ឯកឧត្តមរដ្ឋមន្ត្រី ជា វ៉ាន់ដេត បានអញ្ជើញជាអធិបតីក្នុងពិធីបើកសន្និសីទជាតិស្តីពីកិច្ចការពារទិន្នន័យបុគ្គល ឆ្នាំ២០២៥

នៅព្រឹកថ្ងៃទី៧ ខែតុលា ឆ្នាំ២០២៥ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ ឯកឧត្តម Stefan Messerer ឯកអគ្គរដ្ឋទូតនៃសាធារណរដ្ឋសហព័ន្ធអាល្លឺម៉ង់ និងឯកឧត្តម Igor Diresmans ឯកអគ្គរដ្ឋទូតនៃសហភាពអឺរ៉ុបប្រចាំកម្ពុជា បានអញ្ជើញជាអធិបតីក្នុងសន្និសីទជាតិស្តីពីកិច្ចការពារទិន្នន័យបុគ្គលឆ្នាំ២០២៥ ក្រោមប្រធានបទ៖ “ការកសាងមូលដ្ឋានគ្រឹះសម្រាប់កិច្ចការពារទិន្នន័យបុគ្គលនៅកម្ពុជា៖ ការចែករំលែកបទពិសោធន៍ពីបណ្តាប្រទេសក្នុងតំបន់និងសកល” នៅសណ្ឋាគារ សាន់អេនមូន រីវើសាយ ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី តំណាងក្រសួង-ស្ថាប័ន តំណាងអង្គទូត តំណាងវិស័យឯកជន សមាគមពាណិជ្ជកម្ម អ្នកវិជ្ជាជីវៈសេរី អង្គការសង្គមស៊ីវិល ដៃគូអភិវឌ្ឍន៍ គ្រឹះស្ថានអប់រំស្រាវជ្រាវ ភ្ញៀវកិត្តិយសជាតិ និងអន្តរជាតិសរុបប្រមាណ ១៧០នាក់។

ថ្លែងក្នុងឱកាសនេះ ឯកឧត្តមរដ្ឋមន្ត្រី បានមានប្រសាសន៍ថា សន្និសីទជាតិស្តីពីកិច្ចការពារទិន្នន័យបុគ្គល ឆ្នាំ២០២៥ ដែលបានរៀបចំឡើងនៅថ្ងៃនេះ គឺជាចំណែកមួយនៃដំណើរការបរិវត្តឌីជីថលរបស់កម្ពុជា សំដៅរួមគ្នាកសាងនិងពង្រឹងភាពជឿជាក់ សុវត្ថិភាព និងគណនេយ្យភាពក្នុងសង្គមឌីជីថល ព្រមទាំងជាការប្តេជ្ញាចិត្តកសាងភាពជឿជាក់នៃការចាប់យកបច្ចេកវិទ្យាឌីជីថលនៅកម្ពុជា។

មុននឹងបញ្ចប់ ឯកឧត្តមរដ្ឋមន្រ្តី បានលើកទឹកចិត្តឱ្យមានការទទួលខុសត្រូវនិងរួមគ្នាការកសាងវប្បធម៌ការពារទិន្នន័យបុគ្គល ដើម្បីផ្តល់អត្ថប្រយោជន៍ដល់ប្រជាជន សេដ្ឋកិច្ច និងសង្គមរបស់ព្រះរាជាណាចក្រកម្ពុជា ព្រមទាំងជួយជំរុញដល់ពាណិជ្ជកម្មអន្តរជាតិស្របតាមគោលការណ៍ពហុនិយម៕