អគ្គនាយកដ្ឋានអន្តោប្រវេសន៍ រកឃើញ គេហទំព័រក្លែងបន្លំ ឱ្យអ្នកដំណើរ​ចូលកម្ពុជា​តាម​អាកាស​យាន​ដ្ឋានបំពេញព័ត៌មាន

អគ្គនាយកដ្ឋានអន្តោប្រវេសន៍ ក្រសួងមហាផ្ទៃ នៃព្រះរាជាណាចក្រកម្ពុជា នៅថ្ងៃទី៧ ខែតុលា ឆ្នាំ​២០២៥នេះ បានចេញ សេចក្ដីជូនព័ត៌មាន ជូនសាធារណជនជាតិ និងអន្តរជាតិ ឱ្យបានជ្រាបថា ក្នុង​រយៈ​ពេល​ថ្មី​ៗនេះ គេហទំព័រដែលមានអាសយដ្ឋាន https://edocs.online/index.php បាន​ក្លែង​ប​ន្លំជា​គេហទំព័រផ្លូវការ​របស់​អគ្គនាយកដ្ឋានអន្តោប្រវេសន៍សម្រាប់​ឱ្យ​អ្នក​ដំណើរ​ចូល​ព្រះរាជា​ណា​ចក្រ​កម្ពុជា​តាមអាកាសយានដ្ឋានអន្តរជាតិបំពេញព័ត៌មានតាមប្រព័ន្ធ អេឡិចត្រូនិក​សលា​ក​បត្រ​ចូល​ព្រះរាជាណាចក្រកម្ពុជា ” Cambodia e-Arrival ” តាមរយៈគេហទំព័រមួយនេះ។

អគ្គនាយកដ្ឋានអន្តោប្រវេសន៍ បានបដិសេធចំពោះគេហទំព័រដែលមានអាសយដ្ឋានខាងលើ គឺ មិន​មែនជាគេហទំព័រស្របច្បាប់ ដែល​ត្រូវ​បង្កើត​ឡើង​ដោយ​អគ្គនាយកដ្ឋាន​អន្តោ​ប្រវេសន៍​នៃ​ក្រសួង​មហាផ្ទៃ​សម្រា​ប់​ប្រើប្រាស់​ក្នុង​ការ​បំពេញ​ព័ត៌មាន​តាម​ប្រព័ន្ធ​អេឡិច​ត្រូនិក​សលាក​បត្រ​ចូល​ព្រះរាជា​ណាចក្រកម្ពុជា នោះឡើយ។ សូមអ្នក​ដំណើរ​ចូល​ព្រះរាជា​ណា​ចក្រ​កម្ពុជា​តាម​អាកាស​យានដ្ឋានអន្តរជាតិទាំងអស់ធ្វើការពិនិត្យ ឱ្យបានច្បាស់លាស់ ជៀសវាងការ​ចូល​ទៅ​គេហ​ទំព័រ​ក្លែង​បន្លំ​នានា ដែលនាំឱ្យមានការខាតបង់ថវិកា ឬការ លួចយកព័ត៌មាន​ផ្ទាល់​ខ្លួន​ផ្សេង​ៗ​របស់​អ្នក​ប្រើប្រាស់ដោយខុសច្បាប់។

អគ្គនាយកដ្ឋានអន្តោប្រវេសន៍ បានបញ្ជាក់ជាថ្មីថា ការបំពេញព័ត៌មានតាមប្រព័ន្ធអេឡិចត្រូនិក សលាក​បត្រចូលព្រះរាជាណាចក្រកម្ពុជា ជាផ្លូវការ គឺតាមគេហទំព័រ “www.arrival.gov.kh” ឬ ” Cambodia e-Arrival” នៅក្នុងកម្មវិធី App Store និង Play Store នៅលើទូរស័ព្ទដៃ ឬ​ឧបករណ៍​អេឡិចត្រូនិកផ្សេងទៀត ហើយពុំតម្រូវឱ្យបង់ថ្លៃសេវានោះទេ៕