រដ្ឋបាលខេត្តបន្ទាយមានជ័យ ចែកវិញ្ញាបនបត្រសម្គាល់ម្ចាស់អចលនវត្ថុ ៨ថ្ងៃ នៅវត្តប្រាសាទ​ស្រះកណ្តាល​ខ្ចាស់

រដ្ឋបាលខេត្តបន្ទាយមានជ័យ បានផ្សាយ សេចក្តីជូនដំណឹងស្តីពី ការចែក​វិញ្ញាបនបត្រ​សម្គាល់​ម្ចាស់​អចលនវត្ថុ និងមោឃភាពនៃប័ណ្ណសម្គាល់សិទ្ធិកាន់កាប់ប្រើប្រាស់ដីធ្លី ឫប័ណ្ណសម្គាល់​សិទ្ធិ​កាន់​​កាប់​អចលនវត្ត នៅភូមិខ្ចាស់ ភូមិខ្ញែរ ភូមិឃូស្វាយ ឃុំបុស្បូវ ស្រុកព្រះនេត្រព្រះ ខេត្ត​បន្ទាយ​មានជ័យ រយៈពេល ៨ថ្ងៃ ចាប់ពីថ្ងៃទី០២-០៩ ខែតុលា ឆ្នាំ២០២៥ នៅវត្តប្រាសាទ​ស្រះ​កណ្តាល​ខ្ចាស់​។ ផុតកំណត់ ត្រូវទៅយកនៅមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្ត​បន្ទាយ​មានជ័យ។

រដ្ឋបាលខេត្តបន្ទាយមានជ័យ បានជូនដំណឹងដល់ ម្ចាស់ក្បាលដី ដែលស្ថិតក្នុងតំបន់វិនិច្ឆ័យ ក្នុង​ភូមិ​ខ្ទាស់ ភូមិខ្មែរ ភូមិឃូស្វាយ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ ឱ្យបាន​ជ្រាប​ថា ​ក្រោមដំណើរការនៃការចុះបញ្ជីដីធ្លីមានលក្ខណៈជាប្រព័ន្ធ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បន្ទាយមានជ័យ នឹងចែកវិញ្ញាបនបត្រសម្គាល់ម្ចាស់អចលនវត្ថុ (បណ្ណ​ក​ម្មសិទ្ធិ) ជូនដល់ម្ចាស់ក្បាលដីដែលស្ថិតក្នុងតំបន់វិនិច្ឆ័យ ខាងលើ ចាប់ពីថ្ងៃទី២ ដល់​ទី​៩​ ខែតុលា ឆ្នាំ២០២៥ ទីតាំងស្ថិតនៅវត្តប្រាសាទ ស្រះកណ្តាលម្ចាស់ ភូមិខ្ចាស់ ឃុំបុស្បូវ ស្រុក​ព្រះ​នេត្រ​ព្រះ ខេត្តបន្ទាយមានជ័យ។

ផុតរយៈពេលកំណត់ មន្ត្រីជំនាញមន្ទីរ នឹង បន្តចែកបណ្ណជូនបងប្អូនប្រជាពលរដ្ឋ នៅមន្ទីរ​រៀប​ចំ​ដែន​ដី នគរូបនីយកម្ម សំណង់ និងសុរិយោដី ខេត្តបន្ទាយមានជ័យ រៀងរាល់ម៉ោងធ្វើការ ដោយ​មិន​កំណត់រយៈពេល។ ចំពោះបណ្ណសម្គាល់សិទ្ធិកាន់កាប់ប្រើប្រាស់ដីធ្លី ( បណ្ណស្លាបមាន់) ឬ​បណ្ណ​សម្គាល់​សិទ្ធិកាន់កាប់អចលនវត្ថុ ដែល បានចេញដោយរដ្ឋបាលសុរិយោដី កន្លងមកក្នុង​តំបន់​វិនិច្ឆ័យ​នេះ នឹងអស់សុពលភាពតាមផ្លូវច្បាប់ចាប់ពីថ្ងៃចែកវិញ្ញាបនបត្រ សម្គាល់ម្ចាស់​អចលន​វត្ថុ ខាងលើនេះតទៅ។

ដូច្នេះ ម្ចាស់ក្បាលដីដែលមានបណ្ណសម្គាល់សិទ្ធិកាន់កាប់ប្រើប្រាស់ដីធ្លី ឬបណ្ណ សម្គាល់​សិទ្ធិ​កាន់​កាប់​អចលនវត្ថុ កន្លងមក មេត្តាយកបណ្ណទាំងនោះ មកប្រគល់ឱ្យមន្ត្រីរដ្ឋបាលសុរិយោដី ដើម្បី​ទទួល​យក​វិញ្ញាបនបត្រសម្គាល់ម្ចាស់អចលនវត្ថុថ្មីជំនួសវិញ។ ចំពោះម្ចាស់បំណុល ដែលបាន​ទទួល​ដាក់​បញ្ចាំ ឬហ៊ីប៉ូតែក ពាក់ព័ន្ធនឹងក្បាលដីក្នុងតំបន់វិនិច្ឆ័យខាងលើ សូមយក បណ្ណ​ទាំង​នោះ​ មកប្រគល់ជូនមន្ត្រីរដ្ឋបាលសុរិយោដី ធ្វើនិយ័តកម្ម ដើម្បីធានាប្រាក់របស់លោកអ្នក៕