កាណាដាប្ដេជ្ញាសហការជាមួយដៃគូនានា បញ្ចប់ជម្លោះព្រំដែនកម្ពុជា-ថៃ

ភ្នំពេញ៖ រដ្ឋាភិបាលនៃប្រទេសកាណដា ឯកឧត្តម គ្រីស្ទាន ដេសរ៉ូស ឯកអគ្គរដ្ឋទូតវិសាមញ្ញ កាណាដា ប្រចាំកម្ពុជា បានប្ដេជ្ញា​ពិភាក្សា​ជាមួយ​ដៃគូរនានា​ដោយ​​ធ្វើ​យ៉ាង​ណាខិ​តខំ​ជួ​យ​ដោះ​ស្រាយ ​បញ្ចប់ជម្លោះព្រំដែនកម្ពុជា-ថៃ ដែលកំពុងកើតឡើងជាថ្មីនេះ ហើយស្វែង​រក​សន្តិភាព​រវាង​ប្រទេស​ទាំង​ពីរ ខណៈកម្ពុជាត្រូវការជាចាំបាច់នោះ ។

ការប្ដេជ្ញាចិត្តនេះ បានធ្វើឡើងក្នុងជំនួបសម្ដែងការគួរសម ជាមួយសម្ដេចរដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា នៅថ្ងៃទី១០ ខែធ្នូ ឆ្នាំ២០២៥ ហើយជាមួយគ្នានោះ ឯកឧត្តម ក៏​បាន​បង្ហាញ​នូវ​ក្តី​ព្រួយបារម្ភ ចំពោះបញ្ហា ជម្លោះព្រំដែនរវាងកម្ពុជា-ថៃ ហើយរហូត​ដល់​មាន​ជន​ស៊ីវិល​កម្ពុជា បានស្លាប់បាត់បង់ជីវិត និងត្រូវភៀសសឹករាប់ម៉ឺននាក់នេះផងដែរ។

នៅក្នុងនាមជាប្រទេសម្ចាស់ជំនាញលំដាប់ទី១០ ដែលបានជួយដល់កម្ពុជា និង​ជា​ដៃគូ​ទំហំ​ពាណិជ្ជ​កម្ម​ជាមួយគ្នា ធំផងដែរនោះ ឯកឧត្តម គ្រីស្ទាន ដេសរ៉ូស បានសន្យា​បន្ត​ពង្រឹង​កិច្ច​សហ​ប្រតិបត្តិ​ការ​ជាមួយកម្ពុជាបន្ថែមទៀត ទាំងវិស័យសេដ្ឋកិច្ច អប់រំ លើកកម្ពស់យេនឌ័រ និង​វិស័យ​មួយ​ចំនួន​ទៀត។

ឯកឧត្តមឯកអគ្គរដ្ឋទូត បានគូសបញ្ជាក់ថា នៅឆ្នាំ២០២៦ខាងមុខ កម្ពុជានឹងធ្វើជាម្ចាស់ផ្ទះ នៃ​វេទិកា​និយាយភាសាបារាំង ដែលពេលនោះនាយករដ្ឋមន្ត្រីកាណាដា នឹងអញ្ជើញ​មក​ធ្វើ​ទស្សន​កិច្ច​នៅ​កម្ពុជា​ផងដែរ ដែលនេះជាឱកាសនៃការពង្រឹង និងពង្រីកកិច្ច​សហ​ប្រតិបត្តិការ​នៃ​ប្រទេស​ទាំងពីរ។ មិនត្រឹមតែប៉ុណ្ណោះ ក៏មានសមាជិករដ្ឋសភាកាណាដា មកចូលរួមផងដែរ ហើយជឿ​ជាក់​ថា ​រដ្ឋសភាកម្ពុជា និងរដ្ឋសភាកាណាដា នឹងមានកិច្ចប្រជុំមួយជាមួយគ្នា ដើម្បី​ជំរុញ​កិច្ច​សហ​ប្រតិបត្តិការផ្សេងៗ។

ក្នុងឱកាសនោះសម្ដេចប្រធានរដ្ឋសភា បានថ្លែងអំណរគុណ ចំពោះប្រទេសកាណាដា ដែល​បាន​គាំទ្រ​ក​ម្ពុជា ហើយបានផ្ដល់ជំនួយអភិវឌ្ឍន៍ជាបន្តបន្ទាប់ ។ មិនត្រឹមតែប៉ុណ្ណោះកាណាដា ក៏ដៃគូ​ពាណិជ្ជ​កម្ម​មួយផងដែរ ហើយក៏មានទំហំធំ បើធៀបនឹងប្រទេសក្នុងតំបន់អាស៊ានមួយចំនួនទៀត ។

ជាមួយគ្នានេះ សម្ដេចរដ្ឋសភាធិការធិបតី មានប្រសាសន៍បន្ថែម ទៅកាន់ទូតកាណាដា អំពី​បញ្ហា​ជម្លោះ​ព្រំដែន​កម្ពុជា-ថៃ ដោយបញ្ហានេះ គឺបង្កដោយភាគីថៃមុន ហើយកម្ពុជាបាន​អត់ធ្មត់​រយៈ​ពេល ​២៤ម៉ោង ។ ដោយការរំលោភបំពានហួសបន្ទាត់ក្រហមនេះ ទើបធ្វើឲ្យ​កម្ពុជា​បាន​ឆ្លើយ​តប​វិ​ញ​ជា​បន្តបន្ទាប់ ដើម្បីការពារបូរណភាពទឹកដីកម្ពុជា ។

សម្ដេចប្រធានរដ្ឋសភា ក៏បានប្រាប់បន្ថែមទៀតថា កម្ពុជាបានគោរពយ៉ាងម៉ឺងម៉ាត់ នូវកិច្ចព្រម​ព្រៀង​សន្តិភាព​កម្ពុជា-ថៃ ដែលធ្វើឡើងនៅប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥​៕ អត្ថបទ បាន សុខរិទ្ធិ