រដ្ឋបាលខេត្តឧត្តរមានជ័យ ប្រារព្ធ​ពិធីអភិសេកព្រះបដិមាលោកេស្វរៈរង្វង់មូលដៃ៨ ជានិមិត្តរូបថ្មី

រដ្ឋបាលខេត្តឧត្តរមានជ័យ ប្រារព្ធពិធីបុណ្យអភិសេកព្រះបដិមាលោកេស្វរៈរង្វង់មូលដៃ៨ ក្រោម​វត្តមាន ឯកឧត្ដម មាន ចាន់យ៉ាដា អភិបាលខេត្តឧត្ដរមានជ័យ, ឯកឧត្ដម ស៊ី ប្រាសិទ្ធ ប្រធាន​ក្រុម​ប្រឹក្សា​ខេត្ត​ រួមទាំងមន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និង​ពុទ្ធ​បរិស័ទ​ចូល​រួម​យ៉ាង​ច្រើន​កុះករផងដែរ នាព្រឹកថ្ងៃទី២៤ ខែមករា ឆ្នាំ២០២៦នេះ។

ព្រះលោកេស្វរៈ ឬ ព្រះអវលោកិតេស្វរៈ គឺជាពោធិសត្វក្នុងព្រះពុទ្ធសាសនាមហាយាន ដែល​តំណាង​ឱ្យ ​«សេចក្តីមេត្តាករុណាដ៏មហាសាល»។ តាមជំនឿរបស់បុព្វបុរសខ្មែរ តាំង​ពី​សម័យ​អង្គរ​ ជាពិសេស​ក្នុង​រជ្ជកាល​ព្រះបាទ​ជ័យវរ្ម័ន​ទី៧ ព្រះ​លោកេស្វរៈ​ត្រូវ​បាន​គេ​ជឿ​ថា​ជា​អ្នក​តាម​ជួយ​សង្គ្រោះមនុស្ស​លោកឱ្យផុតពីទុក្ខភ័យ និងនាំមកនូវសេចក្តីសុខសាន្ត។

ការសាងសង់រូបព្រះបដិមាលោកេស្វរៈនេះឡើង មិនត្រឹមតែដើម្បីសោភ័ណភាពក្រុងប៉ុណ្ណោះទេ ប៉ុន្តែ​គឺ​ជាកន្លែងបួងសួងសុំសេចក្តីសុខ ជួយបីបាច់ថែរក្សា និង​ផ្តល់​សេចក្តី​សុខ​សាន្ត​ត្រជាក់​ត្រជុំ​ជូន​ដល់​ប្រជា​ពលរដ្ឋ​នៅទូទាំងប្រទេស ជាពិសេស រំលឹកដល់ដួងវិញ្ញាណ​ក្ខន្ធ​ដល់​វីរៈ​កងទ័ព​គ្រប់​រូប​ ដែលបានលះបង់សាច់ស្រស់ ឈាមស្រស់ ដើម្បីការពារទឹកដីមួយនេះផងដែរ។

ការ​អភិសេកបដិមាលោកេស្វរៈ រង្វង់មូលដៃ៨ នាថ្ងៃនេះ នឹងក្លាយ​ជា​កម្លាំង​ចលករ​ថ្មី​មួយ​ក្នុង​ការ​ទាក់​ទាញ​ភ្ញៀវទេសចរ​ឱ្យ​មក​កម្សាន្តនៅខេត្តឧត្តរមានជ័យកាន់តែច្រើនឡើង។ សមិទ្ធ​ផល​នេះ​គឺ​ជា​សក្ខី​ភាព​បញ្ជាក់យ៉ាងច្បាស់ថា ក្រោមការដឹកនាំដ៏ឈ្លាសវៃ របស់ថ្នាក់ដឹកនាំគ្រប់លំដាប់ថ្នាក់ ទឹក​ដី​ភូមិ​ភាគពាយព្យមួយនេះ កំពុងបោះជំហាន​ទៅ​រក​ភាព​រុង​រឿង​ប្រក​បដោ​យ​និរន្តរ​ភាព​ផង​ដែរ៕ អត្ថបទ​៖ ឃិន សារិទ្ធ