សម្តេចតេជោ ប្រកាសធ្វើផ្ទះជូនអតីតយុទ្ធជន និងនិវត្តជន​ចំនួន ១០០ខ្នង​ក្នុង​មួយ​ឆ្នាំ​ រយៈពេល៥ឆ្នាំ

សម្តេចអគ្គមហាសេនាបតីតេជោ ហ៊ុន សែន នាយឧត្តមសេនីយ៍ផុតលេខផ្កាយមាស៥ ហ៊ុន សែន ប្រមុខរដ្ឋស្តីទី និងជាប្រធានសមាគមអតីតយុទ្ធជនកម្ពុជា បានប្រកាសថា សម្តេច និង​ភរិយា​នឹង​ធ្វើ​ផ្ទះ​ជូន​ដល់បងប្អូនអតីតយុទ្ធជន និងនិវត្តជន១០០ក្នុងមួយឆ្នំា រយៈពេល​៥​ឆ្នាំ​ពោល​គឺ​ចាប់​ពី​ឆ្នាំ​២០២៥​រហូតដល់ឆ្នាំ២០៣០។

ថ្លែងក្នុងឱកាសអញ្ជើញជាអធិបតីភាពបិទមហាសន្និបាតវិសាមញ្ញតំណាងសមាគមអតីតយុទ្ធជន និង​និវត្តជន​កម្ពុជា​ទូទាំង​ប្រទេស នាព្រឹកថ្ងៃទី២៩ ខែកញ្ញា ឆ្នាំ២០២៥នេះ នៅ​ទីស្តី​ការ​ក្រសួង​មហា​ផ្ទៃ សម្តេចតេជោ ហ៊ុន សែន បានថ្លែងថា ដើម្បីជួយសម្រាល់ទុកលំបាក និង​លើក​កម្ពស់​ជីវភាព​ដល់​អតីត​យុទ្ធជន និងនិវត្តជនកម្ពុជា សម្តេច និង​ភរិយា​ចំណាយ​ថវិកា​ផ្ទាល់​ដើម្បី​ធ្វើ​ផ្ទះ​ជូន​ពួក​គេ​ចំនួន​៥០០​ខ្នងរយៈពេល៥ឆ្នាំ រួមទាំងមន្រ្តីជាន់ខ្ពស់រាជរដ្ឋាភិបាល និង​សប្បុរស​ជន​ជា​ច្រើន​ទៀត​ក៏​បាន​ប្រកាស​ធ្វើ​ជូនដល់ពួកគេផងដែរ។

បើតាមការអះអាងរបស់សម្តេច ហ៊ុន សែនប្រធានសមាគមអតីតយុទ្ធជនកម្ពុជា ក៏​បាន​ឲ្យ​ដឹង​ផង​ដែរ​ថា ​សម្រាប់ឆ្នាំ២០២៥នេះ ផ្ទះដែលនឹងត្រូវធ្វើជូនដល់អតីតយុទ្ធជន និងនិវត្តជន​គឺ​មាន​ចំនួន​៥៤០​ខ្នង​ហើយ ដោយអំណោយរបស់សម្តេច១០០ខ្នង និងពីសម្តេច ឯកឧត្តម លោកជំទាវ និង​សប្បុរស​ជន​នានាផ្សេងទៀតចំនួន ៤៤០ខ្នង៕ អត្ថបទ៖ បាន ចក់