ឆ្នាំ២០២៦នេះ មានមន្រ្តី ACU ស្ម័គ្រចិត្តជាង៤០០០នាក់ចូលរួមសង្កេតការណ៍ប្រឡងបាក់ឌុប

ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី១០ ខែសីហា ឆ្នាំ២០២៦ ខាងមុខ អង្គ​​​​​​ភាពប្រឆាំងអំពើពុករលួយ ឬហៅកាត់ជាភាសារអង់គ្លេស ACU បានបញ្ចប់ការជ្រើស​​រើសអ្នកសង្កេតកា​​​​រណ៍ស្ម័គ្រចិត្តបានចំនួនជាង៤០០០នាក់។ នេះបើតាមរបាយការណ៍របស់អង្គភាពប្រ​​ឆាំ​​​​ង​​អំពើពុករលួ​​​យ​​​បានបង្ហាញក្នុងកិច្ចប្រជុំលើកទី១២ អាណត្តិទី៤ នៃក្រុមប្រឹក្សាជាតិប្រឆាំងអំពើពុករលួ​​យ​​​។​​

អង្គភាពប្រឆាំងអំពើពុករលួយ នៅរសៀលថ្ងៃទី២៩ខែកក្កដា ឆ្នាំ២០២៦ បានរៀបចំកិច្ចជុំលើ​កទី១២ អាណត្តិទី៤ នៃក្រុមប្រឹក្សាជាតិប្រឆាំងអំពើពុករលួ​​យ​​ ក្រោមអធិបតីភាពដ៏ខ្ពង់ខ្ពង់សម្ដេចកិត្តិស​ង្គហ​​​បណ្ឌិ​​​​​ត ម៉ែន សំអន ប្រធានក្រុមប្រឹក្សាជាតិប្រឆាំងអំពើពុករលួយ ស្ថិតនៅអង្គភាពប្រឆាំងអំពើពុករ​លួយ​​​​ រាជធានីភ្នំពេញ។

នៅក្នុងកិច្ចប្រជុំ ឯកឧត្តម កិតិ្តនីតិកោសលបណ្ឌិត ទេសរដ្ឋមន្រ្តី ឱម យ៉ិនទៀង ប្រធានអង្គភាពប្រ​​ឆាំង​​អំពើពុករលួយបានអានរបាយការណ៍ថា ស្របតាមកម្មវិធីការងាររបស់អង្គភាពប្រឆាំងអំពើរពុករលួយក្នុ​​ងការដឹកនាំការងារសង្កេតការណ៍ ការប្រឡងសញ្ញាបត្រមធ្យមសិក្សាទុតិយភូមិ ស​​ម័យប្រឡងថ្ងៃទី១០ ខែសីហា ឆ្នាំ២០២៦ ខាងមុខ អង្គភាពប្រឆាំងអំពើពុករលួយ បានបញ្ចប់ការជ្រើសរើ​​សអ្នក​​សង្កេតការណ៍ស្ម័​គ្រចិត្តចំនួន ៤ ១៥០ នាក់ និងផ្តើម​ការងារសង្កេតការណ៍ ដែលចូលរួមដោយក្រុមការងារផ្ទាល់ពីដំ​ណាក់​​​កា​​លបោះពុម្ព​ប្រធាន​វិញ្ញាសា និង​វេច​ខ្ចប់ប្រធានវិញ្ញាសា ដែលរៀបចំដោយក្រសួងអប់រំ យុវជន និងកីឡា។

អង្គភាពប្រឆាំងអំពើពុករលួយបានវាយតម្លៃខ្ពស់អំពីប្រព័ន្ធរៀបចំការប្រឡងដាក់ចេញដោយក្រសួ​​ង​​អ​​ប់​​រំ យុវជន និងកីឡា ដែលជា​ប្រព័ន្ធមានប្រសិទ្ធភាពខ្ពស់ ហើយត្រូវពង្រឹងជាលំដាប់ ធានាបានការប្រ​​ឡងមួយ ​ដែល​តម្លាភាព យុត្តិធម៌ តាមស្មារតី “អ្នកចេះគឺជាប់”។ ក្រៅពីនេះ អង្គភាពប្រឆាំងអពើពុករលួយ       បានដំណើរការពិនិត្យ វិភាគ និងធ្វើការសម្រេចលើពាក្យប្ដឹង ដែលមានក្នុងខែកក្កដានេះ ស​​​រុ​​​បចំនួន ៥៧ ពាក្យប្ដឹង។ 

គួរបញ្ជាក់ដែរថា អង្គភាពប្រឆាំងអំពើពុករលួយមាន​បេសកកម្ម​​ដឹកនាំការប្រយុទ្ធប្រឆាំងនឹងអំពើ​ពុករលួយ​គ្រប់​រូបភាព​គ្រប់វិស័យ​ និង​គ្រប់​ជាន់​​ថ្នាក់​​នៅទូទាំងព្រះរាជាណាចក្រកម្ពុជា​ តាមរយៈការ​ចាត់​វិធា​ន​ការអប់រំ បង្ការ ទប់ស្កាត់និង​អនុវត្តច្បាប់បង្រ្កាបបទល្មើសពុករលួយដោយមានការចូលរួម​ពី​សាធារណៈជន និង​ ប្រតិបត្តិការ។ អត្ថបទ៖ទូច សោភ័ណ