កម្ពុជាដាក់ឱ្យប្រើប្រាស់ផ្លូវការ ផែនការ​សកម្មភាពជាតិ​ការទប់ស្កាត់ និង​ឆ្លើយ​តប​ចំពោះ​អំពើ​ហិង្សា​លើ​កុមា​រ​ឆ្នាំ២០២៥-២០៣០

ក្រសួងសង្គមកិច្ច អតីតយុទ្ធជន និងយុវនីតិសម្បទា បាន​ប្រកាស​ដាក់​ឱ្យ​ប្រើ​ប្រាស់​ផែន​ការ​សកម្ម​ភាព​ជាតិ​ស្តីពី ការទប់ស្កាត់ និងឆ្លើយតបចំពោះអំពើហិង្សាលើកុមារឆ្នាំ២០២៥-២០៣០ ក្នុង​គោល​ដៅ​ចូល​រួមទប់ស្កាត់ និងឆ្លើយតបចំពោះ​អំពើ​ហិង្សា​លើ​កុមារ​ឱ្យ​កាន់​តែ​មាន​ប្រសិទ្ធភាព និង​សក្តិ​សិទ្ធិភាព ឆ្លើយតបទៅនឹងតម្រូវការរបស់កុមាររងគ្រោះ និងងាយរងគ្រោះ។

នៅក្រោយចប់ពិធីដាក់ឱ្យប្រើប្រាស់ផែនការសកម្មភាពជាតិ នៅព្រឹកថ្ងៃទី៦ ខែតុលានេះ ឯកឧត្តម គីម សុវណ្ណឌី អគ្គលេខាធិការនៃអគ្គលេខាដ្ឋានក្រុមប្រឹក្សាជាតិកម្ពុជាដើម្បីកុមារ បាន​មាន​ប្រសាសន៍​ប្រាប់ព័ត៌មាន ប៊ីធីវី ឱ្យដឹងថា ផែនការនេះ បង្កើតឡើងដើម្បីធានាថា កុមារត្រូវ​បាន​ការពារ​ និងមានសុវត្ថិភាពគ្រប់ទីកន្លែង ដូចជានៅផ្ទះ សាលារៀន កន្លែងថែទាំជំនួស និង​ក្នុង​សហគមន៍​ ព្រមទាំងធានាឱ្យបានថា កុមារទាំងអស់​នឹង​រស់​នៅ​ក្នុង​បរិយាកាស​មួយ​ប្រកប​ដោយ​ភាព​ថ្លៃ​ថ្នូរ ការអភិវឌ្ឍ ក្តីស្រលាញ់ និងកិច្ចការពារ សំដៅបញ្ចប់អំពើហិង្សាគ្រប់ទម្រង់លើកុមារ និ​ង​ឈាន​ទៅសម្រេចបានតាមគោលដៅអភិវឌ្ឍន៍ប្រកបដោយចីរភាពនៅត្រឹមឆ្នាំ២០៣០។ ផែនការសកម្មភាពជាតិនេះដែរ គឺចង់បង្ហាញថា រាជរដ្ឋាភិបាល​បាន​នឹង​កំពុង​ជំរុញ​ដំណើរ​កា​រ​កែ​ទម្រង់​យ៉ាង​ពិតប្រាកដដើម្បីសម្រេចឱ្យបាននូវកិច្ចការកុមារមួយ ដែលមានលក្ខណៈ​ស្រប​តាម​បទ​ដ្ឋាន​ជាតិ ​និងអន្តរជាតិ ក្នុងការលើកស្ទួយការគោរពសិទ្ធិ និងធានាយុត្តិធម៌សម្រាប់កុមារ។

ក្នុងពិធីប្រកាសដាក់ប្រើប្រាស់ផែនការខាងលើនេះ លោកជំទាវ ខៀវ បូរី រដ្ឋលេខាធិការ​ក្រសួង​សង្គ​ម​កិច្ច អតីតយុទ្ធជន និងយុវនីតិសម្បទា បានមានប្រសាសន៍បញ្ជាក់ថា អំពើហិង្សាលើកុមារ គឺ​ជា​បញ្ហា​ដែលប៉ះពាល់ដល់សិទ្ធិ សុវត្ថិភាព និងអនាគតរបស់ពួកគេ។ ការថែរក្សា​និង​ការ​ពារសុ​វត្ថិភាព​កុមារ គឺជាកាតព្វកិច្ចរួមគ្នារបស់យើងទាំងអស់គ្នា។

លោកជំទាវ បានលើកឡើងថា ខណៈដែលរាជរដ្ឋាភិបាល បាននិងកំពុងបោះជំហានទៅមុខ ក្នុង​ការ​ស្តារ និង​អភិវឌ្ឍសេដ្ឋកិច្ច តាមរយៈការកសាងធនធានមនុស្ស ជំនាញ និងសុខុមាល​ភាព​ប្រជាជន ដោយបានវិភាជធនធានបន្ថែមទៀតដល់វិស័យសុខាភិបាល អប់រំ សង្គមកិច្ច និង​វិស័យ​ផ្សេង​ៗ​ទៀតដែលទាក់ទងនឹងការអភិវឌ្ឍធនធានមនុស្ស រួមទាំងការអភិវឌ្ឍកុមារ ដើម្បី​ឈាន​ទៅ​សម្រេច​បាន​គោលដៅ អភិវឌ្ឍន៍សហស្សវត្សរ៍កម្ពុជា។ លោកជំទាវបានស្នើរដល់ថ្នាក់ដឹកនាំក្រសួង ស្ថាប័ន និងដៃគូពាក់ព័ន្ធ ដាក់បញ្ចូល​សកម្ម​ភាព​ពាក់​ព័ន្ធ ​ដែលបានកំណត់នៅក្នុងផែនការសកម្មភាពជាតិនេះ ទៅក្នុងផែនការយុទ្ធសាស្រ្ត និងផែនការ​ប្រតិបត្តិ​ប្រចាំ​ឆ្នាំ របស់ក្រសួងស្ថាប័នសាម៉ី ដើម្បីជំរុញការអនុវត្តផែនការជាតិនេះឱ្យបានផុលផុស និង​ទូលំ​ទូលាយ និងដើម្បីដោះស្រាយបញ្ហាកុមារឱ្យទទួលបានលទ្ធផលកាន់តែល្អប្រសើរ៕  អត្ថបទ៖ ឈិត បូរ៉ាវី