ពលរដ្ឋគ្មានដីពិតប្រាកដចំនួន ៥៣៨គ្រួសារ ចាប់ឆ្នោតទទួលបានដី និងផ្ទះជាកម្មសិទ្ធិផ្ទាល់ខ្លួនពីរដ្ឋាភិបាល

 ភ្នំពេញ៖ បន្ទាប់ពីចាប់ឆ្នោត​ទទួលបានលេខកាន់កាប់ដីឡូតិ៍ និងផ្ទះ ក្នុងគម្រោងទី១ នៃកម្មវិធីផ្តល់ដីការពារព្រៃដើម្បីរួមគ្នាអភិវឌ្ឍដោយចីរភាពរបស់រាជរដ្ឋាភិបាល ប្រជាពលរដ្ឋចំនួន ៥៣៨ គ្រួសារ នឹងទទួលបានកម្មសិទ្ធិផ្ទាល់ខ្លួន និងទៅរស់នៅទីតាំងដែលស្ថិតនៅ​ភូមិសាស្រ្តអូរសែវ៣ ឃុំស្តៅ និងឃុំសាមឃួយ ស្រុកសេសាន ខេត្តស្ទឹងត្រែង។ ការទទួលបានជាកម្មសិទ្ធិកាន់កាប់នេះ ត្រូវបានធ្វើក្នុងពិធីចាប់ឆ្នោតយកលេខដីឡូតិ៍ និងផ្ទះ​ ដែលរៀបចំដោយលេខា​ធិការដ្ឋាននៃគណៈកម្មាធិការជាតិដឹកនាំអនុវត្តកម្មវិធីផ្តល់ដី ការពារព្រៃ ដើម្បីរួមគ្នាអភិវឌ្ឍដោយចីរភាព (ផ.ក.អ.) នៅរសៀលថ្ងៃទី ២៧ ខែកក្កដា ឆ្នាំ​២០២៦។​

ឯកឧត្តម សរ សុវណ្ណ រដ្ឋមន្រ្តីប្រតិភូអមនាយករដ្ឋមន្រ្តី អនុប្រធានប្រចាំការគណៈកម្មាធិការជាតិដឹកនាំអនុវត្តកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព (ផ.ក.អ.) និងជាប្រធានលេខាធិការដ្ឋាន ផ.ក.អ. បានថ្លែងបើកក្នុង​កម្មវិធីចាប់ឆ្នោតនេះថា ជាលទ្ធផល​សម្រេចបាននាពេលនេះ គឺបង្ហាញពីការយកចិត្តទុកដាក់​ខ្ពស់​ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាសម្តេចជាប្រធាន​គណៈកម្មាធិការជាតិដឹកនាំអនុវត្តកម្មវិធីផ្តល់ដី ការពារព្រៃ ដើម្បីរួមគ្នាអភិវឌ្ឍដោយចីរភាព។ ជំនួសមុខឱ្យក្រុមគ្រសារអ្នកទទួលបានលេខដីឡូតិ៍និងផ្ទះ ឯកឧត្តម បាន​ថ្លែងអំណរគុណយ៉ាងជ្រាសជ្រៅបំផុត​ជូនចំពោះសម្តេចធិបតីនាយក​រដ្ឋមន្រ្តី​។​

ឯកឧត្តម ថ្លែងទៀតថា ដើម្បីលើកកម្ពស់កម្រិតជីវភាពរបស់ប្រជាពលរដ្ឋដែលគ្រោងនឹងទៅរស់នៅទីតាំងនោះ គឺ រដ្ឋ​បានអភិវឌ្ឍហេដ្ឋារចនាសម្ព័ន្ធរូបវន្ត រួមមាន ការសាងសង់​ផ្លូវមេ និងផ្លូវរង ដែលមាន​ប្រវែងប្រមាណ ១២៥គីឡូម៉ែត្រ និងមាន​ស្រះទឹកចំនួន៣០ កន្លែង ព្រមទាំង បានសាងសង់ផ្ទះ និងបន្ទប់ទឹកបានចំនួន ៧៥១ខ្នង លើផែនការចំនួន ៧៧០ខ្នង ដែលមាន​ក្បាលដីឡូតិ៍នីមួយៗមានទំហំ ៣ហិកតា។ ដើម្បីធានាបាននូវតម្លាភាព សុក្រឹតភាព យុត្តិធម៌ និងភាពអាចជឿទុកចិត្តបានក្នុងការចាប់ឆ្នោត ផ.ក.អ. បានរៀបចំបន្ទះក្តារ ១១ផ្ទាំង ដោយ មួយផ្ទាំងៗមានឆ្នោតចំនួន៥០សន្លឹក និងផ្ទាំងចុងក្រោយមានចំនួន ៣៨សន្លឹក ដែលមានលេខដីឡូតិ៍ចាប់ពី លេខសម្គាល់ពី ២៦៣ ដល់លេខ៨០០ រួចចាក់ទៅក្នុងចុងបង្វិលសន្លឹកឆ្នោត និងចាប់ឆ្នោតដោយតំណាងរដ្ឋបាលខេត្តនីមួយៗ។ ការចាប់ឆ្នោតនេះត្រូវប្រព្រឹត្តទៅ រហូតដល់គ្រប់ចំនួនកំណត់ ៥៣៨សន្លឹកជាស្ថាពរ។

សូមបញ្ជាក់ថា កម្មវិធីផ្តល់ដីការពារព្រៃដើម្បីរួមគ្នាអភិវឌ្ឍដោយចីរភាពរបស់រាជរដ្ឋាភិបាល ធ្វើឡើងក្នុង​គោលបំណងសំខាន់ៗ ៣ រួមមាន ទី១-ដោះស្រាយតម្រូវការរបស់ប្រជាពលរដ្ឋក្រីក្រដែលគ្មានដីពិតប្រាកដ។ ទី២-ទប់ស្កាត់ការទន្ទ្រានដីរដ្ឋ ធ្វើជាកម្មសិទ្ធិឯកជន និងទី៣-ជំរុញការចូលរួមរបស់ប្រជាពលរដ្ឋក្នុងការពារព្រៃ និងអភិរក្សព្រៃឈើដើម្បីរួមគ្នាអភិវឌ្ឍដោយចីរភាព៕

អត្ថបទ៖ ធូ វិរៈ