ចិនផ្តល់រថយន្តពន្លត់អគ្គិភ័យ ២គ្រឿងដល់​គណៈកម្មការសាងសង់ស្តូប​នយោបាយ​ឈ្នះ ឈ្នះ នៅ​ខេត្តកោះកុង

ស្ថានទូតចិនប្រចាំនៅកម្ពុជា បានផ្តល់រថយន្ត​ពន្លត់​អគ្គិភ័យ​ចំនួន​២​គ្រឿង​ជូន​ដល់​គណៈ​កម្មការ​សាង​សង់​ស្តូប​អនុស្សាវរីយ៍នយោបាយ ឈ្នះ ឈ្នះ នៅ​ខេត្តកោះកុង ក្នុងន័យរឹតចំណងមិត្តភាព និង​កិច្ច​សហប្រតិបត្តិការជាប្រវត្តិសាស្រ្តរវាងកម្ពុជា និងចិន។

លោក​វរៈសេនីយ៍ឯក Sheng Dazhi នាយការិយាល័យអនុព័ន្ធយោធាចិនប្រចាំនៅប្រទេសកម្ពុជា បាន​ថ្លែង​ក្នុង​ពិធីប្រគល់ និងទទួលរថយន្តពន្លត់អគ្គិភ័យចំនួន២គ្រឿងនេះថា ចិន និងកម្ពុជា ជា​មិត្ត​ភក្តិ រួមដំណើរទ្វេរភាគីអស់រយៈកាលរាប់ពាន់ឆ្នាំមកហើយ។ ចិន ជាប្រទេស​ដំបូង​គេ​ដែល​ផ្តល់​ជំនួយ​ដល់​កម្ពុជា ​បន្ទាប់ពីមានជម្លោះព្រំដែនកម្ពុជា និងថៃ ហើយ​ជា​ប្រទេស​ផ្តល់​ជំនួយ​ច្រើន​ជាង​គេផ​ង​ដែរ។

លោក Sheng Dazhi ក៏បានគូសបញ្ជាក់នៅថ្ងៃទី៩ ខែតុលា ឆ្នាំ២០២៥ទៀតថា កន្លងទៅ ចិន​បាន​ផ្តល់​ថវិកាចំនួន ១០ម៉ឺនដុល្លារ ក្នុងការសង្រ្គោះជនភៀសខ្លួននៅខេត្តឧត្តរមានជ័យ និងខេត្ត​ព្រះវិហារ​។ ជាក់ស្តែង ដើម្បីរឹតចំណងមិត្តភាព និងកិច្ចសហប្រតិបត្តិការ ស្ថានទូតចិននៅកម្ពុជា បន្ត​ផ្តល់​រថយន្ត​ពន្លត់​អគ្គិភ័យ​ជូន​ដល់​គណៈកម្មការ​សាង​សង់​ស្តូប​នយោបាយ​ ឈ្នះ ឈ្នះ ខេត្ត​កោះកុង ទុកប្រើប្រាស់តាមតម្រូវការចាំបាច់ ឬពេលមានគ្រោះ​អគ្គិភ័យ​ណា​មួយ​កើត​មាន​ឡើង​។

ដោយ​ឡែក​នាយឧត្តមសេនីយ៍ ប៊ុន លើត រដ្ឋលេខាធិការក្រសួងការពារជាតិ និងជា​អនុ​គណៈកម្មការ​សាងសង់ស្តូបនយោបាយ ឈ្នះ ឈ្នះ ខេត្តកោះកុង បានថ្លែង​អំណរគុណ​យ៉ាង​ជ្រោល​ជ្រៅជូ​ន​ចំពោះ​ស្ថាន​ទូត​ចិន​ប្រចាំ​នៅ​កម្ពុជា​ដែល​យក​ចិត្ត​ទុក​ដាក់​ខ្ពស់​លើ​ការ​ផ្តល់​ជំនួយ​ជា​រថយន្ត​ព​ន្លត់អគ្គិភ័យនៅពេលនេះ។

នាយឧត្តមសេនីយ៍ ប៊ុន លើត បានចាត់ទុកថា ជំនួយនេះ​បាន​បង្ហាញ​ពី​សណ្តាន​ចិត្ត​ដ៏​សប្បុរស​ធម៌​របស់​ស្ថាន​ឯកអគ្គរដ្ឋទូត​ចិន​នៅ​កម្ពុជា​ជូន​ចំពោះគណៈកម្មការសាងសង់ស្តូប។

គួរ​ជម្រាបថា ស្តូបអនុស្សាវរីយ៍នយោបាយ ឈ្នះ ឈ្នះ ខេត្តកោះកុង ដំណើរ​ការ​សាង​សង់​នៅ​ថ្ងៃ​ទី​៣០​ ខែឧសភា ឆ្នាំ២០២០ ក្រោមវត្តមានរបស់សម្តេចពិជ័យសេនា ទៀ បាញ់ ឧត្តមប្រឹក្សា​ផ្ទាល់​ព្រះមហាក្សត្រ និងជាប្រធានមូលនិធិទ្រទ្រង់ការកសាងវិមានឈ្នះឈ្នះ។ ស្តូប​នយោបា​យ​ឈ្នះ​ឈ្នះខេ​ត្តកោះកុង គ្រោងនឹងធ្វើពិធីសម្ពោធដាក់ឱ្យប្រើប្រាស់នៅថ្ងៃទី១៧ ខែមករា ឆ្នាំ​២០២៦​ខាង​​មុខនេះ៕ អត្តបទ៖ ឈឹម មករា