ក្រុមនិយោជកកូរ៉េ សរសើរពលករកម្ពុជាឧស្សាហ៍ និងស្មោះត្រង់លើការងារ ហើយគ្រោងស្នើរដ្ឋាភិបាលខ្លួន បន្ថែមកូតាពលករកម្ពុជា

ភ្នំពេញ៖ ក្រុមនិយោជកនៃសាធារណរដ្ឋកូរ៉េ បានសម្ដែងនូវការកោតសសើរ ចំពោះពលករខ្មែរ ដែលកំពុងធ្វើការកូរ៉េ ថាមានភាពឧស្សាហ៍ព្យាយាម និងស្មោះត្រង់ចំពោះការងារ ហើយពួកគេគ្រោងស្នើទៅដល់រដ្ឋាភិបាលរបស់ខ្លួន ពង្រីកកូតាបន្ថែម សម្រាប់ពលករកម្ពុជា ។

នេះជាការអះអាងរបស់លោក លោក Kim Dohyung ប្រធានក្រុមប្រឹក្សាសេដ្ឋកិច្ចកម្ពុជា-កូរ៉េ កាលពីថ្ងៃទី២៧ ខែកក្កដា ឆ្នាំ២០២៦កន្លងទៅ នៅក្នុងពេលជួបពិភាក្សាការងារជាមួយឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ នៅស្ថានទូតកម្ពុជា ក្នុងទីក្រុងសេអ៊ូល ។

ក្នុងជំនួបនោះ លោក Kim បានឲ្យដឹងថា ក្រុមប្រឹក្សាសេដ្ឋកិច្ចកម្ពុជា-កូរ៉េ មានគម្រោងដឹកនាំគណៈប្រតិភូក្រុងផ្យង់ថេក មកបំពេញទស្សនកិច្ចនៅរាជធានីភ្នំពេញ នៅខែសីហាខាងមុខនេះ ក្នុងគោលបំណងបង្កើតកិច្ចសហប្រតិបត្តិការ ជាមួយសាលារាជធានីភ្នំពេញ សាកលវិទ្យាល័យ អង្គការសង្គមស៊ីវិល និងស្ថាប័នពាក់ព័ន្ធដទៃទៀត ។

ជាមួយគ្នានោះ លោកក៏បានលើកឡើងអំពីកំណើន នៃតម្រូវការពលករបរទេស E-9 សម្រាប់បំរើការងារក្នុងវិស័យឧស្សាហកម្ម នៅតំបន់ផ្យង់ថេកផងដែរ ហើយមានបំណងចង់ជំរុញឱ្យមានកូតាបន្ថែមចំនួនពលករកម្ពុជា ក្នុងទីក្រុងផ្យង់ថេក ពីព្រោះទទួលបានការកោតសរសើរពីសំណាក់ថៅកែជាច្រើន ចំពោះពលករកម្ពុជា ដែលឧស្សាហ៍ព្យាយាម និងស្មោះត្រង់ចំពោះការងារ។

ក្នុងឱកាសនោះ ឯកឧត្តមឯកអគ្គរាជទូត បានស្វាគមន៍ចំពោះគំនិតផ្តួចផ្តើម ក្នុងការបង្កើតចំណងសហប្រតិបត្តិការ ជាមួយសាលារាជធានីភ្នំពេញ និងថ្លែងអំណរគុណ ចំពោះបំណងចង់បានពលករ E-9 កម្ពុជា ដើម្បីបំរើការងារក្នុងទីក្រុងផ្យង់ថេក ។

ឯកឧត្តម ឃួន ផុនរតនៈ បានបន្តថា ស្ថានទូតនឹងជួយសម្របសម្រួលបន្ថែម សម្រាប់ជំនួបរវាងស្ថាប័នរដ្ឋ និងឯកជនអំឡុងពេលទស្សនកិច្ចរបស់ក្រុមគណៈប្រតិភូ ក្នុងប្រទេសកម្ពុជា ហើយសង្ឃឹមថាដំណើរទស្សនកិច្ចរបស់លោក Kim និងគណៈប្រតិភូ ទៅកាន់ប្រទេសកម្ពុជានឹងទទួលបានជោគជ័យប្រកបដោយផ្លែផ្កា ៕ អត្ថបទ បាន សុខរិទ្ធិ