ឯកឧត្ដម ហ៊ុន ម៉ានី ថ្លែងថា ទង្វើដែលជនជាតិថៃដាក់តាំងរូបសម្ដេចតេជោបាញ់យករង្វាន់ ជាទង្វើអសីលធម៌ មិនសាកសមជាប្រជាជនស៊ីវិល័យទេ

ឯកឧត្ដម​ ហ៊ុន ម៉ានី ឧប​នាយក​រដ្ឋ​មន្ត្រី រដ្ឋមន្ត្រីមុខងារសាធារណៈ និងជាប្រធានសហភាព​សហព័ន្ធយុវជនកម្ពុជា បានថ្លែងថា ទង្វើ​ដែល​​ជនជាតិ​ថៃ​ដាក់​តាំង​រូប​សម្ដេច​តេជោ ហ៊ុន សែន​​បាញ់​​យករង្វាន់ គឺ​ជាទង្វើអសីលធម៌ គ្មាន​គុណធ​ម៌ និងមិន​សាក​សម​ជា​ប្រជាជន​ស៊ីវិល័យ​នោះ​ទេ​។

ឯកឧត្តម ហ៊ុន ម៉ានី បានលើកឡើងយ៉ាងដូច្នេះ​ បន្ទាប់​ពី​មាន​វីដេអូ​មួយត្រូវបាន​​ផ្សព្វ​ផ្សាយ​លើ​បណ្តាញ​សង្គម​ពីសកម្មភាពរបស់ជនជាតិថៃ ពាក់ឈុតកងកម្លាំងថៃ ​ឈរ​បាញ់​លើ​រូប​របស់​សម្តេច​តេជោ ហ៊ុន សែន ដើម្បី​យករង្វាន់។

តាមរយៈបណ្ដាញសង្គមនៅថ្ងៃទី៦ខែតុលានេះ ឯកឧត្ដម​ ហ៊ុន ម៉ានី បានសរសេរថា «កម្ពុជា​តែង​ប្រកាន់​ជំហរ​រក​ដំណោះស្រាយដើម្បីស្វែងរកសន្តិភាព ដើម្បីប្រទេសទាំងពីរ និង​ប្រជាជន​ទាំង​សង​ខាង​។ ប៉ុន្តែនេះ ជាទង្វើដ៏អសីលធម៌ គ្មានគុណធម៌ មិនសាកសមជាប្រជាជន​ស៊ីវិល័យ​នោះ​ទេ​។ ទោះក្នុងនាមជាកូន ឬជាខ្មែរមួយរូប ទង្វើខ្វះសីលធម៌បែបនេះ គឺជា​ទង្វើមិ​ន​អាច​ទទួល​យក​បាន​នោះ​ទេ។»

ឯកឧត្ដមបានបន្តទៀតថា ប្រជាជាតិទាំងសងខាង(កម្ពុជា-ថៃ) គួរ​បង្កើន​សកម្ម​ភាព​កសាង​ទំនុក​ចិត្ត​គ្នា ​ជាមួយសុឆន្ទៈពិតប្រាកដ ដើម្បីឈានទៅស្វែងរកដំណោះស្រាយសន្តិភាព និង​ប្រក្រតី​ភាព​ឡើង​វិញ ដោយត្រូវទប់ស្កាត់ឲ្យបាននូវទង្វើអសីលធម៌បែបនេះ មិនឲ្យកើតឡើងទៀត។

ពាក់ព័ន្ធ​វីដេអូឃ្លីបនេះដែរ សម្ដេចតេជោ ហ៊ុន សែន ក៏បានចេញសារ​ប្រតិកម្មផងដែរដោយ​សម្ដេច​​តេជោបានលើកឡើងថា «នេះឬជាជនជាតិស៊ីវិល័យមានគុណធម៌ សីលធម៌ និង​អរិយធម៌​ខ្ពស់​? សូម​ជនរួមជាតិកម្ពុជា កុំធ្វើទង្វើអាក្រក់បែបនេះដែលជាទង្វើអមនុស្ស និងអន់ជាងសត្វ។ ពួក​គេ​ធ្វើបែបនេះ​ក្នុងគោលដៅធ្វើឱ្យខ្ញុំបាត់បង់ការអត់ធ្មត់ក្នុងពេលបទឈប់បាញ់ កំពុង​ស្ថិត​ក្នុង​ស្ថាន​ភាព​ផុយ​ស្រួយ ឬយ៉ាងហោចណាស់ញុះញង់ឱ្យកងទ័ព និង ប្រជាជន​យើង​មួយ​ចំនួន​តប​ត​តាម​របៀប​បង្កអរិយភាព។ សូម​កុំប្រឡងយកខុសជាមួយគេធ្វើអី ព្រោះអំពើ​បែប​នេះ​ជា​អំពើ​អ​មនុស្ស និងអន់ជាងសត្វទៅទៀត។ ទោះ​ជា​ប្រទេស​យើងតូច ប្រជាជនយើងមានចំនួនតិច សេដ្ឋកិ​ច្ចយើងទន់ខ្សោយ តែ​យើង​កុំ​ខ្សោយ​ខាង​សីលធម៌។ យើងត្រូវ​តែ​បន្ត​ជា​ជាតិ​សាសន៍​ថ្លៃ​ថ្នូរ​មាន​សីលធម៌​ខ្ពស់»៕