ទ​សំខាន់ៗ ដើម្បីផ្ដល់ចំណេះដឹង និងបទពិសោធថ្មី​ៗ​ដល់​អ្នក​ចូល​រួម​ទាំង​អស់​គ្នា។​

សូមជម្រាបជូនថា ពិព័រណ៍ផលិតផលខ្មែរ “ខ្មែរធ្វើបាន៖ ចូលរួមជំរុញ គាំទ្រផលិតផលក្នុងស្រុក” នឹង​ប្រព្រឹត្តទៅរយៈពេល ៣ថ្ងៃ គឺនៅថ្ងៃទី ២៦ ២៧ និង២៨ ខែកញ្ញា ឆ្នាំ២០២៥ នៅ​សាល​ពិព័រណ៍​កោះពេជ្រ (អគារ G-L) ហើយក៏​​នឹង​មានការចូលរួមពីតារាចម្រៀង ដែល​នឹង​ច្រៀង​បទ​ចម្រៀង​ពាក់​ព័ន្ធ​នឹង​ជាតិ។ លើស​ពី​នេះ​ក៏​មាន​កម្ម​វិធី​អមដែលមានទូតាំងម្ហូបអាហារ ភេសជ្ជៈ សួន​កុមារ ការសម្ដែងសិល្បៈចម្រុះ សៀក ការ​សម្ដែង​ភ្លេង​ពី​ក្រុម​កាយរឹទ្ធកម្ពុជា និង​កាក​បាទ​ក្រហម​កម្ពុជា ​ការចាប់រង្វាន់ ការ​បង្ហាញ​បសុ​សត្វ ​និងការជិះរទេះគោ រទេះសេះកម្សាន្តផងដែរ៕