ទាក់ទងបញ្ហាព្រំដែន សម្តេចធិបតីប្រកាសថា រាល់ការសម្រេចចិត្តគ្រប់ជំហានទាំងអស់របស់រាជរដ្ឋាភិបាលគឺតម្កល់ឧត្តមប្រយោជន៍ជាតិ និងប្រជាជនជាធំ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសថា រាល់ការសម្រេចចិត្តទាំងអស់របស់រាជរដ្ឋាភិបាល គឺដើម្បីឧត្តមប្រយោជន៍ជាតិ និងប្រជាជនកម្ពុជាជាធំ ខណៈទាក់ទងនឹងបញ្ហាព្រំ ដែនរវាងកម្ពុជា និងថៃនេះ រាជរដ្ឋាភិបាលបានកំពុងធ្វើការដោះស្រាយយ៉ាងសកម្មបំផុតបើទោះបីជាសកម្មភាពនេះមិនក្តួងក្តាំងដូចការបាញ់គ្នាក៏ដោយនោះ។

ក្នុងឱកាសអញ្ជើញជួបសំណេះសំណាលជាមួយសិស្សនិទ្ទេសA និងសិស្សបច្ចេកទេសវិជ្ជាជីវៈ នាព្រឹកថ្ងៃទី១០ ខែកុម្ភៈ ឆ្នាំ ២០២៦នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា សម្តេចពិតជាយល់អារម្មណ៍ចំពោះបងប្អូនរួមជាតិចំពោះស្ថានការណ៍ព្រំដែនរវាងកម្ពុជា និងថៃនាពេល បច្ចុប្បន្ននេះ ប៉ុន្តែទោះបីយ៉ាងណាសម្តេច បានប្រាប់ដល់ជនរួមជាតិទាំងអស់ថា រាល់ការសម្រេចចិត្តរបស់ រាជរដ្ឋាភិបាលគ្រប់ជំហានទាំងអស់គឺដោយការទទួលខុសត្រូវ ថ្លឹងថ្លែង វាយតម្លៃច្បាស់លាស់នៅក្នុងមុខ ព្រួញដែលត្រូវគិតគូរទាំងទឹកដី ទាំងប្រជាពលរដ្ឋរបស់យើង និងទាំងកងកម្លាំងរបស់យើងទាំងអស់។

យ៉ាងណាក៏ដោយសម្តេចធិបតី នាយករដ្ឋមន្រ្តី បានថ្លែងថា បើទោះបីជាការដោះស្រាយបញ្ហាព្រំដែនរវាងកម្ពុជានិងថៃនាពេលនេះមានទស្សនខុសគ្នាច្រើនក្តី ក៏ប៉ុន្តែរាជរដ្ឋាភិបាលបានកំពុងខិតខំធ្វើការដោះស្រាយនូវបញ្ហានេះជានិច្ចបើទោះបី ជារាជរដ្ឋាភិបាលមិនបានបង្ហាញជាសាធារណៈ ឬធ្វើសន្និសីទជាប្រចាំដើម្បីបង្ហាញដល់ជនរួមជាតិនោះ។

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាក៏បានប្រកាសប្រាប់ដល់ជនរួមជាតិទាំងអស់ផងដែរថា ទោះស្ថានភាពនេះ (បញ្ហាព្រំដែនកម្ពុជា-ថៃ) មានភាពស្មុគ្រស្មាញយ៉ាងណាក៏ដោយ ក៏រាជរដ្ឋាភិបាលនឹងខិតខំថែរក្សាការពារឲ្យខាងតែបាននូវបូរណភាពទឹកដី និងប្រជាជនកម្ពុជាយើងទាំងមូលដោយប្រើប្រាស់គ្រប់មធ្យោបាយទាំងអស់៕  អត្ថបទបាន ចក់