ឯកឧត្តម ហ៊ុន ម៉ានី៖ម៉ោងនេះ ពេលនេះ ស្មារតី ទឹកចិត្តយើងទាំងអស់គ្នា នៅជាមួយនឹងថ្នាក់ដឹកនាំ និងវីរកងទ័ពនៅជួរមុខជានិច្ច

ភ្នំពេញ ៖ ប៉ុន្មានម៉ោងក្រោយទាហានថៃ បានធ្វើការបាញ់ប្រហារមុនមកលើទាហានកម្ពុជា ជាថ្មីម្តងទៀតនាថ្ងៃទី២៧ ខែកញ្ញា ឆ្នាំ២០២៥នេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជាដែលហៅកាត់ថា ស.ស.យ.ក. បានបង្ហាញនូវការព្រួយបារម្ភជាខ្លាំង ប៉ុន្តែជាមួយនឹងការព្រួយបារម្ភនេះឯកឧត្តម ក៏បាន លើកឡើងអំពីសាមគ្គីភាពរបស់ប្រជាពលរដ្ឋខ្មែរគ្រប់រូបផងដែរ ដោយឯកឧត្តមបញ្ជាក់ថាម៉ោងនេះ ពេលនេះស្មារតី ទឹកចិត្ត របស់យើងទាំងអស់គ្នានៅជាមួយនឹងថ្នាក់ដឹកនាំ ជាពិសេសវីរកងទ័ពនៅជួរមុខជានិច្ច។

តាមរយៈបណ្តាញសង្គមហ្វេសបុក នារសៀលថ្ងៃទី២៧ ខែកញ្ញា ឆ្នាំ២០២៥នេះ ឯកឧត្តម ហ៊ុន ម៉ានី បានលើកឡើងថា«ដូចប្រជាជនកម្ពុជាទាំងអស់ ដែលកំពុងតាមដានស្ថានការណ៍តានតឹងតាមបណ្តោយព្រំដែនកម្ពុជា-ថៃ ខ្ញុំមានការព្រួយបារម្ភយ៉ាងខ្លាំងចំពោះការបាញ់ប្រហារម្តងទៀតនាពេលថ្មីៗនេះរបស់យោធាថៃ ចូលមកក្នុងទឹកដីកម្ពុជា យោងតាមសេចក្តីប្រកាសព័ត៌មានរបស់ក្រសួងការពារជាតិ នៃព្រះរាជាណាចក្រកម្ពុជា។ នេះគឺជាការរំលោភលើកិច្ចព្រមព្រៀងឈប់បាញ់ដែលបានឯកភាពគ្នាកាលពីថ្ងៃទី២៨ ខែកក្កដា»។

ឯកឧត្តមបានបន្ថែមទៀតថា «ត្រង់ចំណុចនេះ ឯកឧត្តមសូមសម្តែងការព្រួយបារម្ភ ក៏ដូចជាក្តីសង្ឃឹមថា «ការបាញ់ប្រហារ» ចូលមកក្នុងទឹកដីកម្ពុជា នឹងត្រូវបញ្ឈប់ ហើយវិលត្រឡប់ទៅរកការអនុវត្តតាមកិច្ចព្រមព្រៀងឈប់បាញ់ដូចដែលបានឯកភាពគ្នាវិញ។

ឯកឧត្តមបានគូសបញ្ជាក់ថា« ម៉ោងនេះ ពេលនេះ ស្មារតី ទឹកចិត្ត របស់យើងទាំងអស់គ្នា នៅជាមួយនឹងថ្នាក់ដឹកនាំ ជាពិសេសវីរកងទ័ពនៅជួរមុខ និងសូមបួងសួងដល់វត្ថុគ្រប់ស័ក្តិសិទ្ធក្នុងលោក សូមជួយថែរក្សាការពារវីរកងទ័ពនៅជួរមុខឱ្យមានសុខសុវត្ថិភាព និងសន្តិភាពសម្រាប់ប្រជាជនទាំងអស់គ្នា»៕

អត្ថបទ បាន ចក់​