អាជីវករ​អំពាវនាវពលរដ្ឋចូលរួមពិព័រណ៍ផលិតផលខ្មែរ ខណៈកម្មវិធីចាប់ផ្តើមផ្លូវការថ្ងៃទី២៦ កញ្ញា​នេះ

ខណៈដែលកម្មវិធីពិព័រណ៍ផលិតផលខ្មែរ បានចាប់ផ្តើមបើកដំណើរការនៅព្រឹកថ្ងៃទី២៦ ខែ​កញ្ញា​នេះ​តទៅ ក្រុមអាជីវកម្មបានអំពាវនាវដល់ប្រជាពលរដ្ឋ ចូលរួមទស្សនាឱ្យបានច្រើនកុះករ និង​បន្ត​គាំទ្រ​ផលិតផលក្នុងស្រុក ដើម្បីលើកស្ទួយសេដ្ឋកិច្ចជាតិកាន់តែរីកចម្រើនបន្ថែមទៀត។

លោក ណាត បញ្ញា ប្រធានពាណិជ្ជសញ្ញា មីជាតិ តាមរយៈបទសម្ភាសន៍ជាមួយ ប៊ីធីវី បាន​លើក​ឡើ​​ង​ថា ពិព័រណ៍ផលិតផលខ្មែរនេះ ពិតជាមានសារៈសំខាន់ ថ្មី ប្លែកខុសពីកម្មវិធីដទៃទៀត ដោយសារ​មានការចូលរួមច្រើនពីផលិតករ ពាណិជ្ជករ និងអាជីករជាច្រើនផ្សេងៗទៀត ដែល​បង្កើត​ឡើង​ដោយ​ស្នាដៃកូនខ្មែរសុទ្ធសាធ។ លោកបន្តថា លោកមានការសប្បាយចិត្តជាខ្លាំង នៅ​ពេល​ដែល​ឃើញសន្ទុះនៃការគាំទ្ររបស់ប្រជាពលរដ្ឋមានការកើនឡើងជាបន្តបន្ទាប់ ដែល​នេះ​ជា​ឱកាស​ដ៏​ល្អបំផុតក្នុងការជំរុញសេដ្ឋកិច្ចជាតិរីកចម្រើន ក៏ដូចជាបង្កើត​ឱកាស​ការងារ​កាន់​តែ​ច្រើន​ឡើង​ផង​ដែរ​ដល់​ពលរដ្ឋក្នុងស្រុក។

ក្រុមអាជីវករផ្សេងទៀត បាននិយាយថា ដើម្បីជាការឆ្លើយតប និង​អរគុណ​ជូន​ចំពោះ​អ្នក​គាំទ្រ​ទាំង​ឡាយ​ ក៏ដូចជាការគិតគូរយ៉ាងខ្ពស់ពីសំណាក់រាជរដ្ឋាភិបាល នឹងខិតខំព្យាយាមយ៉ាងណា ដើម្បី​ផលិតផលិតផលដែលមានគុណភាព ស្តង់ដារត្រឹមត្រូវ និងមាន​អនាម័យ​ខ្ពស់​ជូន​អ្នក​ប្រើ​ប្រាស់​។ ពួកគាត់ បាននិយាយដោយទឹកមុខសប្បាយរីករាយទៀតថា ពិតជារំភើប និង​សប្បាយ​ចិត្ត​ណាស់ ​ពេលដែលផលិតផលជាតិ មានការគាំទ្រជាហូហែរបែបនេះ និងបាន​សំណូមព​រ​បន្ថែម​ថា ​សូមឲ្យប្រជាពលរដ្ឋខ្មែរទាំងអស់ បន្តជួយគាំទ្រផលិតផលក្នុងស្រុកឱ្យកាន់តែច្រើនថែមទៀត ដើម្បី​ជាកម្លាំងចិត្តដល់ផលិតករ និងជួយលើកស្ទួយកុំឲ្យប្រជាជនចំណាកស្រុកជាដើម។

សូមជម្រាបជូនថា កម្មវិធីពិព័រណ៍ផលិតផលខ្មែរ រៀប​ចំ​ឡើង​ដោយ​សហភាព​សហព័ន្ធ​យុវជន​កម្ពុជា ​ក្រោមប្រធានបទ «ខ្មែរធ្វើបាន៖ ចូលរួមជំរុញ និងគាំទ្រផលិតផលក្នុងស្រុក» ។ ក្រៅ​ពី​ការ​ដាក់​តាំង​បង្ហាញ​លក់ផលិតផលក្នុងស្រុក ក៏មានវាគ្មិនជាសហស្ថាបនិកក្រុមហ៊ុនជាច្រើនរូប នឹង​ចូល​រួម​បង្ហាញ​វត្ត​មាន ព្រមទាំងចែករំលែកទស្សនៈ និងបទពិសោធ ជុំវិញប្រធានបទ «Cambodia: A Land of Opportunity»។ កម្មវិធីនេះ រៀបចំឡើងរយៈពេល៣ថ្ងៃ ចាប់​ពី​ថ្ងៃ​ទី​២៦ ​ដល់២៨ ខែកញ្ញា ឆ្នាំ២០២៥ នៅសាលពិព័រណ៍កោះពេជ្រ ដោយមានស្តង់ចំនួន ២៨៣​ស្តង់ ​ក្នុងនោះស្តង់របស់អាជីវករខ្មែរមានចំនួន ២២៩ និងស្តង់ដៃ​គូ​សហការ​រៀបចំ​ព្រឹត្តិការណ៍​ពិព័រណ៍​មាន​ចំនួន ៥៤ស្តង់៕ អត្ថបទ៖ ឈិត បូរ៉ាវី