ឯកឧត្តមរដ្ឋមន្ត្រី កែវ រតនៈ និងអគ្គីសនីកម្ពុជា ឧបត្ថម្ភអាវក្រោះ និងសម្ភារចាំបាច់ ដល់​កង​ទ័ព​ជួរ​មុខ​នៅ​ថ្មដា

ខេត្តពោធិ៍សាត់៖ ថ្ងៃទី២៦ ខែកញ្ញា ឆ្នាំ២០២៥ លោក ធាង ឡេង អភិបាលស្រុកវាលវែង បាន​នាំយក​អាវ​ក្រោះ មួកការពារ ម៉ាស៊ីនភ្លើង ប្រេងឥន្ធនៈ រួមទាំងសម្ភារៈជាច្រើនមុខផ្សេងទៀត សរុប​ទឹក​ប្រាក់ជាច្រើនម៉ឺនដុល្លា ដែលជាអំណោយរបស់ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និង​ថាមពល រួមជាមួយ អគ្គីសនីកម្ពុជា ប្រគល់ជូនដល់ដៃ កម្លាំងនគរបាលព្រំដែន និងវីរ​កង​ទ័ព​ជួរ​មុខ ដែលកំពុងឈរជើងការពារខ្សែបន្ទាត់ព្រំដែនកម្ពុជា-ថៃ ក្នុងភូមិសាស្ត្រឃុំថ្មដា ស្រុក​វាលវែង។

ក្នុងឱកាសនោះ តំណាងនគរបាលព្រំដែន និងតំណាងកងទ័ពជួរមុខ បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងថ្នាក់ដឹកនាំគ្រប់លំដាប់ថ្នាក់តែងតែយកចិត្តទុកដាក់អំពីសុខទុក្ខរបស់កម្លាំងជួរមុខ។ ក្នុងនាមជាកម្លាំងជួរមុខ បានប្តេជ្ញាលះបង់គ្រប់យ៉ាងដើម្បីការពារទឹកដី ជាមួយគ្នានោះក៏សូមអំពាវនាវដល់ប្រជាពលរដ្ឋទាំងអស់ត្រូវបន្តជឿជាក់លើថ្នាក់ដឹកនាំ ជឿជាក់លើរាជរដ្ឋាភិបាល ក្នុងការដោះស្រាយបញ្ហាជម្លោះព្រំដែនជាមួយប្រទេសថៃ ដោយថ្នាក់ដឹកនាំតែងតែតម្កល់ផលប្រយោជន៍ជាតិ និងអាយុជិវិតប្រជាជនជាធំ ព្រមទាំងប្តូរផ្តាច់ការពារបូរណភាពទឹកដីមិនឱ្យបាត់បង់។

លោក ធាង ឡេង អភិបាលស្រុកវាលវែង បានបញ្ជាក់ឱ្យដឹងថា ឃុំថ្មដា ស្រុកវាលវែង ខេត្តពោធិ៍សាត់ មានព្រំប្រទល់ជាប់ជាមួយ ស្រុកមឿង ខេត្តត្រាត ប្រទេសថៃ។ ហើយឃុំថ្មដា មាន ៥ភូមិ ក្នុងនោះភូមិផ្លូវការចំនួន ៣ភូមិរួមមាន៖ ភូមិឯកភាព ភូមិកណ្តាល និងភូមិសង្គមថ្មី និងភូមិឧបសម្ព័ន្ធចំនួន ២គឺ ភូមិអូរសួស្តី និងភូមិស្ទឹងមេទឹក ដោយមានប្រជាពលរដ្ឋរស់នៅសរុបចំនួន ៣ ០២៨នាក់ ស្មើនឹង ៧៨១គ្រួសារ។ កន្លងមកកងទ័ពសៀម ធ្លាប់បានបាញ់ផ្លោងកាំភ្លើងធំ បង្ហោះដ្រូន និងរាយលួសបន្លាតាមខ្សែបន្ទាត់ព្រំដែនថ្មដា ស្រុកវាលវែង ចូលមកដីកម្ពុជាដោយគ្មានអៀនខ្មាស់ និងវង្វេងប្រវត្តិសាស្ត្រ ប៉ុន្តែអាជ្ញាធរបានរៀបចំកម្លាំងត្រៀមតាមគោលដៅរួចជាស្រេច ក្នុងការការពារទឹកដី៕