នាយកដ្ឋានប្រយុទ្ធនឹងជំងឺឆ្លង ឆ្លើយតប ចំពោះការលើកឡើងថា ការចាក់វ៉ាក់សាំងកូវីដ-១៩ អាចបង្កជំងឺមហារីក

នាយកដ្ឋានប្រយុទ្ធនឹងជំងឺឆ្លង (CDC) នៃក្រសួងសុខាភិបាល ព្រះរាជាណាចក្រកម្ពុជា នៅ​រសៀល​នេះ បានបង្ហោះលើបណ្ដាញសង្គមហ្វេសប៊ុក ដោយបញ្ជាក់ថា រហូតដល់ ថ្ងៃទី១ ខែតុលា ឆ្នាំ២០២៥ នេះ អង្គការសុខភាពពិភពលោក (WHO) មិនទាន់រកឃើញថា ការចាក់វ៉ាក់សាំងកូវីដ-១៩ អាច​បង្ក​ជំងឺ​មហារីក​នោះ​ទេ។​ ការបញ្ជាក់ខាងលើរបស់នាយកដ្ឋានប្រយុទ្ធនឹងជំងឺឆ្លង (CDC) ធ្វើ​ឡើង​បន្ទាប់​ពី​មហាជន​មួយ​ចំនួន​មាន​ការ​ព្រួយបា​រម្ភ និងបង្ហោះតាមបណ្ដាញសង្គមថា៖ “អ្នកចាក់វ៉ាក់សាំងកូវីដ-១៩ កំពុងតែប្រឈមនឹងហានិភ័យជំងឺមហារីក”។

គួរឱ្យដឹងថា កាលពីថ្ងៃចន្ទទី២៩ ខែកញ្ញា ឆ្នាំ២០២៥ គេហទំព័រ Daily Mail បានផ្សាយ លទ្ធផល​ការ​សិក្សា​របស់ក្រុមអ្នកស្រាវជ្រាវនៅប្រទេសកូរ៉េខាងត្បូង ដែលបានរកឃើញថា អ្នកចាក់វ៉ាក់សាំងកូវីដ-១៩ មានហានិភ័យកើតជំងឺមហារីកចំនួន ៦ប្រភេទ ជាពិសេសមនុស្សពេញវ័យ។ ជាមួយគ្នានេះ ក្រុម​អ្នក​វិទ្យាសាស្ត្រ​នៅ​លើពិភពលោក បានចេញមុខច្រានចោលលទ្ធផលនេះថា គ្មានមូលដ្ឋាន គ្មាន​ភស្តុតាង​ច្បាស់​លាស់ និងមិនអាចយកជាការបានឡើយដែលថា វ៉ាក់សាំងកូវីដ មាន​ពាក់​ព័ន្ធ​នឹង​ការ​កកើត​ជំងឺមហារីក។

គួរបញ្ជាក់ថា បើតាម សេចក្តីជូនព័ត៌មាន ស្តីពីការសរុបស្ថានភាពជំងឺកូវីដ-១៩ ក្នុង​ព្រះរាជា​ណា​ចក្រ​កម្ពុជា ​សម្រាប់ថ្ងៃទី៣០ ខែកញ្ញា ឆ្នាំ២០២៥ នេះ កម្ពុជា មិនមាន ករណីឆ្លងថ្មី ខណៈកម្ពុជា មាន ការ​ឆ្លងជំងឺកូវីដ-១៩ សរុប មានចំនួន ១៣៩ ៦៤៨ករណី, ជាសះស្បើយសរុប ១៣៦ ៥៩២ករណី និង ស្លាប់ ៣ ០៥៦ករណី។ បើតាម របាយការណ៍អ្នកដែលបានចាក់វ៉ាក់សាំងបង្ការជំងឺកូវីដ១៩ ទូទាំង​ប្រទេស គិតត្រឹមឆ្នាំ២០២៤ ប្រជាពលរដ្ឋកម្ពុជាចំនួន ៩៥,៧៣% ក្នុងចំណោម ១៦លាន នាក់ បាន​ទទួលការចាក់វ៉ាក់សាំងកូវីដ១៩។ វ៉ាក់សាំងដែលបានប្រើនៅ កម្ពុជា មានដូចជា Sinopharm, AstraZeneca (Covishield), Sinovac, Janssen (Johnson&Johnson), Moderna, Pfizer ៕