វិទ្យាស្ថាន BKI មកពីអូស្រ្តាលី ផ្តល់អាហារូបករណ៍ផ្នែកយានយន្តចំនួន៣០នាក់ ដល់វិទ្យាស្ថាន ITI នៅកម្ពុជា

ក្រោមកិច្ចសហការ រវាងវិទ្យាស្ថានបច្ចេកទេសឧស្សាហកម្ម និងក្រុមហ៊ុនឯកជន យុវជន​រៀន​ជំនាញ​ផ្នែក​វិស្វកម្ម​រថយន្តចំនួន ៣០នាក់ នឹងទទួលបានអាហាររូបករណ៍​ដើម្បី​បន្តការ​សិក្សា​ជំនាញ​ផ្នែក​យាន​យន្ត​។ ក្នុងនោះ យុវជនក៏នឹងអាចមានឱកាសបន្ថែមទៀត ដើម្បីទៅ​ធ្វើ​ការ​នៅ​អូស្រ្តាលី ​និងក្រុមហ៊ុនល្អៗនៅក្នុងស្រុកផងដែរ ក្រោយបញ្ចប់ការសិក្សា។

លោក សយ សុឃាង នាយករង នៃវិទ្យាស្ថានបច្ចេកទេសឧស្សាហកម្ម ហៅកាត់ភាសាអង់គ្លេស ITI នៅក្រោយចប់​សិក្ខា​សាលា​តម្រង់​ទិស​ផ្តល់ព័ត៌មាន​ដល់​និស្សិត​មជ្ឈ​មណ្ឌល​ឧត្តម​ភាព​យាន​យន្ត​កម្ពុជា​ (ACE) កាលពីព្រឹកថ្ងៃទី៩ តុលា ឆ្នាំ២០២៥នេះ បានមានប្រសាសន៍ប្រាប់ព័ត៌មាន ប៊ីធីវីឱ្យដឹងថា អាហាររូបករណ៍ទាំងនេះ គឺផ្តល់ជូនសម្រាប់​តែនិស្សិត​របស់​វិទ្យាស្ថាន​បច្ចេក​ទេស​ឧស្សាហកម្ម និងរៀនចាប់ពីឆ្នាំទី២ឡើងទៅប៉ុណ្ណោះ។ លោកបានបន្តថា ដើម្បីទទួលបានអាហាររូបករណ៍ទាំងនេះ និស្សិត​ទាំង​អស់​ត្រូវ​មាន​ចំណេះ​ដឹងខាង​វិស័យ​យាន​យន្ត ​ទាំងផ្នែកបច្ចេកទេស និងភាសាអង់គ្លេស ពីព្រោះការរៀនជំនាញ​តម្រូវ​ឱ្យ​ប្រើប្រាស់​ជា​ភាសា​បរទេស​។

ពាក់ព័ន្ធការរៀបចំសិក្ខាសាលាក្នុងពេលនេះ លោកនាយករង បានឱ្យដឹងថា ក្នុងគោល​បំណង​ដើ​ម្បី​ផ្សព្វ​ផ្សាយដល់និស្សិតឆ្នាំទី១ជំនាញវិស្វកម្មរថយន្ត ត្រៀម​លក្ខណៈសម្បត្តិ​ដើម្បី​បន្ត​ការ​សិក្សា​ឆ្នាំ​ទី​២ ដោយសហការជាមួយវិទ្យាស្ថាន BKI ប្រទេសអូស្រ្តាលី ដើម្បីផ្តល់ឱកាស​ដល់​និស្សិត​បញ្ចប់​ការ​សិក្សាទទួលបានសញ្ញាបត្រ២ នៅវិទ្យាស្ថានបច្ចេកទេសឧស្សាហកម្ម១ និង​មជ្ឈ​មណ្ឌល​ឧត្តម​ភាពយានយន្ត ដើម្បីឱ្យនិស្សិតមានឱកាសរៀនបណ្តើរ ចុះហាត់ការបណ្តើរ​ជាមួយ​ក្រុមហ៊ុន​ដៃគូ​ ដើម្បីទទួលបានបទពិសោធន៍បន្ថែម ក្រៅពីការសិក្សា។

លោក សាយ រតនៈ អគ្គនាយករងក្រុមហ៊ុន អ អិម អេ (ខេមបូឌា) បានលើកឡើងថា កិច្ច​សហការ​ជាមួយ​វិទ្យាស្ថាន ITI ដោយសារមានការគូសបញ្ជាក់របស់ ឯកឧត្តម ហេង សួរ រដ្ឋមន្រ្តី​ក្រសួង​ការងារ និងបណ្តុះបណ្តាលវិជ្ជាជីវៈ ដែលកិច្ចការទាំងអស់នេះ​​គឺ​ត្រូវ​សហការ​ជាមួយ​គ្រឹះ​ស្ថាន​អ​ប់រំបណ្តុះបណ្តាលជំនាញ ធីវ៉េត ដើម្បីធ្វើការ​សម្រួច​ជំនាញ​យាន​យន្ត​កម្ពុជា​ក្នុង​កម្រិត​ថ្មី​មួយ​ទៀត ​ដែលថ្ងៃក្រោយទៅនៅពេលរៀនចប់ យុវជនទាំងនោះអាច​ទៅ​ធ្វើ​ការ​នៅ​ប្រទេស​ណា​ក៏​បាន បន្ទាប់ពីប្រទេសកម្ពុជា។

សូមបញ្ជាក់ថា បច្ចុប្បន្ននេះ វិទ្យាស្ថានបច្ចេកទេសឧស្សាហកម្ម (ITI) មានផ្តល់អាហារូបករណ៍ ១០០% ជូនដល់សិស្សានុសិស្សជាប់ ឬធ្លាក់បាក់ឌុបជាច្រើនកន្លែង កម្រិត​សញ្ញា​បត្រ​ជាន់​ខ្ពស់​បច្ចេក​ទេស ​(បរិញ្ញាបត្ររង) សិក្សារយៈពេល២ឆ្នាំ លើជំនាញបច្ចេកទេស​ដែល​សុទ្ធ​តែ​មាន​តម្រូវ​ការ​ទីផ្សារ​ការងារ ស្ថិតក្រោមគម្រោង «ជំនាញដើម្បីការងារកាន់តែប្រសើរ» ដែលផ្តល់​ហិរញ្ញប្ប​ទាន​ដោយ​ធនាគារពិភពលោក។ មិនតែប៉ុណ្ណោះ និស្សិតក៏មានឱកាស​ចុះកម្ម​សិក្សា​នៅ​តាម​បណ្តា​ក្រុម​ហ៊ុន​ដៃគូ​របស់វិទ្យាស្ថាន។ ក្រោយចប់កម្មសិក្សា ប្រសិនបើនិស្សិតមានសមត្ថភាព និង​ឥរិយាបថ​ការងារល្អ អាចមាន​ឱកាស​ទទួល​បាន​ការងារ​នៅ​ក្រុមហ៊ុន​ដែល​ខ្លួន​ចុះ​កម្ម​សិក្សា​តែ​ម្តង​។ ក្រៅពីនោះសម្រាប់និស្សិតឆ្នើមក៏មានឱកាសទៅធ្វើការងារនៅក្រៅប្រទេសរួមមាន អូស្រ្តាលី និង​ជប៉ុន ទទួលបានប្រាក់ចំណូលខ្ពស់៕ អត្ថបទ៖ ឈិត បូរ៉ាវី