កម្ពុជា-វៀតណាម គ្រោងបង្កើតឱ្យមានយន្តការកិច្ចសន្ទនារវាងរដ្ឋ និងឯកជនពង្រឹងការធ្វើធុរកិច្ច នៅកម្ពុជា

កម្ពុជា-វៀតណាម ពិភាក្សា​លើ​គម្រោង​បង្កើត​ឱ្យ​មាន​យន្តការ​កិច្ច​សន្ទនា​រវាង​រដ្ឋ និង​វិស័យ​ឯក​ជន​នៃ​ប្រទេសទាំងពីរ ដើម្បីរួមចំណែក ក្នុងការកែលម្អបរិស្ថានធុរកិច្ច សំដៅ​ពង្រឹង និង​ពង្រីក​វត្ត​មាន​របស់​សហ​គ្រាសវិនិយោគវៀតណាម ឱ្យមកបណ្តាក់ទុនវិនិយោគនៅលើ ទឹកដីកម្ពុជា​បន្ថែម​ទៀត​។

ឯកឧត្តម NGUYEN Minh Vu ឯកអគ្គរដ្ឋទូតវិសាមញ្ញនិងពេញសមត្ថភាព នៃ​សាធារណ​រដ្ឋ​សង្គម​និយម​វៀតណាម ប្រចាំ ព្រះរាជាណាចក្រកម្ពុជា និងសហការី នៅថ្ងៃទី២ ខែតុលា ឆ្នាំ​២០២៥ ម្សិលមិញនេះ ចូលជួបសម្តែងការគួរសម និងពិភាក្សាការងារ ជាមួយ ឯកឧត្តម ស៊ុន ចាន់​ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា, ក្នុងជំនួបនោះ ឯកឧត្តម​ឯកអគ្គរដ្ឋទូត បានសម្តែងនូវអំណរគុណយ៉ាងជ្រាលជ្រៅចំពោះប្រមុខរាជរដ្ឋាភិបាលកម្ពុជា ដែល​បាន​ចូល​រួមអបអរសាទរខួបលើកទី៨០ នៃទិវា ឯករាជ្យជាតិ របស់​សាធារណ​រដ្ឋ​សង្គម​និយម​វៀត​ណាម ​កាលពីថ្ងៃទី២ ខែកញ្ញា ឆ្នាំ២០២៥ កន្លងទៅ និងបានចាត់ទុកការចូលរួមនេះ ជាការ​ផ្តល់​កិត្តិយស​ដ៏​ធំធេង និងបង្ហាញពីសក្ខីភាពដ៏រឹងមាំ នៃចំណងសាមគ្គីភាពមិត្តភាពជាប្រពៃណី និង​ក្តី​ស្រលាញ់​ដ៏​ជ្រាលជ្រៅ ក្នុងនាមជាអ្នកជិតខាងល្អ។

ឯកឧត្តឯកអគ្គរដ្ឋទូត ក៏បានសម្តែងការកោតសសើរចំពោះក្រុមប្រឹក្សាអភិវឌ្ឍន៍កម្ពុជា ជុំវិញ​ការ​បំបែក​​កំណត់ត្រាការអនុម័ត ចំនួនគម្រោងវិនិយោគក្នុងឆ្នាំ២០២៤ និងកា​រ​ឈាន​ទៅ​បំបែក​កំណត់​ត្រា​សារជាថ្មីម្តងទៀតក្នុងឆ្នាំ២០២៥ លទ្ធផលនេះ បានបង្ហាញ ឱ្យឃើញពីការ​យក​ចិត្ត​ទុក​ដា​ក់ខ្ពស់ ក្នុងការលើកកម្ពស់បរិយាកាសវិនិយោគនៅកម្ពុជា ឱ្យកាន់តែ​មាន​ភាព​អំណោយ​ផល ​និងជាទីទុក ចិត្តសម្រាប់ការវិនិយោគដោយផ្ទាល់ពីបរទេស។

ជាការឆ្លើយតប ឯកឧត្តមឧបនាយករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅចំពោះ ឯកឧត្តម​ឯកអគ្គរដ្ឋទូត ដែល អញ្ជើញមកបំពេញបេសកកម្មការទូតនៅកម្ពុជា ហើយរំពឹងថា ឯកឧត្តម​ឯកអគ្គរដ្ឋទូត នឹងរួមចំណែកយ៉ាងសកម្ម ក្នុងការជំរុញបន្ថែម ទៀត នូវ​ទំនាក់​ទំនង​ដ៏​ស្អិត​រមួត ភូមិផងរបងតែមួយឱ្យកាន់តែមានភាពល្អប្រសើរឡើង និងហុច​ផល​ប្រយោជន៍​ទៅ​វិញ​ទៅ​មក​។ ឯកឧត្តមឧបនាយករដ្ឋមន្ត្រី បានបន្ថែមថា ក្រុមប្រឹក្សាអភិវឌ្ឍន៍កម្ពុជា ដែលជា​សេនា​ធិការ​ច្រក​ចេញ​ចូលតែមួយរបស់រាជរដ្ឋាភិបាល បានត្រៀមលក្ខណៈរួចរាល់ជានិច្ច ក្នុងការសម្រប​សម្រួល​រាល់​គ្រប់កិច្ចការងារវិនិយោគរបស់វិស័យឯកជនពីគ្រប់បណ្តាប្រទេសជាមិត្ត សំដៅ​ធានា​បាន​នូវ​បរិយាកាសវិនិយោគ ប្រកបដោយភាពបត់បែន អំណោយផល និងអនុ​គ្រោះ​បំផុត​ជូន​ដល់​វិនិយោគិន​។ ជាមួយ គ្នានេះ ឯកឧត្តមឧបនាយករដ្ឋមន្ត្រី និងឯកឧត្តមឯកអគ្គរដ្ឋទូត ក៏បាន​ពិភាក្សា​លើ​ការពិនិត្យលទ្ធភាព ក្នុងការបង្កើតឱ្យមានយន្តការ កិច្ចសន្ទនា រវាងរដ្ឋ និង​វិស័យ​ឯកជន​ កម្ពុជា-វៀតណាម សំដៅពង្រឹង និងពង្រីកវត្តមានរបស់សហគ្រាសវិនិយោគវៀតណាម ឱ្យ​មកបណ្តាក់ទុនវិនិយោគនៅលើទឹកដីកម្ពុជាបន្ថែមទៀត៕ អត្ថបទ៖ សុន រ៉ាឌី