សម្តេចតេជោ៖ រាជរដ្ឋាភិបាលនឹងចំណាយថវិកាពី​៤ពាន់លានរៀល​ទៅ​៨​ពាន់​លាន​រៀល​​ជូន​ដល់​អតីតយុទ្ធជន និងនិវត្តជន

សម្តេចអគ្គមហាសេនាបតីតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន ប្រមុខ​រដ្ឋស្តីទី​ និងជាប្រធានសមាគមអតីតយុទ្ធជនកម្ពុជា បានប្រកាសថា រាជរដ្ឋាភិបាល​នឹង​បង្កើន​ថវិកា​ទ្វេដង ដើម្បី​ជូនដល់អតីតយុទ្ធជន និងនិវត្តជនពោលគឺ​ពី​៤ពាន់​លាន​រៀល​ទៅ​៨ពាន់​លាន​រៀល ​ដោយនឹងអនុវត្តចាប់ពីឆ្នាំ២០២៦តទៅ។

ថ្លែង​ក្នុងឱកាសអញ្ជើញជាអធិបតីភាពបិទមហាសន្និបាតវិសាមញ្ញតំណាងសមាគមអតីតយុទ្ធជន និង​និវត្តជនកម្ពុជាទូទាំងប្រទេស នាព្រឹកថ្ងៃទី២៩ ខែកញ្ញា ឆ្នាំ២០២៥នេះ សម្តេចតេជោ ហ៊ុន សែន បាន លើកឡើងថា សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និង​ឯកឧត្តម​ឧប​នាយក​រដ្ឋ​មន្រ្តីអូន ព័ន្ធមុន្នីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានសម្រេចបង្កើន​ថវិ​កា​ពី​៤​ពាន់​លាន​រៀល​ក្នុងមួយឆ្នាំ ទៅដល់៨ពាន់លានរៀលក្នុងមួយឆ្នាំ ហើយសម្រាប់ឆ្នាំ២០២៥នេះ គឺ​រាជ​រដ្ឋាភិបាលបានត្រឹម​តែបន្ថែមចំនួន ៥០០លានរៀលប៉ុណ្ណោះ ដើម្បីជួយ​សម្រាល​ទុក​លំបាក​ដល់​សមាគម​អតីតយុទ្ធជន។

បើតាមសម្តេចតេជោ ហ៊ុន សែន ក៏បានឲ្យដឹងផងដែរថាអតីតយុទ្ធជន និងនិវត្តជនក៏មានប្រាក់ ឧបត្ថម្ភ​ជាច្រើនទៀតផងដែរ រួមទាំងប្រាក់ឧបត្ថម្ភសម្រាប់បុណ្យជាតិ ដូចជាបុណ្យភ្ជុំបិណ្ឌ និង​បុណ្យ​ចូល ឆ្នាំថ្មីប្រពៃណីជាតិជាដើម៕ អត្ថបទ៖ បាន ចក់