កម្ពុជា-ជប៉ុន ផ្លាស់ប្តូរចំណេះដឹង និងបទពិសោធន៍ ជំរុញអភិវឌ្ឍន៍វិស័យទឹកស្អាត និង​ទឹក​កខ្វក់​នៅ​កម្ពុជា

កម្ពុជា-ជប៉ុន បើកសិក្ខាសាលាផ្លាស់ប្តូរចំណេះដឹង បទពិសោធន៍ ការផ្ទេរ និង​លើក​កម្ពស់​បច្ចេក​វិទ្យា​ក្នុង​វិស័យផ្គត់ផ្គង់ទឹកស្អាត និង ប្រព័ន្ធទឹកកខ្វក់ ជួយពង្រឹងធនធានមនុស្ស ធានានូវ​ជំនាញ​ច្បាស់​លាស់​ និង​មាន​និរន្តរភាព សម្រាប់ការអភិវឌ្ឍក្នុងវិស័យទឹកស្អាត និងប្រព័ន្ធ ទឹកកខ្វក់​នៅ​កម្ពុជា​។

ឯកឧត្តម ស៊ឹម ស៊ីថា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហែម វណ្ណឌី រដ្ឋមន្រ្តី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើក​ឡើង​ក្នុង​ពិធី​បើក​សិក្ខា​សាលា​ស្តីពី​ទឹក​ស្អាត ​និងប្រព័ន្ធទឹកកខ្វក់កម្ពុជា-ជប៉ុន ឆ្នាំ២០២៦ លើកទី១៨ នៅថ្ងៃទី១៤ ខែ មករា ឆ្នាំ២០២៦ នេះ​ថា ជុំវិញការផ្ទេរ និងលើកកម្ពស់បច្ចេកវិទ្យា ក្នុងវិស័យផ្គត់ផ្គង់ទឹកស្អាត និងប្រព័ន្ធអនាម័យ មិន​មែន​ជាការងាររយៈពេលខ្លី ប៉ុន្តែជាដំណើរការបន្ត ដែលទាមទារការចូលរួមពីគ្រប់ភាគី ក្នុង​នោះ​ប្រសិន​យើងអាចភ្ជាប់បច្ចេកវិទ្យាទំនើប ជាមួយធនធាន មនុស្សដែលមានសមត្ថភាព និង​ប្រព័ន្ធ​ផ្ទេរចំណេះដឹងមានប្រសិទ្ធភាព យើងនឹងអាច​ធានា​បាន​នូវ​ការ​ផ្គត់​ផ្គង់​សេវា​ទឹក​ស្អាត​ប្រកប​ដោយ​គុណភាព សុវត្ថិភាព និងនិរន្តរភាព ដែលអាចសម្រេចបាននូវគោលដៅ SDGs ២០៣០។

ឯកឧត្តម បន្តថា ការអភិវឌ្ឍនិងគ្រប់គ្រងសេវាផ្គត់ផ្គង់ទឹកស្អាតប្រកបដោយគុណភាព សុវត្ថិភាព និរន្តរភាព និងថ្លៃសមរម្យ មិន ត្រឹមតែជួយលើកកម្ពស់សុខភាពសាធារណៈប៉ុណ្ណោះទេ ប៉ុន្តែ​សេវា​នេះ​ក៏ជាកត្តាគន្លឹះមួយក្នុងការបង្កើនជំនឿទុកចិត្ត និង​ទាក់​ទាញ​ការ​វិនិយោគ​ពី​វិស័យ​ឯកជន​ជាតិ​ និង​អន្តរជាតិ សម្រាប់ការបង្កើតគុណភាព ផលិតកម្ម អាជីវកម្មនៅកម្ពុជា។ ឆ្លើយ​តប​ទៅនឹ​ង​គោល​នយោបាយ នេះ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បាន​ខិតខំ​ប្រឹង​ប្រែង​បំពេញភារកិច្ចរបស់ខ្លួន ដែលជាស្ថាប័នទទួលបន្ទុកលើវិស័យផ្គត់ផ្គង់ទឹកស្អាតទីប្រជុំជន ក្រោម​កិច្ចសហប្រតិបត្តិការជាមួយដៃគូអភិវឌ្ឍន៍ និងស្ថាប័នពាក់ព័ន្ធ ជាក់ស្តែង​កិច្ច​សហ​ប្រតិ​បត្តិ​ការ​ ជាមួយក្រុងគីតាឃ្យូស៊ុ និងសមាគមអាជីវកម្មទឹកស្អាតក្រៅប្រទេសក្រុងគីតាឃ្យូស៊ុ ដែល​កិច្ច​សហ​ប្រតិបត្តិការនេះមានគោលបំណងជំរុញការ អភិវឌ្ឍវិស័យ​ទឹក​ស្អាត​នៅ​កម្ពុជា​ឱ្យ​មាន​និរន្តរ​ភាព និងជំរុញឱ្យមានការភ្ជាប់សេវាទឹកស្អាតតាមប្រព័ន្ធបណ្តាញកាន់តែច្រើនថែមទៀត។

ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន លើកឡើងថា ពាក់​ព័ន្ធ​ទឹក​កខ្វក់នេះ កន្លងមកកម្ពុជា-ជប៉ុន បានចុះអនុស្សារណៈយោគយល់គ្នា ដើម្បីពង្រឹង និង​ពង្រីក​ទំនាក់​ទំនង ការផ្លាស់ប្តូរបទពិសោធន៍ និងបច្ចេកទេសនៃវិស័យទឹកកខ្វក់ និង បានប្តេជ្ញា​ជួយ​គាំទ្រ​គ្នា​ទៅវិញទៅមក ដោយការសិក្សាផែនការមេ, ប្រព័ន្ធកែលម្អទឹកភ្លៀង, និងក្រុម​ហ៊ុន​ទឹក​កខ្វក់​ក្នុង​រាជ​ធានីភ្នំពេញ ដោយ ក្រុមហ៊ុនទីប្រឹក្សាបច្ចេកទេសជប៉ុន ក្រោមយន្តការ​នៃ​កិច្ច​សហ​ប្រតិបត្តិការ និងជំនួយឥសំណង និងបានផ្តល់ជំនួយហិរញ្ញប្បទានសម្បទា ប្រមាណ ២៤ លាន​ដុល្លារ​អាម៉េរិក ក្នុងការសាងសង់ប្រព័ន្ធទឹកកខ្វក់នៅជើងឯក សម្រេចបានតាម​ការ​គ្រោង​ទុក​ផង​ដែរ​។

ឯកឧត្តម អ៊ុអិណូ អាតស៊ូស៊ិ (UENO Atsushi) ឯកអគ្គរាជទូតជប៉ុន ប្រចាំ​នៅ​ព្រះរាជា​ណា​ចក្រ​កម្ពុជា​ លើកឡើងផងដែរថា ប្រទេសជប៉ុនបានផ្តល់ជំនួយដល់ប្រទេសកម្ពុជា សម្រាប់​កសាង​ប្រទេស​ជាតិ​ឡើងវិញ បន្ទាប់ពីសង្គ្រាមស៊ីវិលបានបញ្ចប់ ដែលត្រូវ ការអភិវឌ្ឍនៅគ្រប់វិស័យ ជា​ពិសេស​ការអភិវឌ្ឍទឹកស្អាត ដែលជាកត្តាប្រើប្រាស់ប្រចាំថ្ងៃរបស់ប្រជាជន បច្ចុប្បន្នកម្ពុជា​ទទួល​បាន​ជោគជ័យ នៅក្នុងការផ្គត់ផ្គង់ទឹកស្អាតនៅរាជធានីភ្នំពេញ ដែលត្រូវបានគេស្គាល់ថា អភូត​ហេតុ​នៅ​រាជធានីភ្នំពេញ ហើយឯកឧត្តមឯកអគ្គរាជទូត ក៏បានថ្លែងនូវការអបអរសាទរ ចំពោះ​រដ្ឋាករ​ទឹក​ស្វ័យក្រុងភ្នំពេញ ដែលកំពុងផ្គត់ផ្គត់ទឹកជូនប្រជាពលរដ្ឋគួជាទីមោនទៈ ស្របពេល​ប្រព្រឹត្ត​ កម្មទឹកកខ្វក់ ក៏បានឆ្លើយតបល្អប្រសើរ នៃការប៉ះពាល់ដល់បរិស្ថាន និងការរស់​នៅ​របស់​ប្រជាជន​កម្ពុជា​៕ អត្ថបទ៖ សុន រ៉ាឌី