ក្រសួងសុខាភិបាល បាននឹងបន្តការយកចិត្តទុកដាក់លើការកសាងសមត្ថភាពជំនាញផ្នែក​ព្យាបាល​​​ដោយចលនា

ភ្នំពេញ ៖ ឯកឧត្តមវេជ្ជបណ្ឌិត ស៊ិក ប៊ុណ្ណា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តមសាស្ត្រាចារ្យ ឈាង​ រ៉ា រដ្ឋមន្ត្រី​ក្រសួងសុខាភិបាល និងឯកឧត្តម សែម សុខា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញបើកសន្និបាតជាតិព្យាបាលដោយចលនាលើកទី២៣ ក្រោម​ប្រធាន​បទ​«សុខភាពមនុស្សចាស់»  និង «ការព្យាបាលដោយចលនា ដើម្បីស្តារលទ្ធភាពពលកម្ម» ដែលរៀប​ចំ​ឡើង​ដោយសមាគមពេទ្យព្យា​បាល​​ដោយចលនាកម្ពុជា សហការជាមួយដៃគូពាក់ព័ន្ធ, រយៈពេល០២ថ្ងៃ ចាប់ពីថ្ងៃទី២៦-២៧ ខែកញ្ញា ឆ្នាំ២០២៥។

​សន្និបាតខាងលើនេះ មានការអញ្ជើញចូលរួមពីឯកឧត្តម ចាប តូ អនុរដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា លោកអគ្គនាយករង ក្រសួងសង្គមកិច្ច អតីតយុទ្ធជន និងយុវនីតិសម្បទា លោក សាន់ រតនា ប្រធាននាយកដ្ឋានសុខុមាលភាពជនពិការ លោកសាស្ត្រាចារ្យ កឹម សាវុន អនុប្រធានប្រចាំការ លេខាធិការដ្ឋាននៃក្រុមការងារបច្ចេកទេសសុខ ភាពជនមានពិការភាព ក្រសួងសុខាភិបាលលោកវេជ្ជបណ្ឌិត អៀន សុខ ប្រធានការិយាល័យ នាយកដ្ឋានការពារសុខភាព ក្រសួងសុខាភិបាល លោកសាស្ត្រាចារ្យជំនួយ តាន់​ ងី នាយកសាលាបច្ចេកទេសថែទាំវេជ្ជសាស្ត្រ នៃសាកលវិទ្យាល័យវិទ្យាសាស្ត្រសុខាភិបាល លោកស្រី Elizabeth Anderson តំណាងសមាគមពេទ្យព្យាបាលដោយចលនាពិភពលោក លោកសាស្ត្រាចារ្យ Ah Cheng Goh ប្រធានសមាគមពេទ្យព្យាបាលដោយចលនា ឯកទេសព្យាបាលដោយប្រើម៉ាស៊ីន(ពិភពលោក) លោកស្រីសាស្ត្រាចារ្យ Celia Tan នាយកជាន់ខ្ពស់ SingHealth,Singapore General Hospital និងលោក​ ហៀម ហឿង ប្រធានសមាគមពេទ្យព្យា​បាល​​ដោយចលនាកម្ពុជា។

ឯកឧត្តមវេជ្ជបណ្ឌិត ស៊ិក ប៊ុណ្ណា  បានថ្លែងថា ការព្យាបាលដោយចលនា ​គឺ​ជា​វិជ្ជាជីវៈមួយដែលមានសារសំខាន់យ៉ាងខ្លាំង ក្នុងចំណោមសេវាវេជ្ជសាស្ត្រ ក៏ដូចគួបផ្សំជាមួយនឹងវិជ្ជាជីវៈវេជ្ជសាស្ត្រ ជំនួយវេជ្ជសាស្ត្រ និងអមវេជ្ជសាស្ត្រទាំងឡាយ ដែលវិជ្ជាជីវៈនេះ​បានរួម​ចំណែក​យ៉ាង​សំខាន់នៅក្នុងការព្យាបាលឱ្យបានធូរស្បើយ ឬជាសះស្បើយ ការពារ សម្របសម្រួល និងស្តារ​លទ្ធភាព​ពលកម្មដល់អ្នកជំងឺ និងជនមានពិការភាព។ ជាពិសេសក្រសួងសុខាភិបាល បាននឹងបន្តការយកចិត្តទុកដាក់លើការកសាងសមត្ថភាពជំនាញផ្នែក​ព្យាបាល​​​ដោយចលនា ដែលក្នុងនោះមានដូចជាការបង្កើនការជ្រើសរើសនិស្សិតផ្នែកព្យាបាល​​​ដោយចលនា ឱ្យចូលរៀន​នៅសាលាបច្ចេកទេសថែទាំវេជ្ជសាស្ត្រ នៃសាកលវិទ្យាល័យវិទ្យាសាស្ត្រសុខាភិបាល  និងមាន​​ការ​ជ្រើសរើស អ្នកជំនាញព្យាបាលដោយចលនា ដើម្បីចូលបម្រើការក្នុងក្របខណ្ឌមន្ត្រីរាជការ មន្ត្រីជាប់កិច្ចសន្យា ឬមន្ត្រីកិច្ចព្រមព្រៀងការងារ នៅតាមមន្ទីរ​ពេទ្យ​ជាតិ រាជធានី ខេត្ត ទូទាំងប្រទេស តាមរយៈការប្រលងប្រជែង ជាដើម ។

ឯកឧត្តមវេជ្ជបណ្ឌិត បន្តថា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិត របស់សម្តេចអគ្គមហាសេនាបតី តេជោ ហ៊ុន សែន អតីតនាយករដ្ឋមន្ត្រី បច្ចុប្បន្នប្រធានព្រឹទ្ធសភាកម្ពុជា និងបន្តមកសម្តេចមហាបវរធិបតី ហ៊ុន ម៉ាណែត នាយក​រដ្ឋ​មន្ដ្រី នៃព្រះរាជាណាចក្រកម្ពុជាបច្ចុប្បន្ន កម្ពុជាយើងសម្រេចបាននូវវឌ្ឍនភាពគួរជាទី​មោទនៈ​លើ​គ្រប់​វិស័យ ។ ក្នុងនោះវិស័យសុខាភិបាលក៏មានការរីកចម្រើនគួរឱ្យកត់សម្គាល់ជាបន្តបន្ទាប់ និង​ជា​យុទ្ធសាស្ត្រមួយ ក្នុង​ចំណោមយុទ្ធសាស្ត្រចតុកោណជំហានទី៤ នីតិកាលទី៦ ​នៃរដ្ឋសភា និងជាពិសេសបន្តមក យុទ្ធសាស្ត្រ​បញ្ចកោណ​ដំណាក់កាលទី១ នីតិកាលទី៧នៃរដ្ឋសភា ដែលវិស័យសុខាភិបាល​ជាអាទិភាព​មួយ​ ដ៏ចម្បង​របស់​រាជរដ្ឋាភិបាលកម្ពុជា សំដៅបន្តលើកកម្ពស់សុខភាព និងសុខុមាលភាព របស់ប្រជាជន​យើង​ឱ្យមាន​លក្ខណៈ​កាន់តែប្រសើរឡើងថែមទៀត។ រាជរដ្នាភិបាលមានការគិតគូរលើគ្រប់ទិដ្ឋភាព, ទាំង​ផ្នែក​ហេដ្ឋារ​ចនាសម្ព័ន្ធ​សុខាភិបាល, អភិបាលកិច្ច, ធនធានមនុស្ស ដែលមានមូលធនមនុស្ស និងជំនាញ​វិជ្ជា​ជីវៈប្រកប​ដោយក្រមសីលធម៌ខ្ពស់ និងការផ្តល់សេវាប្រកបដោយសមត្ថភាព និងគុណភាព។

ទន្ទឹមគ្នានោះដែរ ឯកឧត្តម សែម សុខា បានចាត់ទុក សន្និបាតជាតិនេះជាឱកាសមាសដ៏ល្អមួយ ក្នុងការជួបជុំសមាជិក សមាជិកា ដើម្បីបន្តជំរុញប្រសិទ្ធភាពការងារ និងទទួលបានភាពជោគជ័យប្រកបដោយទំនួលខុសត្រូវខ្ពស់ក្នុងវិស័យព្យាបាលដោយចលនា នៅកម្ពុជា។ ក្រសួងសង្គមកិច្ច អតីតយុទ្ធជន និងយុវនីតិសម្បទា បានផ្តល់អាទិភាពការងារពិការភាពក្នុងកម្មវិធីការងាររបស់ក្រសួង ដោយបានកសាងគោលនយោបាយ និងលិខិតបទដ្ឋានគតិយុត្តជាបន្តបន្ទាប់ សំដៅពង្រឹងពង្រីកការគោរពសិទ្ធិជាមូលដ្ឋានរបស់ជនមានពិការភាព ស្របតាមរដ្ឋធម្មនុញនៃព្រះរាជាណាចក្រកម្ពុជា។ អតីតយុទ្ធជន អតីត មន្ត្រីរាជការមានពិការភាព បានទទួលរបបឧបត្ថម្ភពីរដ្ឋ ជនមានពិការភាពមានប័ណ្ណសមធម៌ ឬនៅក្នុងគ្រួសារដែលមានប័ណ្ណសមធម៌ នឹងទទួលបានប្រាក់ឧបត្ថម្ភប្រចាំខែពីរាជរដ្ឋាភិបាល បន្ទាប់ពីបានធ្វើបច្ចុប្បន្នភាពទិន្នន័យជាមួយកម្មវិធីអត្តសញ្ញាណកម្មគ្រួសារក្រីក្រ នៃក្រសួងផែនការ និងបានចុះឈ្មោះជាមួយកម្មវិធីជាតិជំនួយសង្គមក្នុងកញ្ចប់គ្រួសារ ការបណ្តុះបណ្តាលវិជ្ជាជីវៈដោយឥតគិតថ្លៃ ការទទួលបានប្រាក់ឧត្ថម្ភក្នុងអំឡុងពេលសិក្សានេះ ការទទួលបាននូវសេវាស្តារលទ្ធភាពពលកម្ម កាយសម្បទា សេវាអក្សរស្ទាប និងភាសាសញ្ញា។ នេះជាការឆ្លើយតបនឹងតម្រូវការរបស់ជនមានពិការ ភាពតាមកម្មវិធីអភិវឌ្ឍសហគមន៍ប្រកបដោយបរិយាបន្ន ដើម្បីជួយលើកកម្ពស់សិទ្ធិ និងជីវភាពរបស់ ជនមានពិការភាព។

បើតាមលោក​ ហៀម ហឿង ប្រធានសមាគមពេទ្យព្យា​បាល​​ដោយចលនាកម្ពុជា បានឲ្យដឹងថា តាមរបាយការណ៍ជាតិនានា ប្រទេសយើងកំពុងឈានចូលសង្គមចាស់ជរា ដោយមានប្រជាជនវ័យ ៦៥ឆ្នាំឡើងទៅជាង ១.៣ លាននាក់ (ប្រហែល ៨-៩% នៃប្រជាជន)។ ការរីកចម្រើននៃជំងឺមិនឆ្លង ដូចជា ជំងឺបេះដូង សម្ពាធឈាមខ្ពស់ ទឹកនោមផ្អែម និងមហារីក ក៏កំពុងកើនឡើង និងជាហេតុដ៏សំខាន់នៃមរណភាព។ នេះជាកត្តាដែលបង្ហាញថា តម្រូវការសេវាព្យាបាលដោយចលនានឹងកាន់តែចាំបាច់។ ទោះបីជាយ៉ាងណា កម្លាំងពលកម្មវិជ្ជាជីវៈនៅកម្ពុជា នៅតែមានកម្រិតទាប។ បច្ចុប្បន្ន គ្រូពេទ្យព្យាបាលដោយចលនា ១នាក់ ត្រូវបម្រើប្រជាជនប្រហែល ៣២,០០០នាក់ ខណៈ ដែលអត្រាមធ្យមនៅអាស៊ីអាគ្នេយ៍ស្ថិតនៅប្រហែល ១/ ៥០០០-៧០០០នាក់។ ភាពខ្វះខាតនេះ បញ្ជាក់យ៉ាងច្បាស់ថា កម្ពុជា ត្រូវការការវិនិយោគដ៏សំខាន់លើការអប់រំ និងការបង្កើនចំនួន ដើម្បីឆ្លើយតបនឹងតម្រូវការជាតិ និងអន្តរជាតិ។

លោកប្រធានសមាគម បានបញ្ជាក់ទៀតថា ក្នុងរយៈពេលជាង២០ឆ្នាំកន្លងមក សមាគមពេទ្យព្យាបាលដោយចលនាកម្ពុជា បានបន្ត ខិតខំប្រឹងប្រែងក្នុងការអភិវឌ្ឍវិជ្ជាជីវៈ និងការបណ្តុះបណ្តាល ដោយមានសកម្មភាព និង ស្នាដៃសំខាន់ៗដូចខាងក្រោម៖ ការអប់រំ និងការបណ្តុះបណ្តាលវិជ្ជាជីវៈ, ការបណ្តុះបណ្តាលបន្ត (CPD), ការផ្សព្វផ្សាយ និងបង្កើនការយល់ដឹង, ការចូលរួមអនុវត្តគម្រោងអភិវឌ្ឍន៍, ការចូលរួមបង្កើតគោលនយោបាយ និងយុទ្ធសាស្រ្ត និងកិច្ចសហប្រតិបតិ្តការអន្តរជាតិផងដែរ៕

អត្ថបទ រដ្ឋា