វិស័យឯកជនបង្កើតកិច្ចសហការស្វែងករកគន្លឹះថ្មីៗ ដើម្បីលើកកម្ពស់ការធ្វើអាជីវកម្មឱ្យខ្លាំងក្លា

សមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជា ជំរុញបង្កើតកិច្ចសហប្រតិបត្តិការ រវាង​ម្ចាស់អាជីវកម្មនាំចេញ-ចូល ក្រុមហ៊ុនដឹកជញ្ជូន និងឡូជីស្ទិក បំពេញ​សេវា​កម្ម​គ្នា​ទៅ​វិញ​ទៅ​មក​ ក្នុងគោលដៅចាប់យកកាលានុវត្តភាពថ្មីៗ ដើម្បីទាញយក ប្រយោជន៍ឱ្យបានជាអតិបរិមា ក្នុង​បរិការណ៍កំពុងប្រួលប្រែ។

លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជា លើក​ឡើង​នៅ​ក្នុង​ជំនួបអាជីវកម្ម នាំចេញ-ចូល និងក្រុមហ៊ុនដឹកជញ្ជូនឡូជីស្ទិក នៅចុង​សប្តាហ៍​កន្លង​មក​ថា នាពេលប៉ុន្មានឆ្នាំចុងក្រោយនេះ កម្ពុជាបានកំពុងស្រូប យកវិនិយោគ​មក​បណ្តាក់​ទុន​នៅ​ព្រះរាជាណា​ចក្រកម្ពុជាមានជាហូរហែរ ខណៈការធ្វើពាណិជ្ជកម្មជាអន្តរជាតិ ក៏មានកំណើន​កើន​ឡើង ​ជាបន្តបន្ទាប់ផងដែរ មកដល់បច្ចុប្បន្នការធ្វើពាណិជ្ជកម្ម ជាពិសេស​ការ​នាំ​ចេញ​ទំនិញ​របស់​កម្ពុជា​បាន​កំពុងហក់ឡើងគួកត់សម្គាល់។

លោក បន្តថា ជុំវិញបញ្ហានេះ សមាគមតែងតែយកចិត្តទុកដាក់ និងបានរៀបចំ​ឡើង​កម្ម​វិធី​ជំនួប​អាជីវកម្ម​ច្រើន​លើកមកហើយ ដោយមានគោលបំណងចង់ឱ្យបណ្តាក្រុមហ៊ុន និងសហគ្រាសដឹក​ជញ្ជូន និង​ឡូជីស្ទិក រួមជាមួយអ្នកផ្គត់ផ្គង់ផ្សេងៗ បានជួបជុំ ផ្លាស់ប្តូរបទពិសោធន៍ និង​ចំណេះ​ដឹង ​ការចែករំលែកគ្នាទៅវិញមកពីព្រឹត្តិការវិវត្តថ្មីៗ ក្នុងគោលដៅលើកកម្ពស់ការធ្វើពាណិជ្ជកម្ម នៅ​កម្ពុជា​កាន់តែខ្លាំងក្លា ទាំងប្រតិបត្តិការនៅក្នុងការធ្វើអាជីវកម្ម ក៏ដូចជាការដឹកជញ្ជូន និង​ឡូជីស្ទិក និងក៏ជាការចាប់យកកាលា-នុវត្តភាពថ្មីៗបន្ថែម ដើម្បីទាញយកប្រយោជន៍​ឱ្យ​បាន​ជា​អតិបរិមា​ ក្នុងបរិការណ៍កំពុងប្រួលប្រែនេះ។

ឯកឧត្តមបណ្ឌិត លី ធុជ ទេសរដ្ឋមន្រ្តី ប្រធានគណៈកម្មាធិការជាតិសេដ្ឋកិច្ចសង្គម សម្រាប់​តំបន់​អាស៊ី និងប៉ាស៊ីហ្វិក បាន កោតសរសើរចំពោះកិច្ចខិតខំប្រឹងប្រែង របស់​សមាគម​ពាណិជ្ជករ​ដឹក​ជញ្ជូន និង​ខ្សែច្រវាក់ផ្គត់ផ្គង់នៅកម្ពុជា ដែលបានរៀបចំឱ្យមាន ជំនួបពិភាក្សានេះឡើង ក្នុង​គោល​ដៅ​កសាង​នូវបណ្តាញទំនាក់ទំនង កិច្ចសហការ និងបំពេញចន្លោះឱ្យគ្នាទៅវិញទៅមក សម្រាប់ វិស័យ​ដឹកជញ្ជូននិងឡូជីស្ទីកនៅកម្ពុជា ក៏ដូចជាសម្រាប់ការកែលម្អអាជីវកម្មដឹកជញ្ជូន និងខ្សែ​ច្រវាក់​ផ្គត់​ផ្គង់នៅកម្ពុជា ដើម្បីរួម ចំណែកលើកកម្ពស់ដល់បរិយាកាសវិនិយោគ និងពាណិជ្ជកម្ម​ប្រកប​ដោយ​ការប្រកួតប្រជែង។ ឯកឧត្តមបណ្ឌិត ក៏បានស្នើឱ្យម្ចាស់ អាជីវកម្ម សហគ្រាស និង​វិនិយោគិន​ទាំង​អស់ បន្តផ្តល់ទំនុកចិត្ត និងជឿជាក់ចំពោះការដឹកនាំរបស់រាជរដ្ឋាភិបាលកម្ពុជា ដែល​មានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី ដើម្បីរួមគ្នាកសាងប្រទេសជាតិ និង​បង្កើតភាពរឹងមាំសម្រាប់អនាគតកម្ពុជា៕ អត្ថបទ៖ សុន រ៉ាឌី