សម្តេចធិបតី ប្រកាសសម្រេចអនុគ្រោះពន្ធប្រថាប់ត្រាផ្ទេរកម្មសិទ្ធកាន់កាប់ដីធ្លីជូនដល់វីរកងទ័ព និងវីរនគរបាលនៅជួរមុខ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានប្រកាសសម្រេចអនុគ្រោះពន្ធ ប្រថាប់ត្រាផ្ទេរកម្មសិទ្ធ និងសិទ្ធកាន់កាប់អចលនទ្រព្យជូនដល់បងប្អូនវីរកងទ័ព និងវីរនគរបាលជាតិ ដែលកំពុងបំពេញភារកិច្ចនៅជួរមុខ។

សម្តេចធិបតី ហ៊ុន ម៉ាណែត លើកឡើងថា ចំពោះយោធិនដែលបានកំពុងចូលរួមបម្រើប្រយុទ្ធឬក៏ត្រៀមប្រយុទ្ធនៅសមរភូមិមុខពិតប្រាកដ នឹងសម្រេចលើកលែងពន្ធប្រថាប់ត្រាផ្ទេរកម្មសិទ្ធកាន់កាប់ដីធ្លីជូនដល់ពួកគាត់ ដើម្បីជាការលើកទឹកចិត្ត និងការគិតគួរដល់បងប្អូនវីរកងទ័ពរបស់យើង។

សម្តេចធិបតីបានបញ្ជាក់ថា«សម្រាប់វីរយុទ្ធជន សម្រាប់វីរនគរបាលជាតិរបស់យើង ដែលបំពេញ ភារកិច្ចនៅខាងមុខ ហើយជាគោលការណ៍របស់ក្រុមការងារ ខ្ញុំឯកភាព និងគាំទ្រសម្រាប់វីរកងទ័ពរបស់ យើងទាំងបីប្រភេទ ដែលបំពេញភារកិច្ចមុខពិតប្រាកដ ដែលឈរជើង និងត្រៀមប្រយុទ្ធការពារទឹកដី យើងអនុគ្រោះពន្ធប្រថាប់ត្រាផ្ទេរកម្មសិទ្ធកាន់កាប់អចលនទ្រព្យ»។

ការលើកឡើងរបស់សម្តេចធិបតីនាយករដ្ឋមន្រ្តីនេះគឺបានធ្វើឡើងនៅក្នុងឱកាសអញ្ជើញចែកវិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋ នៅស្ថិតនៅឃុំជ័យធំ ឃុំរកាជន្លឹង និងឃុំពុកឫស្សី ​ស្រុក​ខ្សាច់កណ្ដាល ខេត្តកណ្ដាល នាព្រឹកថ្ងៃទី២៩ខែកក្កដា ឆ្នាំ២០២៦នេះ៕