Hun Sen Cup៖ ណាហ្គា ជួបវិសាខា ខណៈបឹងកេតជួបកងយោធពលខេមរភូមិន្ទ ក្នុងវគ្គ ១/៤ ជើងទី១ ថ្ងៃពុធនេះ

ពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៩ ឆ្នាំ២០២៥/២៦ (ថ្នាក់ជាតិ) នឹង​បន្ដការប្រកួតជើងទី១ ក្នុងវគ្គ ៨ក្រុមចុងក្រោយចំនួន ២ប្រកួតទៀត នាថ្ងៃពុធ ទី៤ ខែមីនា ឆ្នាំ​២០២៦នេះ ដោយក្រុមណាហ្គាវើលដ៏ ត្រូវជួបក្រុមភ្ញៀវវិសាខា នៅកីឡដ្ឋានខេត្តកំពង់ស្ពឺ និង​ក្រុម​បឹងកេត ត្រូវជួបក្រុមម្ចាស់ផ្ទះកងយោធពលខេមរភូមិន្ទ នៅកីឡដ្ឋានស្ដាតចាស់។

នេះជា​កម្មវិធីប្រកួតបញ្ចប់ជើងទី១ នៃវគ្គ ១/៤ ផ្ដាច់ព្រ័ត្រ បន្ទាប់ពីសប្ដាហ៍មុន បាន​បញ្ចប់​ការ​ប្រកួត​ជើង​ទី១ ចំនួន ២គូ គឺក្រុមព្រះខ័នរាជស្វាយរៀង ចាញ់ក្រុមគិរីវង់សុខសែនជ័យ ២-១ ស្រប​ពេលក្រុមការពារតំណែងជើងឯកភ្នំពេញក្រោន បានវាយបក​ស្មើ​ក្រុម​ម្ចាស់​ផ្ទះ ​ISI​ ដង្កោ​សែនជ័យ ​២-២។

ក្រឡេកមកចាប់អារម្មណ៍ការប្រកួតថ្ងៃពុធសប្ដាហ៍នេះ រឹតតែគួរឲ្យចាប់អារម្មណ៍ថែមទៀត ពិសេស​ក្រុម​ដែលអស់ឱកាសប្រជែងជើងឯកលីគកំពូលកម្ពុជា ដូចជា វិសាខា និង​កង​យោធ​ពលខេម​រូមិន្ទជាដើម ដែលត្រូវផ្ដោតសំខាន់ក្នុងពានរង្វាន់សម្ដេចតេជោ ហ៊ុន សែន ស្រប​ពេល​បឹង​កេត និងណាហ្គាវើលដ៏ ក៏ត្រូវការជ័យជម្នះ ដើម្បីបានដើមទុនមុនជំនួបកាត់សេចក្ដីជើងទី២ នា​ថ្ងៃ​ទី​១១ ខែមីនាសប្ដាហ៍ក្រោយ។

គួរដឹងថា ពានរង្វាន់សម្ដេចតេជោ ហ៊ុន សែន ថ្នាក់ជាតិ គឺមានបេក្ខភាព ១៦ក្រុមចូលរួម ក្នុង​នោះ​មាន​ក្រុមសមាជិកលីគកំពូលកម្ពុជា ១១ក្រុម និងក្រុមឡើងមកពីពានថ្នាក់ខេត្ត ៥ក្រុម ដែល​តម្រូ​វ​ឲ្យ​ធ្វើការប្រកួត ២ជើង(ក្នុង និងក្រៅដី) ចាប់ពីវគ្គ ១៦ក្រុម រហូតដល់​វគ្គ​ពាក់​កណ្ដាល​ផ្ដាច់​ព្រ័ត្រ ​ដើម្បីកំណត់ក្រុមឈ្នះឡើងវគ្គបន្ដបន្ទាប់ មុនឈានដល់វគ្គផ្ដាច់ព្រ័ត្រ ដែលត្រូវប្រកួត ១​ជើង​ប៉ុណ្ណោះ ដើម្បីកាត់សេចក្ដីរកក្រុមជើងឯក៕ អត្ថបទ លី ឈុនឡា