ព័ត៌មាន
សហគមន៍កសិកម្មចំនួន១៧ ទទួលបានហិរញ្ញប្បទានជិត ៩លានដុល្លារ របស់រាជរដ្ឋាភិបាល ដើម្បីពង្រីកដើមទុន
គម្រោងពិពិធកម្មកសិកម្មកម្ពុជា(CASDP) នៃក្រសួងកសិកម្ម រុក្ខាប្រមាញ់ និងនេសាទ បានចុះកិច្ចព្រមព្រៀងជាមួយនឹងសហគមន៍កសិកម្មទំនើប និងសហគមន៍កសិកម្មចំនួន១៧ ក្នុងការទទួលបានហិរញ្ញប្បទានសរុបជាទឹកប្រាក់ជិត ៩លានដុល្លារ ក្នុងនោះ ២,៧លានដុល្លារ ជាជំនួយឥតសំណង និងជាង ៦លានដុល្លារទៀត ជាកម្ចីដើមទុនការប្រាក់ទាប។
ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ប្រាប់ក្រុមអ្នកសារព័ត៌មាន ក្រោយចប់ពិធីចុះហត្ថលេខាលើកិច្ចព្រមព្រៀង កាលពីរសៀលថ្ងៃទី២៨ មករា ឆ្នាំ២០២៦កន្លងទៅថា ហិរញ្ញប្បទាននេះ មានគោលបំណងពង្រឹងសមត្ថភាពផលិតកម្មកសិកម្ម កែលម្អខ្សែសង្វាក់តម្លៃ និងគាំទ្រដល់ការអភិវឌ្ឍសហគមន៍កសិកម្មទំនើប ដែលរួមចំណែកដល់ការធ្វើពិពិធកម្ម និងនិរន្តរភាពនៃវិស័យកសិកម្មរបស់ប្រទេសកម្ពុជា។
ឯកឧត្តម លើកឡើងបន្តថា គម្រោងពិពិធកម្មកសិកម្មកម្ពុជា (CASDP) ជាគម្រោងរបស់ក្រសួងកសិកម្ម ហើយទទួលបានថវិកាពីធនាគារពិភពលោក។ ការចុះកិច្ចព្រមព្រៀងឥណទានបំពេញបន្ថែមទុនវិនិយោគ ដែលជាការជួយគាំទ្រដល់សហគមន៍ដើម្បីទទួលបាននូវជំនួយឥតសំណងផង និងទទួលបាននូវកម្ចីឥណទានការប្រាក់ទាបផងសម្រាប់ការវិនិយោគរបស់គាត់នៅក្នុងសហគមន៍។ ឯកឧត្តម បានបន្តទៀតថា កិច្ចព្រមព្រៀងនេះបានចុះជាមួយសហគមន៍ចំនួន១៧ មកពី៨ខេត្ត ដូចជា សៀមរាប កំពង់ចាម តាកែវ និងឧត្តរមានជ័យ…។ អ្វីដែលក្រសួងជួយនេះ គឺជួយទៅលើការវិនិយោគ មានន័យថា ជួយទៅលើទុនបង្វិល ប៉ុន្តែយើងចែកជាពីររូបភាព ដែលមួយជ្រុងយើងហៅថាជំនួយឥតសំណងដែលជំនួយនេះជួយទៅលើការវិនិយោគលើអ្វីដែលជាទ្រព្យ ដូចជាផ្ទះសំណាក់ ម៉ាស៊ីន គ្រឿងចាក់ ឃ្លាំង ទីលានហាលសម្ងួតជាដើម។
លោក គង់ វ៉ុង ប្រធានសហគមន៍ចំប៉ាសែនជ័យ ខេត្តតាកែវ បានឱ្យព័ត៌មាន ប៊ីធីវី ដឹងថា លោកពិតជាសប្បាយរីករាយខ្លាំង ដោយសារជាឱកាសទី១ដែលសហគមន៍របស់លោកបានទទួលនូវហិរញ្ញប្បទានសំណងរហូតដល់ ៤០ភាគរយ ដែលជួយឱ្យសហគមន៍របស់លោករុញការផលិតឱ្យកាន់តែប្រសើរបន្ថែមទៀត។
លោកឱ្យដឹងថា ការផលិតបន្លែនៅក្នុងសហគមន៍របស់លោក សម្រាប់ឆ្នាំនេះការផលិតបានទិន្នផលល្អ និងតម្លៃមានលំនឹងល្អដែលកសិករអាចទទួលយកបាន ដោយ១ថ្ងៃសហគមន៍អាចប្រមូលបានពី ៤ទៅ៥តោន។ លោកបានបន្ថែមថាពិតជាសប្បាយចិត្ត ហើយក៏អរគុណដល់រាជរដ្ឋាភិបាល ក៏ដូចជាក្រសួងកសិកម្ម ដែលបានផ្តល់ឱកាសដល់សហគមន៍របស់លោក បានចូលរួមនិងទទួលបានហិរញ្ញប្បទានឥតសំណងនេះ។ លោកបានប្តេជ្ញាធ្វើកិច្ចការនេះឱ្យបានកាន់តែប្រសើរ និងពង្រឹងសេដ្ឋកិច្ចនៅក្នុងមូលដ្ឋានកាន់តែរីកចម្រើនទៅមុខបន្ថែមទៀត។
សូមជម្រាបជូនថា សហគមន៍ទាំងនេះ គឺជាក្រុមចុងក្រោយដែលទទួលបានការអនុម័តគាំទ្រការវិនិយោគ មុននឹងគម្រោងដែលដឹកនាំដោយក្រសួងកសិកម្ម និងគាំទ្រហិរញ្ញប្បទានដោយធនាគារពិភពលោកមួយនេះត្រូវបានបិទបញ្ចប់ជាផ្លូវការនៅក្នុងអំឡុងពេល៦ខែទៀត។ ដោយហេតុផលនេះហើយទើបក្រុមការងារសម្រេចរៀបចំពិធីចុះហត្ថលេខាលើកិច្ចព្រមព្រៀងរួមគ្នាតែម្តងនៅក្រសួងកសិកម្ម ដើម្បីចំណេញពេលវេលា និងបង្កើនល្បឿនអនុវត្តផែនការវិនិយោគនៅតាមសហគមន៍នីមួយៗឱ្យបានទាន់ពេលនិងត្រឹមត្រូវទៅតាមនីតិវិធីតម្រូវ៕ អត្ថបទ៖ ឈិត បូរ៉ាវី
-
ព័ត៌មាន7 days agoរដ្ឋមន្រ្តី ក្រសួងវប្បធម៌ និងវិចិត្រសិល្បៈ អរគុណដល់អង្គការយូណេស្កូសម្រាប់កិច្ចសហប្រតិបត្តិការលើការងារវប្បធម៌ទាំងរូបី និងអរូបី
-
ព័ត៌មាន1 week agoខណ្ឌរដ្ឋបាលជលផលកំពង់ចាម បានលែងត្រីរាជទម្ងន់ជាង ៧០គីឡូក្រាម ចូលទន្លេមេគង្គ ក្រោយទទួលបានពីប្រជានេសាទ
-
ព័ត៌មាន1 week agoរដ្ឋាភិបាលសម្រេចយកចុងសប្ដាហ៍នៃដើមខែមិថុនា ឆ្នាំ២០២៧ ជាថ្ងៃបោះឆ្នោតឃុំ/សង្កាត់អាណត្តិទី៦
-
ព័ត៌មាន7 days agoសាធារណរដ្ឋឆែក មានបំណងផ្លាស់ប្តូរដំណើរទស្សនកិច្ចកម្រិតខ្ពស់ជាមួយកម្ពុជា ដើម្បីរំលឹកខួបការទូតលើកទី៧០
-
ព័ត៌មាន5 days agoនាវាកងទ័ពជើងទឹកសហរដ្ឋអាមេរិកចូលសំចតនៅមូលដ្ឋានសមុទ្ររាម ដើម្បីលើកកម្ពស់កិច្ចសហប្រតិបត្តិការវាងយោធាប្រទេសទាំងពីរកម្ពុជា-អាមេរិក
-
ព័ត៌មាន5 days agoក្រសួងការងារលើកទឹកចិត្តអតីតពលករ និងយុវជនឱ្យជ្រើសរើសការងារក្នុងស្រុក តាមរយៈការរៀបចំវេទិកាផ្តល់ឱកាសការងារជាង ២ពាន់កន្លែង ក្នុងក្រុងសិរីសោភ័ណ
-
ព័ត៌មាន5 days agoក្រុមការងារគណបក្សប្រជាជនចុះមូលដ្ឋាន អញ្ជើញសំណេះសំណាលជាមួយសមាជិក-សមាជិកាបក្ស និងប្រកាសសមាសភាពក្រុមការងារចុះមូលដ្ឋានភូមិ ក្នុងឃុំសាមគ្គី ស្រុកប្រាសាទបល័ង្ក
-
ព័ត៌មាន3 days agoសម្ដេចធិបតី៖កម្ពុជានឹងចូលរួមក្នុង «ក្រុមប្រឹក្សាសន្តិភាព» តាមការអញ្ញើញរបស់ប្រធានាធិបតី ដូណាល់ ត្រាំ