កម្ពុជាធ្វើជាម្ចាស់ផ្ទះនៃកិច្ចប្រជុំស្ដីពីដំណើរទៅកាន់គំនិតផ្ដួចផ្ដើមនូវយុទ្ធសាស្ត្រគ្រប់គ្រងពាណិជ្ជកម្មអាវុធមហាប្រល័យ

ភ្នំពេញ ៖ អាជ្ញាធរជាតិទប់ស្កាត់អាវុធគីមី បានរៀបចំកិច្ចពិភាក្សាកម្រិតមន្ត្រីជាន់ខ្ពស់ ស្ដីពីដំណើរទៅកាន់គំនិតផ្ដួចផ្ដើមនូវយុទ្ធសាស្ត្រគ្រប់គ្រងពាណិជ្ជកម្មអាវុធមហាប្រល័យ ដោយកិច្ចប្រជុំនេះបានធ្វើឡើងរយៈពេលពីរ ថ្ងៃគឺថ្ងៃទី២៩ ដល់ថ្ងៃទី៣០ ខែកញ្ញា ឆ្នាំ២០២៥នេះ ដោយមានការចូលរួមពីអាម៉េរិក សភាពអឺរ៉ុប អង្គការ UNOPA និងដៃគូអន្តរជាតិជាច្រើនទៀត។

ថ្លែងនៅក្នុងពិធីបិទនៃកិច្ចប្រជុំនោះ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានអាជ្ញាធជាតិរទប់ស្កាត់អាវុធគីមី នុយក្លេអ៊ែរ ជីវសាស្ត្រ និងវិទ្យុសកម្មបានអំណរអរគុណចំពោះស្ថានទូតសហរដ្ឋអាមេរិកប្រចាំកម្ពុជា ដែលបានផ្តួចផ្តើម រៀបចំកិច្ចសន្ទនានេះឡើង ធ្វើឲ្យគ្រប់ភាគីចូលរួមយល់ជ្រួតជ្រាបនូវចំណេះដឹង បទពិសោធន៍ ក្នុងន័យបង្កើននូវកិច្ចសហប្រតិបត្តិការកាន់តែជិតស្និទ្ធជាមួយគ្នាបន្ថែមទៀត លើវិស័យគ្រប់គ្រងពាណិជ្ជកម្មអាវុធមហាប្រល័យ។

ឯកឧត្តម នាយឧត្តមសេនីយ៍ ទៀ សីហា បានគូសបញ្ជាក់ថា គំនិតផ្តួចផ្តើមនេះ គឺជាកិច្ចខិតខំប្រឹងប្រែង និងកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក តាមរយៈស្ថានទូតអាមេរិកប្រចាំកម្ពុជា ក្រោមកិច្ចឧបត្ថម្ភដល់កម្មវិធីត្រួតពិនិត្យការនាំចេញ និងពាក់ព័ន្ធទៅនឹងសន្តិសុខព្រំដែនរបស់ក្រសួងការបរទេសសហរដ្ឋអាមេរិកដែលនឹងជួយដល់កម្ពុជាលើការកសាងសមត្ថភាពសម្រាប់ការគ្រប់គ្រងពាណិជ្ជកម្ម យុទ្ធសាស្ត្រពាក់ព័ន្ធ និងអាវុធមហាប្រល័យ និងការពិនិត្យគ្រប់គ្រងប្រកបដោយប្រសិទ្ធភាពអាវុធមហាប្រល័យ និងទំនិញ ឲ្យស្របតាមបទដ្ឋានអន្តរជាតិ ដែលរួមមានជាអាទិ ដូចជា សេចក្តីសម្រេចចិត្តរបស់ក្រុមប្រឹក្សាសន្តិសុខ អង្គការសហប្រជាជាតិលេខ ១៥៤០ ។

ប្រការនេះ បង្ហាញថាកម្ពុជាបានត្រៀមខ្លួនរួចជាស្រេច ក្នុងការចូលរួមចំពោះគំនិតផ្តួចផ្តើម និងធានាបានធ្វើពាណិជ្ជកម្មរបស់យើងមិនត្រឹមតែគិតពីសេដ្ឋកិច្ចតែប៉ុណ្ណោះ ប៉ុន្តែបានគិតគូដល់កត្តាសន្តិភាព សន្តិសុខក្នុងតំបន់ និងសកលលោកផងដែរ។កម្ពុជាចាត់ទុកថាការចាប់ផ្តើមដំណើរការជាផ្លូវការនូវដំណើរឆ្ពោះទៅកាន់គំនិតផ្តួចផ្តើមយុទ្ធសាស្ត្រគ្រប់គ្រងពាណិជ្ជកម្មអាវុធមហាប្រល័យនាពេលនេះ គឺជាការចាប់ផ្តើមបើកទំព័រថ្មី មួយថែមទៀតនៃកិច្ចសហប្រតិបត្តិការដែលកំណត់ដោយចក្ខុវិស័យមួយរូមគ្នា និងការជឿទុកចិត្តគ្នាទៅវិញទៅមកក្នុងភាពជាដៃគូរវាងរាជរដ្ឋាភិបាលកម្ពុជា រដ្ឋាភិបាលសហរដ្ឋអាមេរិក និងសហគមអន្តរជាតិ សម្រាប់កម្ពុជាវឌ្ឍនភាពសេដ្ឋកិច្ចរបស់យើងត្រូវតែដើរទន្ទឹមគ្នាជាមួយនឹងការទទួលខុសត្រូវលើការទប់ស្កាត់ការរីកសាយភាយនៃអាវុធមហាប្រល័យ ជាការលើកកម្ពស់សន្តិសុខក្នុងតំបន់ ការពង្រីងតួនាទីជាភាពដៃគូ ដែលអាចជឿទុកចិត្តបានក្នុងសហគមអន្តរជាតិ។ ចំពោះការងារនេះ កម្ពុជាពិតជាមិនអាចដំណើរការទៅបានតែម្នាក់ឯងបាននោះទេ ភាពជាដៃគូគឺពិតជាសំខាន់មិនអាចកាត់ថ្លៃបាន។

ឆ្លៀតក្នុងឱកាសនេះ ឯកឧត្តមប្រមុខការពារជាតិកម្ពុជា ក៏បានបញ្ជាក់ផងដែរថា អាជ្ញាធរជាតិទប់ស្កាត់អាវុធគីមី នុយក្លេអ៊ែរ ជីវសាស្ត្រ និងវិទ្យុសកម្ម (ឬអាជ្ញាធរជាតិអាវុធគីមី) នឹងដើរតួនាទីស្នូល ក្នុងការសម្របសម្រួលសហការ និងចូលរួមអនុវត្តក្នុងគំនិតផ្តួចផ្តើមនេះ ជាមួយនិងកម្មវិធីត្រួតពិនិត្យការនាំចេញ និងសន្តិសុខព្រំដែនរបស់ក្រសួងការបរទេសសហរដ្ឋអាមេរិក ព្រមទាំងមានការប្តេជ្ញាចិត្តខ្ពស់ក្នុងការជួយសម្របសម្រួលអនុវត្តការងារនេះឲ្យទទួលបានជោគជ័យតាមការគ្រោងទុកផងដែរ៕

អត្ថបទ ៖ បាន ចក់​