អតីតយុទ្ធជនកំពុងភៀសសឹកអាណិតក្មេងៗជំនាន់ក្រោយ ត្រូវរងគ្រោះដោយសារសង្គ្រាមឈ្លានពាន

អតីតយុទ្ធជន និងចាស់ទុំធ្លាប់ហែលឆ្លងកាត់សង្គ្រាម យ៉ាងលំបាកជាច្រើនទសវត្សនាពេលកន្លងមក បានបង្ហាញនូវក្តីឈឺចាប់ និងអាណិតអាសូជាពន់ពេក ចំពោះក្មេងៗជំនាន់ក្រោយ ពិសេសកុមារតូចៗ និងទារកទើបនឹងកើត ត្រូវរងគ្រោះដោយសារសង្គ្រាមឈ្លានពានរបស់កងទ័ពថៃ ហើយរត់ភៀសសឹក បាត់បង់ផ្ទះសម្បែងរហូតដល់សព្វថ្ងៃ។

អតីតយុទ្ធជន និងមនុស្សចាស់មានទីលំនៅក្នុងភូមិជោគជ័យ និងភូមិព្រៃចាន់ កំពុងភៀសសឹកនៅមណ្ឌលសុវត្ថិភាព ក្នុងខេត្តបន្ទាយមានជ័យ បាននិយាយថា ក្រោយសមាហរណកម្មឆ្នាំ១៩៩៨ ក្រោមនយោបាយឈ្នះឈ្នះ របស់សម្ដេចតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី គិតថាប្រទេសកម្ពុជាមានសុខសន្តិភាពជារៀងរហូត ព្រោះខ្មែរបានរួមសាមគ្គីគ្នាបញ្ចប់សង្គ្រាមផ្ទៃក្នុង ។

ពួកគាត់បន្តថា ប៉ុន្តែភាពរីករាយនឹងការរស់នៅក្នុងសន្តិភាព ត្រូវបានបំផ្លាញដោយសារកងទ័ពថៃ ធ្វើឲ្យប្រជាពលរដ្ឋកម្ពុជានៅតាមព្រំដែនកម្ពុជា-ថៃ បានរត់ភៀសសឹក ខណៈក្មេងៗរាប់ម៉ឺននាក់ បានបាត់បង់ផ្ទះសម្បែង រត់គេចគ្រាប់ផ្លោងគួរឲ្យអាសូរ និងខ្លោចចិត្តយ៉ាងខ្លាំង ហើយមិនត្រឹមប៉ុណ្ណោះ បានបាត់បង់ការសិក្សានៅសាលារបស់ពួកគេ ។

គួរបញ្ជាក់ថា រយៈពេលជាង ១ខែមកហើយ អ្នកភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានរស់យ៉ាងលំបាក នៅក្រោមដំបូលតង់ ដោយសារអំពើអមនុស្សធម៌របស់រដ្ឋាភិបាលកក្រុងបាំងកក និងកងទ័ពថៃ ដែលបានរំលោភអធិបតេយ្យភាពកម្ពុជា ហើយពួកគេបានបំពានកិច្ចព្រមព្រៀងបទឈប់បាញ់ ដោយធ្វើសកម្មភាពឈ្លានពាន បំផ្លិចបំផ្លាញផ្ទះសំបែងរបស់ប្រជាពលរដ្ឋទាំងពីរភូមិ និងតំបន់មួយចំនួនទៀតយ៉ាងឃោរឃៅបំផុត៕ អត្ថបទ បាន សុខរិទ្ធិ