រយៈពេល៩ខែនេះ CDC អនុម័តគម្រោងវិនិយោគបានចំនួន ៥៤៦ មានទុនសរុប ៧,៨ ប៊ីលានដុល្លារ

ភ្នំពេញ ៖ នៅក្នុងរយៈពេល៩ ខែ ឆ្នាំ២០២៥, ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគសរុបចំនួន៥៤៦ គម្រោង កើន ឡើងប្រមាណ ៧៣% ធៀបនិងឆ្នាំមុន ក្នុងទុនវិនិយោគសរុប ៧,៨ ប៊ីលានដុល្លារអាម៉េរិក នឹងបង្កើតការងារបានជាង ៣៧៦ កន្លែង។

​ក្រុមប្រឹក្សាអភិវឌ្ឍន៍កម្ពុជា ចេញសេចក្តីប្រកាសព័ត៌មាន លើការអនុម័តគម្រោងវិនិយោគនៅព្រះរាជាណាចក្រកម្ពុជា ក្នុង នោះសម្រាប់ខែ កញ្ញា ឆ្នាំ២០២៥នេះ, គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចុះបញ្ជីគម្រោង វិនិយោគសរុបចំនួន ៥៥ គម្រោង ក្នុងទំហំទុនវិនិយោគសរុបប្រមាណ ៤៦៧ លានដុល្លារអាម៉េរិក និងអាចបង្កើតការងារបានប្រមាណ ៣៧ ពាន់កន្លែង។ ក្នុងចំណោមគម្រោងវិនិយោគសរុប ក្នុងនោះគម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេស មានចំនួន ៣៨ គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ១៧ គម្រោង។

ចំណែកនៅក្នុងរយៈ៩ ខែ ឆ្នាំ២០២៥, ក្រុមប្រឹក្សាអភិវឌ្ឍន៍កម្ពុជា សម្រេចុះបញ្ជីគម្រោងវិនិយោគចំនួន ៥៤៦ គម្រោង ក្នុង ទំហំទុនវិនិយោគសរុបប្រមាណ ៧,៨ ប៊ីលានដុល្លារអាម៉េរិក ស្មើនឹងប្រមាណ ៤៧% បើប្រៀបធៀបរយៈពេលដូចគ្នាក្នុងឆ្នាំ២០២៤ ដោយគម្រោងវិនិយោគបានកើនឡើងចំនួន ២៣១ គម្រោង ស្មើនឹងប្រមាណ ៧៣% មានទុនវិនិយោគមានការកើនឡើងប្រមាណ ២,៥ ប៊ីលានដុល្លារអាម៉េរិក ខណៈនៅក្នុងរយៈពេល ៩ ខែ ក្នុងឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជាចុះបញ្ជីគម្រោង វិនិយោគបាន ត្រឹមតែ ៣១៥ គម្រោង ក្នុងទំហំទុនវិនិយោគប្រមាណ ៥,៣ ប៊ីលានដុល្លារអាម៉េរិកប៉ុណ្ណោះ។

សូមបញ្ជក់ថា នៅក្នុងរយៈពេល ៩ ខែនេះ ប្រភពទុនដែលវិនិយោគនៅកម្ពុជាដែលឈានមុខគេរួមមាន៖ ប្រទេសចិន ជិត ៥៣%, ការវិនិយោគក្នុងស្រុក ជាង ៣០%, សឹង្ហបុរី ជិត ៧%, វៀតណាម ជាង ៥%, កោះ British Virgin ២% និងមានប្រទេសផ្សេងៗទៀត បានវិនិយោគនៅកម្ពុជាមានកំណើនល្អប្រសើរផងដែរ។ ចំណែកទុនវិនិយោគតាមវិស័យវិញឃើញថា ការវិនិយោគលើវិស័យឧស្សាហ កម្ម ៥,៣ ប៊ីលានដុល្លារ, កសិកម្មនិងកសិឧស្សាហកម្ម ៤០៥ លានដុល្លារ, ទេសចរណ៍ ១៧៥ លានដុល្លារ និងការវិនិយោគ លើហេដ្ឋារចនាសម្ព័ន្ធផ្សេងៗ មានទឹកប្រាក់ប្រមាណជិត ២ ប៊ីលានដុល្លារផងដែរ៕

អត្ថបទ៖ សុន រ៉ាឌី