លោកជំទាវបណ្ឌិត ពេជ ចន្ទមុន្នី ដឹកនាំពេទ្យ TYDA ពិនិត្យព្យាបាលជំងឺពលរដ្ឋជាង ៤ពាន់​គ្រួសារ នៅខេត្តកំពង់ស្ពឺ

លោកជំទាវបណ្ឌិត ពេជ ចន្ទមុន្នី អនុប្រធានក្រុមប្រឹក្សាភិបាលសមាគមក្រុមគ្រូពេទ្យយុវជនស្ម័គ្រ ចិត្ត​សម្ដេច​តេជោ (TYDA) បានដឹកនាំក្រុមគ្រូពេទ្យ TYDA ចុះពិនិត្យព្យាបាល​ជំងឺ​ដល់​ប្រជា​ពលរដ្ឋ​ចំនួនជាង ៤ពាន់គ្រួសារ នៅក្នុងខេត្តកំពង់ស្ពឺ ដោយឥតគិតថ្លៃ។

ក្នុង​​ពិធីសំណេះសំណាល និងពិនិត្យព្យាបាលជំងឺពលរដ្ឋពលរដ្ឋ ស្ថិតក្នុងបរិវេណវិទ្យាល័យហ៊ុន សែន​ចាន់​ថ្នាល ភូមិអំពិលផ្អែម ឃុំក្រាំងចេក ស្រុកសាមគ្គីមុន្នីជ័យ នៅថ្ងៃទី២៨ ខែកុម្ភៈ ឆ្នាំ​២០២៦ លោកជំទាវបណ្ឌិត ពេជ ចន្ទមុន្នី បានមានប្រសាសន៍ថា សកម្មភាពរបស់ក្រុមគ្រូពេទ្យ TYDA គឺស្របទៅនឹងកម្ម វិធីនយោបាយរបស់រាជរដ្ឋាភិបាល លើ​ការ​ងារ​លើក​កម្ពស់​សុខុមាល​ភាព​របស់​ប្រជាពលរដ្ឋ ដោយគ្មានការ រើសអើងនិន្នាការនយោបាយ វណ្ណៈ ពណ៌សម្បុរ គឺ​ខិតខំ​ប្រឹង​ប្រែង​ធ្វើយ៉ាងណាឱ្យប្រជាពលរដ្ឋគ្រប់រូប មានសុខភាពល្អ ដើម្បីចូល​រួម​កសាង​ប្រទេស​ជាតិ​ឱ្យ​កាន់​តែ​រីកចម្រើន។

លោកជំទាវបណ្ឌិត បានបន្តថា ទន្ទឹមនឹងការពង្រឹងនូវគុណភាពវិស័យសុខាភិបាលនេះ រាជរដ្ឋាភិ បាលអាណត្តិថ្មីនេះ គ្រោងបង្កើតឲ្យមានមន្ទីរនៅថ្នាក់តំបន់ មានគ្រឿងបរិក្ខាពេទ្យទំនើបៗ និង​ល្អៗ ការវះ កាត់ធំៗ ពីលើមណ្ឌលសុខភាព ឬមន្ទីរពេទ្យបង្អែកដែលមានស្រាប់ កាន់​ងាយ​ស្រួល​ឱ្យ​ពលរដ្ឋ​ទៅ​រកសេវាសុខាភិបាល ។

លោកជំទាវបណ្ឌិត បានបន្ថែមថា សម្រាប់សកម្មភាពពិនិត្យព្យាបាលជំងឺពលរដ្ឋនៅថ្ងៃនេះ មាន​គ្រូ​ពេទ្យចំ​នួនជាង៤០០នាក់ ក្នុងនោះមានជំងឺទូទៅ ជំងឺមាត់ធ្មេញ ពិនិត្យអេកូ រោគស្រ្តី ជំងឺភ្នែក ជំងឺ​បេះដូង ជំងឺកុមារ ជំងឺត្រចៀក ច្រមុះ បំពងក សើស្បែក សន្លាក់ ឫសដូងបាត វះកាត់តូច ថត​អិចស្រេ (X-Ray) និងជំងឺមួយចំនួនទៀត ។

ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ​ បានឱ្យដឹងថា គិតត្រឹមដើម ឆ្នាំ​២០២​៦​នេះ TYDA បានជួយពិនិត្យព្យាបាលជំងឺជូនពលរដ្ឋនៅខេត្តកំពង់ស្ពឺ បានចំនួន៦ដង សរុបពល រដ្ឋជាង ២ម៉ឺននាក់។

ក្នុង​ពេលទៅទទួលការពិនិត្យព្យាបាលជំងឺ ប្រជាពលរដ្ឋបានសម្ដែងការពេញចិត្ត ចំពោះសកម្ម​ភាព​នេះ ដែលបានជួយកាត់បន្ថយលើការចំណាយរបស់ពួកគេ លើការថែទាំសុខភាព។

គួរ​បញ្ជាក់ថា សម្រាប់ពលរដ្ឋទាំងជាង ៤ពាន់គ្រួសារ មកទទួល​សេវា​ពិនិត្យ​ព្យាបាល​ជំងឺ​ដោយ​ឥតគិត​ថ្លៃ​នេះ មានមកពីក្រុងឧដុង្គម៉ែជ័យ ស្រុកឱរ៉ាល់ ស្រុកខ្ពង និងស្រុកសាមគ្គីមុន្នីជ័យ៕ អត្ថបទ បាន សុខរិទ្ធិ