គ.ស.ម.ក.៖ សមាជិកព្រឹទ្ធសភាថៃបានជំរុញឱ្យក្រសួងការបរទេសថៃ​ពិនិត្យមើល​ករណី​ការប្រើប្រាស់សំឡេងរំខាន បំភិតបំភ័យ និងយាយីផ្លូវចិត្តពីយោធាថៃដល់ប្រជាជនកម្ពុជា

ក្រោយពីបានឃើញញត្តិបន្ទាន់របស់ គណៈកម្មាធិការសិទ្ធិមនុស្សកម្ពុជា (គ.ស.ម.ក.) ដាក់​បណ្តឹង​ទៅ ឧត្តមស្នងការអង្គការសប្រជាជាតិទទួលបន្ទុកសិទ្ធិមនុស្ស (OHCHR) នៅទី​ក្រុង​ហ្សឺណែវ ប្រទេសស្វីស ពាក់ព័ន្ធទៅនឹងការប្រើប្រាស់សំឡេងរំខាន បំភិតបំភ័យ និងយាយី​ផ្លូវ​ចិត្ត​ដល់​ប្រជាជនកម្ពុជានៅភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្ត​បន្ទាយ​មាន​ជ័យ​ នៅថ្ងៃទី១២ ខែតុលានេះ លោកជំទាវ Angkhana Neelapaijit សមាជិកព្រឹទ្ធសភាថៃ បាន​ជំរុញ​ឱ្យក្រ​សួងការបរទេសថៃ ពិនិត្យមើលករណីយនេះ។

តាមសេចក្ដីជូនដំណឹងរបស់ គណៈកម្មាធិការសិទ្ធិមនុស្សកម្ពុជា (គ.ស.ម.ក.) យោងតាម​កាសែត ​Khaosod English ចុះថ្ងៃទី១២ ខែតុលា ឆ្នាំ២០២៥ អំពីការលើកឡើងរបស់ លោក​ជំទាវ Angkhana Neelapaijit សមាជិកព្រឹទ្ធសភាប្រទេសថៃ ចំពោះញត្តិបន្ទាន់របស់ គ.ស.ម.ក. ប្តឹងទៅឧត្តមស្នងការអង្គការសប្រជាជាតិទទួលបន្ទុកសិទ្ធិមនុស្ស (OHCHR) ពាក់ព័ន្ធ​នឹងការប្រើប្រាស់ សំឡេងរំខាន ដែលជាទម្រង់នៃការបំភិតបំភ័យ និងយាយីផ្លូវចិត្ត នៅតាម​បណ្តោយព្រំដែនកម្ពុជា-ថៃ ពីសំណាក់កងទ័ពថៃ កាលពីថ្ងៃទី១១ ខែតុលា ឆ្នាំ២០២៥។

គ.ស.ម.ក. បានដកស្រង់ខ្លឹមសារទាំងស្រុងរបស់ លោកជំទាវ Angkhana Neelapaijit សមាជិក​ព្រឹទ្ធ​សភា​ប្រទេសថៃដោយបានបញ្ជាក់ថា៖«រាជរដ្ឋាភិបាលថៃ គួរតែបាន​ដឹង​ថា​រាល់​សកម្មភាព​ទាំង​ឡាយ​ណា​បង្ក​ឱ្យ​មានអារម្មណ៍ភ័យខ្លាច ឬប៉ះពាល់ដល់ផ្លូវចិត្តរ​បស់​ប្រជាជន​ទោះ​បី​ជា​អ្នក​ស្ថិត​ក្នុង​ស្ថានភាពជម្លោះក៏ដោយ ជាពិសេសក្រុមងាយរងគ្រោះ ដែលអាច​ជា​ការ​ធ្វើ​ទារុណ​កម្ម​ផ្លូវ​ចិត្ត​ក្រោម​អនុសញ្ញាប្រឆាំងទារុណកម្ម និងការប្រព្រឹត្តមកលើខ្លួន ឬទណ្ឌកម្ម ឯទៀតដែល​ឃោរ​ឃៅ ​អមនុស្សធម៌ ឬបន្ថោកបន្ទាប (CAT) ដែលប្រទេសថៃជារដ្ឋភាគី។ លោកជំទាវ បានជំរុញ​ឱ្យ​ក្រសួង​ការ​បរទេសរបស់ប្រទេសថៃ ពិនិត្យមើលលើករណីដែលជនល្បីឈ្មោះតាមបណ្តាញសង្គម បាន​ប្រើ​ប្រាស់សំឡេងខ្មោច នៅតាមព្រំដែនថៃចូលទៅក្នុងប្រទេសកម្ពុជា»៕