នាយករដ្ឋមន្ត្រីនៃកុំមិនវែលដូមីនីក បាន​អញ្ជើញមកដល់កម្ពុជាហើយ ដើម្បី​បំពេញ​ទស្សន​កិច្ច​ការងារ រយៈពេល៣ថ្ងៃ

ឯកឧត្តមបណ្ឌិត Roosevelt Skerrit នាយករដ្ឋមន្ត្រីនៃកុំមិនដែលដូមីនីក បាន​ដឹ​ក​នាំ​គណៈ​ប្រតិភូ​ជាន់​ខ្ពស់ម​កដល់អាកាសយានដ្ឋានអន្តរជាតិតេជោ តាមជើងយន្តហោះពិសេស ប្រកប​ដោយ​សុវត្ថិភាព​វេលាម៉ោង១០និង០០ នាព្រឹកថ្ងៃទី៨ ខែ តុលា ឆ្នាំ២០២៥ ដោយមានការ​ទទួល​ស្វាគមន៍​ពី​សំណាក់ឯកឧត្តម សុខ សូកេន រដ្ឋមន្រ្តីក្រសួងអធិការកិច្ច និង ឯកឧត្តម ជុំ សុន្ទរី រដ្ឋ​លេខា​ធិការ ក្រសួងការបរទេស និង សហប្រតិបត្តិការអន្តរជាតិ ព្រមទាំង​មន្រ្តី​ជាន់​ខ្ពស់​ជា​ច្រើន​រូប​ទៀត​ផងដែរ។

សូមជម្រាបជូនថា ក្នុងដំណើរទស្សនកិច្ចនេះ ឯកឧត្តមបណ្ឌិត Roosevelt Skerrit នឹងអញ្ជើញ​ចូល​ជួប​សម្តែងការ គួរសមជាមួយ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី និង​ជាប្រធាន ព្រឹទ្ធសភា នៃព្រះរាជាណាចក្រកម្ពុជា។

ឯកឧត្តមនាយករដ្ឋមន្ត្រី ក៏នឹងជួបពិភាក្សាការងារទ្វេភាគីជាមួយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅវិមានសន្តិភាព ផងដែរ។ នាយករដ្ឋមន្តី ទាំងពីរ នឹងពិភាក្សាស៊ីជម្រៅលើការពង្រឹងទំនាក់ទំនងដ៏កក់ក្ដៅ និង​ការ​ពង្រីក​កិច្ច​សហ​ប្រតិបត្តិការ ដែលផ្តល់ផលប្រយោជន៍ទៅវិញទៅមករវាងប្រទេសទាំងពីរ បន្ទាប់មក​នាយករដ្ឋ​មន្ត្រី​ទាំង​ពីរ នឹងអញ្ជើញធ្វើជាសាក្សីក្នុងពិធីចុះហត្ថលេខាលើអនុស្សារណៈនៃការយោគយល់គ្នា ស្តីពី​ការ​បង្កើតកិច្ចពិគ្រោះយោបល់ ទ្វេភាគី រវាងក្រសួងការបរទេសទាំងពីរ។

ដំណើរទស្សនកិច្ចការងាររបស់ ឯកឧត្តមបណ្ឌិត Roosevelt Skerrit មកកាន់ព្រះរាជាណាចក្រ- កម្ពុជា​នេះ នឹងពង្រឹងបន្ថែមទៀតនូវចំណងមិត្តភាព សាមគ្គីភាព និងកិច្ច​សហ​ប្រតិបត្តិការ​រវាង​ប្រជាជាតិ និងប្រជាជនទាំងពីរ៕