គម្រោងពង្រឹងសមត្ថភាពផលិតភាពជនបទ ទទួលជំនួយពីធនាគារ AIIB អនុវត្តបានជាង ៩៦%

គម្រោងពង្រឹងសមត្ថភាពផលិតភាពជនបទ (NRRPCP) ទទួលបានហិរញ្ញប្បទានសប្បទានពីធនាគារអភិវឌ្ឍន៍ហេដ្ឋារចនាសម្ព័ន្ធអាស៊ី (AIIB) សម្រាប់អនុវត្តរយៈពេល ៥ឆ្នាំ ចាប់ពីខែកុម្ភៈ ឆ្នាំ២០២១ ដល់ខែធ្នូ ឆ្នាំ២០២៥ ហើយគិតមកដល់ពេលនេះ គម្រោងសម្រេចបានវឌ្ឍនភាព ៩៦,៤៦%។

នារសៀលថ្ងៃព្រហស្បតិ៍ ២រោច ខែអស្សុជ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃទី៩ ខែតុលា ឆ្នាំ២០២៥  នៅទីស្ដីការក្រសួង ឯកឧត្តម ឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការអនុវត្តគម្រោងពង្រឹងសមត្ថភាពផលិតភាពជនបទ (NRRPCP) ដោយមានការអញ្ជើញចូលរួមពីសំណាក់ ឯកឧត្ដម ជាថ្នាក់ដឹកនាំ ព្រមទាំងលោក លោកស្រី មន្ដ្រីជំនាញដែលជាសមាសភាពអនុវត្តគម្រោងផងដែរ។

តាមរយៈបាយការណ៍របស់ ឯកឧត្តម សាន វិសាល រដ្ឋលេខាធិការ និងជានាយកគម្រោង និង លោក អ៊ួង ប៊ុនណ្ណាកា ប្រធានគ្រប់គ្រងគម្រោង បានបញ្ជាក់ថា គម្រោងពង្រឹងសមត្ថភាពផលិតភាពជនបទ (NRRPCP) ទទួលបានហិរញ្ញប្បទានសប្បទានពីធនាគារអភិវឌ្ឍន៍ហេដ្ឋារចនាសម្ព័ន្ធអាស៊ី (AIIB) សម្រាប់អនុវត្តរយៈពេល ៥ឆ្នាំ ចាប់ពីខែកុម្ភៈ ឆ្នាំ២០២១ ដល់ខែធ្នូ ឆ្នាំ២០២៥ ហើយគិតមកដល់ពេលនេះ គម្រោងសម្រេចបានវឌ្ឍនភាព ៩៦,៤៦% ក្នុងនោះគម្រោងបានស្ថាបនាផ្លូវក្រាលកៅស៊ូពីរជាន់ (DBST) និងបេតុងសរុបប្រវែង ២៧០គ.ម និងមានសំណង់សិល្បការ្យ ព្រមទាំងស្រះទឹកសហគមន៍ចំនួន ១១៨ស្រះ នៅក្នុងខេត្តគោលដៅចំនួន ៥ខេត្ត ដែលមានប្រជាពលរដ្ឋជាអ្នកទទួលផលដោយផ្ទាល់ និងដោយប្រយោលសរុបប្រមាណ ៤៨០ ០០០ នាក់។

បន្ទាប់ពីបានស្ដាប់របាយការណ៍រួចមក ឯកឧត្តម ឆាយ ឫទ្ធិសែន បានសម្តែងនូវការថ្លែងអំណរគុណ កោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងរបស់ថ្នាក់ដឹកនាំ និងមន្ដ្រីជំនាញគ្រប់លំដាប់ថ្នាក់ ក្នុងការអនុវត្តគម្រោងឱ្យសម្រេចបាននូវវឌ្ឍនភាពគួរជាទីមោទនៈ។ ជាមួយគ្នានោះដែរ ឯកឧត្តមរដ្ឋមន្ដ្រី ក៏បានផ្ដល់អនុសាសន៍សំខាន់ៗមួយចំនួន ដែលជាការតម្រង់ទិសដៅសម្រាប់ការអនុវត្តការងារ ជូនដល់ថ្នាក់ដឹកនាំ និងមន្ដ្រីជំនាញទាំងអស់ឱ្យបន្ដយកចិត្តទុកដាក់អនុវត្តតួនាទី ភារកិច្ចរបស់ខ្លួនឱ្យកាន់តែមានប្រសិទ្ធភាព ដើម្បីបំពេញកិច្ចការដែលនៅសេសសល់ និងបិទបញ្ចប់គម្រោងតាមផែនការដែលបានគ្រោងទុកតាមនីតិវិធីដែលមានជាធរមាន ព្រមទាំងត្រូវបន្ដពង្រឹងសមត្ថភាពឱ្យកាន់តែប្រសើរឡើងដើម្បីអនុវត្តគម្រោងនៅជំហានបន្ដទៀតផងដែរ៕